Olubereberye 49:1-33 LGCB2014 - Bible AI

¹Awo Yakobo nʼayita batabani be nʼabagamba nti, Mukuŋŋaane, ndyoke mbategeeze ebiribabaako mu nnaku ezijja.

²Mukuŋŋaane muwulire, mwe abaana ba Yakobo, muwulirize Isirayiri kitammwe.

³Lewubeeni ggwe mubereberye wange, amaanyi gange, ebibala ebibereberye ebyʼamaanyi gange, ekitiibwa nʼobuyinza ebiyitirivu.

⁴Naye tafugika, oli ngʼamayengo gʼennyanja, naye tokyali wa kitiibwa, kubanga walinnya ekitanda kya kitaawo, mu nnyumba yange, nʼokyonoona.

⁴

⁵Simyoni ne Leevi baaluganda, ebitala byabwe byakulwanyisa bya maanyi.

⁶Ayi omwoyo gwange teweetaba mu kuteesa kwabwe. Ayi omwoyo gwange teweegatta nabo. Kubanga mu busungu bwabwe batta abantu, olwʼokwekulumbaza kwabwe baatema ente olunywa.

⁷Obusungu bwabwe bukolimirwe, kubanga bungi; nʼobukambwe bwabwe, kubanga bwa ttima. Ndibaawula mu Yakobo, ndibasaasaanya mu Isirayiri.

⁷

⁸Yuda gwe baganda bo banaakutenderezanga. Omukono gwo gunaatulugunyanga abalabe bo. Abaana ba kitaawo banaakuvuunamiranga.

⁹ⓓ Yuda, mwana wʼempologoma. Oyambuse mwana wange, ngʼovudde ku muyiggo. Yakutama, yabwama ngʼempologoma. Ddala ngʼempologoma enkazi, ani anaakweŋŋanga?

¹⁰Era omuggo gwʼomufuzi teguuvenga wakati wa bigere bya Yuda, okutuusa Siiro lwʼalijja; era oyo amawanga gonna gwe ganaawuliranga.

¹¹Alisiba endogoyi ku muzabbibu, nʼomwana gwʼendogoyi ku muzabbibu ogusinga obulungi, ayoza ebyambalo bye mu wayini, nʼengoye ze mu musaayi gwe zabbibu.

¹²Amaaso ge galimyuka wayini, nʼamannyo ge galitukula okusinga amata.

¹²

¹³Zebbulooni alibeera ku mabbali ga nnyanja; anaabanga mwalo gwʼamaato, ensalo ze ziriba ku Sidoni.

¹⁴Isakaali ndogoyi ya maanyi, ngʼakutama wakati mu bisibo byʼendiga;

¹⁵yalaba ngʼekifo kyʼokuwummuliramu kirungi; nga nʼensi esanyusa; nʼalyoka akkakkanya ekibegabega kye okusitula, nʼafuuka omuddu owʼokukozesebwanga emirimu egyʼobuwaze.

¹⁵

¹⁶Ddaani anaalamulanga mu bwenkanya abantu be ngʼekika ekimu ku bika bya Isirayiri.

¹⁷Ddaani anaaba musota mu kkubo, essalambwa ku kkubo, eriruma ebisinziiro byʼembalaasi, omwebagazi waayo alyoke agwe emabega waayo.

¹⁷

¹⁸Nnindirira obulokozi bwo, Ayi Mukama.

¹⁸

¹⁹Gaadi alirumbibwa ogubiina gwʼabanyazi, naye ye, alibafubutukira emabega.

¹⁹

²⁰Aseri emmere ye eneebanga ngimu, era anaagemuliranga kabaka ebyokulya.

²⁰

²¹Nafutaali mpeewo ya ddembe, avaamu ebigambo ebirungi.

²¹

²²Yusufu lye ttabi eribala ennyo, ettabi eribala ennyo eriri ku mugga; abaana be babuna bbugwe.

²³Abalasa obusaale baamulumba bubi nnyo, baamulasa ne bamulumya nnyo;

²⁴naye omutego gwe ne gunywera, nʼemikono gye ne gitasagaasagana. Olwʼomukono gwa Ayinzabyonna owa Yakobo, olwʼOmusumba, Olwazi lwa Isirayiri,

²⁵Olwa Katonda wa kitaawo, akuyamba, olwa Ayinzabyonna akuwa omukisa, Omukisa oguva waggulu mu ggulu, Omukisa ogwa wansi mu buziba, Omukisa ogwʼomu lubuto ne mu mabeere.

²⁶Omukisa gwa kitaawo gusinga omukisa gwa bajjajjange, gusinga egyo egyaweebwa bajjajja abʼedda. Gino gyonna gibeere ku mutwe gwa Yusufu, gibeere ne ku bukowekowe bwʼoyo eyayawukanyizibwa ne baganda be.

²⁶

²⁷Benyamini musege ogunyaga, mu makya alya omuyiggo, mu kawungeezi nʼagaba omunyago.

²⁸Ebyo byonna byʼebika ekkumi nʼebiriri ebya Isirayiri, era ebyo kitaabwe bye yayogera nabo ngʼabasabira omukisa. Buli omu ngʼamusabira omukisa ogumusaanira.

²⁹Oluvannyuma nʼabakuutira nʼabagamba nti, “Nditwalibwa eri abantu bange gye baatwalibwa. Munziikanga wamu ne bajjajjange, mu mpuku eri mu nnimiro ya Efulooni Omukiiti,

³⁰mu mpuku eri mu nnimiro ya Makupeera, okumpi ne Mamule, mu nsi ya Kanani, Ibulayimu gye yagulira mu nnimiro, okuva ku Efulooni Omukiiti. Yagigula okuba obutaka bwʼokuziikangamu.

³¹Awo we waaziikibwa Ibulayimu ne Saala mukazi we, era ne Isaaka ne Lebbeeka mukazi we, we baaziikwa, era awo we naziika Leeya.

³²Ennimiro nʼempuku erimu byagulibwa okuva ku baana ba Kesi.”

³³Yakobo bwe yamala okukuutira batabani be, nʼazaayo ebigere bye mu kitanda, nʼassa omukka ogwʼenkomerero nʼafa nʼakuŋŋaanyizibwa eri abantu be.