Olubereberye 6:1-22 LGCB2014 - Bible AI

¹Abantu bwe beeyongera obungi ku nsi ne bazaalirwa abaana aboobuwala.

²Abaana ba Katonda ne balaba ngʼabawala abo balungi ne bawasa buli gwe beerondera.

³ⓞ Awo Katonda nʼagamba nti, “Omwoyo wange taawakanenga na muntu emirembe gyonna, kubanga muntu buntu; nʼennaku ze ziriba emyaka kikumi mu abiri.”

⁴Mu nnaku ezo, abaana ba Katonda bwe beegatta nʼabawala bʼabantu abo, ne babazaalamu abaana; be Banefuli abaali abatutumufu ennyo era abalwanyi abeekitalo mu biseera ebyo era ne mu biro ebyaddirira.

⁵ⓟ Katonda nʼalaba ngʼekibi kyʼomuntu kiyinze nnyo ku nsi; nga buli ndowooza yʼomutima gwʼomuntu mbi njereere ebbanga lyonna.

⁶ⓠ Mukama nʼanakuwala nnyo kubanga yatonda omuntu ku nsi, nʼalumwa nnyo mu mutima gwe.

⁷Awo Mukama nʼagamba nti, “Ndiggya ku nsi omuntu gwe natonda, ndisaanyaawo omuntu, nʼensolo nʼebinyonyi, kubanga ne jjusizza olwʼokubitonda.”

⁸ⓡ Kyokka ye Nuuwa nʼalaba ekisa mu maaso ga Mukama.

⁹ⓢ Bino bye bifa ku Nuuwa: Nuuwa yali muntu mutuukirivu, nga taliiko kya kunenyezebwa mu bantu bʼekiseera kye, nʼatambula ne Katonda.

¹⁰Nuuwa yalina batabani be basatu: Seemu ne Kaamu ne Yafeesi.

¹¹Ensi yali nnyonoonefu mu maaso ga Katonda era ngʼejjudde eddalu.

¹²Katonda nʼalaba ensi, era laba, ngʼeyonoonese mu kweyisa kwayo kubanga buli muntu yenna yali kyetwala nga tewakyali mutuukirivu.

¹³Katonda kwe kugamba Nuuwa nti, “Mmaliridde okuzikiriza buli muntu, kubanga ensi ejjudde eddalu; laba, nzija kubazikiriza mbamalewo ku nsi.

¹⁴Naye ggwe Nuuwa weekolere eryato mu muti gofeeri, okolemu ebisenge, olibikke nʼenvumbo munda ne kungulu.

¹⁵Bwʼoti bwʼoba olikola: obuwanvu bwalyo mita kikumi mu ana, nʼobugazi mita amakumi abiri mu ssatu, nʼobugulumivu mita kkumi na ssatu nʼekitundu.

¹⁶Bwʼoliba olizimba, waggulu oteekangayo akasolya nga kabika kimu kyakubiri ekya mita. Omulyango gwalyo oguteekanga mu mbiriizi zaalyo. Okolanga eryato lya kalinassatu, eryʼemyaliiro: ogwa wansi nʼogwokubiri, nʼogwokusatu.

¹⁷Ndireeta amataba ku nsi, okuzikiriza buli ⓣ kiramu, ekissa omukka, ekiri wansi wʼeggulu; buli ekiri ku nsi kya kufa.

¹⁸Naye ndikola endagaano naawe. Oliyingira mu lyato, ggwe, ne mukazi wo, ne batabani bo, ne baka batabani bo wamu naawe.

¹⁹Oliyingira mu lyato na buli kiramu ekirina omubiri; oliyingiza bibiri bibiri ekisajja nʼekikazi bibeere biramu naawe.

²⁰Ku binyonyi ebya buli ngeri, ne ku nsolo eza buli ngeri, na buli ekyewalula ekya buli ngeri, bibiri bibiri ebya buli ngeri birijja gyʼoli, bibeere biramu.

²¹Era twala buli ngeri ya mmere eriibwa, ogitereke; eriba mmere yo nʼebiramu byo.”

²²Nuuwa nʼakola byonna nga Katonda bwe yamulagira.