Olubereberye 41:1-57 LGCB2014 - Bible AI

¹Oluvannyuma lwʼemyaka ebiri emirambirira, Falaawo nʼaloota ngʼayimiridde ku mugga Kiyira;

²laba mu mugga ne muvaamu ente ennungi ensava musanvu, ne ziriira mu bisaalu.

³Era laba ente endala embi enkovvu musanvu nazo ne ziva mu mugga, ne ziyimirira wamu na ziri ku lubalama lwʼomugga.

⁴Ente enkovvu, embi ne zirya ente ennungi ensava. Awo Falaawo nʼazuukuka.

⁵Ate nʼaddamu okwebaka nʼaloota ekirooto ekirala, laba ebirimba ebyʼemmere eyʼempeke musanvu ebigimu nga biri ku kiti kimu.

⁶Era laba oluvannyuma ebirimba ebirala musanvu nga bikaze olwʼempewo ezʼebbugumu ezʼebuvanjuba nabyo ne biddirira.

⁷Awo ebirimba biri ebikaze ne bimira ebirimba biri omusanvu ebigimu ebirungi. Falaawo nʼazuukuka, laba nga kibadde kirooto.

⁸Awo ku makya Falaawo ne yeeraliikirira; nʼatumya ne baleeta abalogo bonna abʼe Misiri, nʼabagezigezi baamu bonna; Falaawo nʼabategeeza ekirooto kye, kyokka ne watabaawo nʼomu eyasobola okukivvuunulira Falaawo.

⁹Awo omusenero wa Falaawo nʼagamba Falaawo nti, “Ntegedde nasobya nnyo.

¹⁰Falaawo bwe yasunguwalira abaddu be, nze nʼomukulu wʼabafumbi nʼatuteeka mu kkomera,

¹¹ekiro kimu omukulu wa bafumbi nange twaloota ebirooto, nga buli kimu kirina amakulu ga njawulo ku kinnaakyo.

¹²Mu ffe mwalimu omuvubuka Omwebbulaniya nga muddu wa mukulu wʼabambowa; bwe twamutegeeza nannyonnyola buli omu ekirooto kye nga bwe kyali.

¹³Nga bwe yatunnyonnyola era bwe kityo bwe kyali; nze nazzibwa ku mulimu gwange, ye omufumbiro, nʼawanikibwa ku muti.”

¹⁴Awo Falaawo nʼatumya baleete Yusufu, ne bamuleeta mangu okumuggya mu kkomera. Bwe yamala okumwebwa omutwe[34] nʼokukyusa engoye ze, nʼajja mu maaso ga Falaawo.

¹⁵Falaawo nʼagamba Yusufu nti, “Naloose ekirooto, naye tewali nʼomu ayinza kukivvuunula.”

¹⁶Yusufu nʼaddamu Falaawo nti, “Si nze nzija okukikola, wabula Katonda yʼanaabuulira Falaawo amakulu gaakyo.”

¹⁷Awo Falaawo nʼagamba Yusufu nti, “Laba, bwe nabadde nga nneebase ne ndoota nga nnyimiridde ku lubalama lwʼomugga Kiyira;

¹⁸ente ennungi ensava musanvu ne ziva mu mugga ne ziriira mu bisaalu;

¹⁹ate ente endala ennafu embi ennyo enkovvu ze sirabangako mu nsi yʼe Misiri nazo ne zijja.

²⁰Awo ente embi enkovvu ne zirya ente ziri omusanvu ensava ezaasoose,

²¹naye bwe zamaze okuzirya nga toyinza na kutegeera nti ziziridde, kubanga nga nkovvu nga bwe zaabadde olubereberye. Awo ne ndyoka nzuukuka.

²²“Ate era mu kirooto kyange nalabye ebirimba ebigimu ebirungi musanvu nga biri ku kiti kimu,

²³nʼebirimba ebirala musanvu ebikaze olwʼempewo ezʼebbugumu ezʼebuvanjuba, nabyo ne bivaayo.

²⁴Ebirimba ebikaze ne bimira biri ebigimu. Ebyo nabitegeezezza abagezigezi ne wabulawo nʼomu abivvuunula.”

²⁵Awo Yusufu nʼagamba Falaawo nti, “Ekirooto kya Falaawo kiri kimu: Katonda alaze Falaawo kyʼagenda okukola.

²⁶Ente omusanvu ennungi gyʼemyaka musanvu nʼebirimba omusanvu ebigimu gyʼemyaka musanvu; ekirooto kiri kimu.

²⁷Ente omusanvu embi enkovvu ezajja oluvannyuma, gyʼemyaka musanvu, nʼebirimba omusanvu ebikaze olwʼempewo ezʼebbugumu ezʼebuvanjuba gyʼemyaka omusanvu egyʼenjala.

²⁸“Nga bwe ŋŋambye Falaawo, Katonda alaze Falaawo ekyo kyʼagenda okukola.

²⁹Wajja kubaawo emyaka musanvu egyʼekyengera mu nsi yonna eyʼe Misiri,

³⁰naye oluvannyuma lwagyo waliddawo emyaka musanvu egyʼenjala eryerabiza ekyengera mu nsi yonna eyʼe Misiri; enjala eribuna ensi.

³¹Ekyengera tekirimanyika nʼakatono olwʼenjala empitirivu era embi ennyo, eribuna Misiri yenna.

