Olubereberye 7:1-24 LGCB2014 - Bible AI

¹ⓤ Awo Mukama nʼagamba Nuuwa nti, “Yingira mu lyato, ggwe nʼabantu bo bonna, kubanga nkulabye ngʼoli mutuukirivu mu mulembe guno.

²Twala ku buli nsolo ennongoofu musanvu musanvu ensajja nʼenkazi,

³era ne ku binyonyi ebyʼomu bbanga musanvu musanvu ekisajja nʼekikazi, okukuuma olulyo lwabyo ku nsi.

⁴Bwe waliyitawo ennaku musanvu nditonnyesa enkuba ku nsi emisana nʼekiro okumalira ddala ennaku amakumi ana, era ndizikiriza buli kintu ekiramu kye natonda ku nsi.”

⁵Bwʼatyo Nuuwa nʼakola buli kintu nga Mukama bwe yakimulagira.

⁶Nuuwa yali aweza emyaka lukaaga amataba bwe gajja ku nsi.

⁷Nuuwa nʼayingira mu lyato nʼabaana be ne mukazi we nʼabakazi ba baana be bawone amataba.

⁸Era ensolo ennongoofu, nʼensolo ezitali nnongoofu nʼebibuuka mu bbanga na buli ekyewalula,

⁹ne biyingira bibiri bibiri ekisajja nʼekikazi eri Nuuwa mu lyato, nga Katonda bwe yamulagira.

¹⁰Awo olwatuuka oluvannyuma lwʼennaku ziri omusanvu, amataba ne gatandika ku nsi.

¹¹Mu mwaka ogwʼolukaaga ogwʼobulamu bwa Nuuwa, mu mwezi ogwokubiri, ku lunaku olwʼekkumi nʼomusanvu olwʼomwezi, ku lunaku olwo ensulo zonna ezʼomu nnyanja ennene, ne ziggulwa lumu nʼebituli byonna ebyʼeggulu.

¹²Enkuba nʼetonnya ku nsi okumala ennaku amakumi ana, emisana nʼekiro.

¹³Ku lunaku olwo lwennyini Nuuwa ne mukazi ne batabani be, Seemu, ne Kaamu ne Yafeesi, ne bakazi baabwe bonsatule, ne bayingira mu lyato.

¹⁴Buli nsolo mu ngeri yaayo na buli nte, na buli ekyewalula, era na buli kinyonyi mu ngeri yaakyo na buli nkula ya kinyonyi, nabyo ne biyingira mu lyato.

¹⁵Ne biyingira mu lyato lya Nuuwa bibiri bibiri byonna ebyalimu omukka ogwʼobulamu.

¹⁶Byonna ne biyingira mu lyato, ekisajja nʼekikazi; byayingira nga Katonda bwe yalagira Nuuwa, Katonda nʼaggalawo eryato.

¹⁷Amataba ne gabuna ensi okumala ennaku amakumi ana. Amazzi ne geeyongeranga, nʼeryato nalyo ne lyeyongeranga okutumbiira ku nsi.

¹⁸Amazzi ne gatumbiira ne geeyongera okwala ku nsi, nʼeryato ne liseeyeeya kungulu ku mazzi.

¹⁹Amazzi ne gatumbiira nnyo nnyini ku nsi, nʼensozi zonna empanvu wansi wʼeggulu lyonna amazzi ne gazibikka.

²⁰ⓥ Amazzi ne gatumbiira ne gabikka ensozi ne zibulira wansi mu mazzi mita nga musanvu.

²¹Buli kiramu ekyali ku nsi ne kifa: ebinyonyi nʼensolo ezʼawaka nʼezʼomu nsiko, nʼebitonde byonna ebyali ku nsi nʼabantu bonna.

²²Buli kintu kyonna ekyali ku lukalu ekissa omukka ne kifa.

²³ⓦ Buli kiramu kyonna ekyali ku nsi ne kimalibwawo: abantu, nʼensolo, na buli kitonde ekitambula ku nsi, nʼebinyonyi ebyʼomu bbanga ne bimalibwawo ku nsi. Nuuwa yekka nʼabo be yali nabo mu lyato be baasigalawo.

²⁴Amataba gaamala ku nsi ennaku kikumi mu ataano.