³²Ekirooto kya Falaawo kye kivudde kiddiŋŋanwa, kitegeeza nti ekintu Katonda akikakasa era ajja kukituukiriza mangu.

³³Kale kaakano Falaawo alonde omusajja omukalabakalaba era owʼamagezi amuwe obuvunaanyizibwa ku nsi yonna eyʼe Misiri.

³⁴Era asseewo abalabirira balabirire ensi bakuŋŋaanye ekimu ekyokutaano ekyʼemmere eyʼempeke yonna mu nsi eyʼe Misiri okumalirako ddala emyaka omusanvu egyʼekyengera.

³⁵Bakuŋŋaanye emmere eyo mu myaka egijja egyʼekyengera, bazimbe ebyagi ebinene mu buli kibuga bagikuŋŋaanyize omwo olwʼekiragiro kya Falaawo, bagikuume.

³⁶Emmere eyo eriterekebwa olwʼenjala eriba mu nsi okumalako emyaka omusanvu egyʼenjala erigwa mu Misiri yonna; ensi ereme okuzikirizibwa enjala.”

³⁷Ebigambo bya Yusufu ne biwulikika bulungi mu matu ga Falaawo nʼagʼabaweereza be bonna.

³⁸Falaawo nʼagamba abaweereza be nti, “Tuyinza okufuna omuntu ngʼono Yusufu omuli Omwoyo wa Katonda?”

³⁹Awo Falaawo nʼagamba Yusufu nti, “Katonda nga bwʼakulaze bino byonna, tewali mulala mukalabakalaba, omugezi okukwenkana ggwe.

⁴⁰ⓥ Gwʼonoofuganga olubiri lwange, era abantu bange banaakolanga kyonna kyʼonoobalagiranga; wabula nze kabaka nʼabanga waggulu wo.”

⁴¹Awo Falaawo nʼagamba Yusufu nti, “Laba, nkutadde wo okufuga ensi yonna eyʼe Misiri.”

⁴²Olwo Falaawo nʼalyoka aggya empeta[35] ku ngalo ye nʼaginaanika Yusufu, nʼamwambaza ekyambalo ekya linena omulungi, nʼomukuufu ogwa zaabu mu bulago bwe.

⁴³Nʼamuwa nʼokutambuliranga mu ggaali lye eriddirira mu kitiibwa ngʼerya Falaawo mwe yatambuliranga. Bonna ne bavuunama mu maaso ga Yusufu nga bwe bagamba nti, “Muvuuname.” Bwʼatyo Falaawo nʼamuteekawo okufuga ensi yonna eyʼe Misiri.

⁴⁴Falaawo nʼagamba Yusufu nti, “Nze Falaawo, naye awatali kigambo kyo tewali muntu aliyimusa mukono gwe newaakubadde ekigere kye mu Misiri.”

⁴⁵Falaawo nʼatuuma Yusufu erinnya Zafenasipaneya; nʼamuwa Asenaasi muwala wa Potiferi kabona wa Oni okuba mukazi we. Bwʼatyo Yusufu nʼatambula okubuna Misiri yonna.

⁴⁶Yusufu yali aweza emyaka amakumi asatu bwe yatandika okuweereza Falaawo, ye kabaka wʼe Misiri. Awo Yusufu nʼava mu maaso ga Falaawo nʼagenda nʼabuna Misiri yenna.

⁴⁷Mu myaka omusanvu egyʼekyengera emmere yabala nʼekamala.

⁴⁸Yusufu nʼakuŋŋaanya emmere mu Misiri mu myaka omusanvu egyʼekyengera nʼagiterekera mu byagi ebinene mu bibuga. Mu buli kibuga nʼakuŋŋaanyizamu emmere eyavanga mu nnimiro ezikyetoolodde.

⁴⁹Yusufu nʼatereka emmere mpitirivu, nʼebanga omusenyu ogwʼoku nnyanja, okutuusa lwe yalekeraawo okugipima, nga tekisoboka kugipima.

⁵⁰Omwaka ogwʼenjala nga tegunnatuuka Yusufu yafuna abaana aboobulenzi babiri, Asenaasi, muwala wa Potiferi kabona wa Oni be yamuzaalira.

⁵¹Omwana eyasooka yamutuuma Manase, kubanga Yusufu yagamba nti, “Katonda anneerabizza obuzibu bwange bwonna, nʼennyumba ya kitange.”

⁵²Owookubiri nʼamutuuma Efulayimu, kubanga yagamba nti, “Katonda anjazizza mu nsi mwe nabonaabonera.”

⁵³Awo emyaka omusanvu egyʼekyengera ekyali mu nsi yʼe Misiri ne giggwaako.

⁵⁴ⓦ Emyaka omusanvu egyʼenjala ne gitandika nga Yusufu bwe yayogera. Enjala nʼegwa nʼebuna mu nsi zonna, kyokka yo mu Misiri nga emmere mweri.

⁵⁵Enjala bwe yagwa mu Misiri, abantu ne bakaabira Falaawo olwʼemmere. Falaawo nʼagamba Abamisiri nti, “Mugende eri Yusufu; kyʼanaabagamba, kye muba mukola.”

⁵⁶Kale enjala bwe yabuna Misiri, Yusufu nʼasumulula ebyagi byʼemmere byonna; nʼaguza Abamisiri emmere.

⁵⁷Ensi zonna nazo ne zijja e Misiri eri Yusufu okugula emmere; kubanga enjala yayitirira mu nsi zonna.