Olubereberye 9:1-29 LGCB2014 - Bible AI

¹Awo Katonda nʼawa Nuuwa ne batabani be omukisa nʼagamba nti, “Muzaale mwale mweyongerenga nnyo mujjuze ensi.

²Ensolo zonna ezʼomu nsiko, nʼebinyonyi ebyʼomu bbanga, na buli ekitambula ku nsi, buli ekiri mu nnyanja, byonna binaakutyanga, mbikuwadde mu mikono gyo.

³Buli kintu ekiramu, ekitambula onookiryanga. Nga bwe nakuwa ebimera, kaakano nkuwa buli kintu.”

⁴ⓧ “Naye toolyenga nnyama ngʼekyalimu omusaayi gwayo.

⁵Era ndivunaana ayiwa omusaayi gwammwe ne nvunaana nʼomuntu olwʼomusaayi gwʼensolo ne muvunaana nʼolwʼomusaayi gwa muntu munne.

⁶ⓨ Buli anaayiwanga omusaayi gwʼomuntu, nʼogugwe gunaayiibwanga, kubanga mu kifaananyi kya Katonda, Katonda mwe yakolera omuntu.

⁷Naye ggwe onoozaalanga ne weeyongera obungi. Oneeyongeranga ku nsi.”

⁸Awo Katonda nʼagamba Nuuwa ne batabani bwe baali

⁹nti, “Laba nkola endagaano yange nammwe ne bonna abaliva mu mmwe oluvannyuma lwammwe,

¹⁰era na buli kitonde ekiramu ekiri naawe: ebinyonyi, nʼensolo ezʼawaka nʼezʼomu nsiko zonna, ne byonna bye muvudde nabyo mu lyato, ne buli kitonde kyonna ku nsi.

¹¹Nkola endagaano yange eno nammwe: tewaabengawo mataba gazikiriza bulamu bwonna, tewakyaddayo kubaawo mataba gasaanyaawo nsi.”

¹²Katonda nʼagamba nti, “Kano ke kabonero ke nteeka wakati wange nammwe, na buli kitonde ekiramu ekiri nammwe, era nʼabʼemirembe egiriddawo.

¹³Nteeka musoke wange mu kire, nga ke kabonero akʼendagaano wakati wange nʼensi.

¹⁴“Kale olunaatuukanga, bwe nnaaleetaanga ekire ku nsi, musoke anaalabikiranga ku bire,

¹⁵ne nzijukira endagaano yange nammwe na buli kiramu; era amazzi tegakyaddayo kuzikiriza biramu.

¹⁶Musoke bwʼanaabanga ku bire, nnaamutunuuliranga ne nzijukira endagaano eteriggwaawo eriwo wakati wa Katonda na buli kitonde ekiramu ekiri ku nsi.”

¹⁷Katonda nʼagamba Nuuwa nti, “Kano ke kabonero akʼendagaano gye ntaddewo wakati wange ne buli kiramu ekiri ku nsi.”

¹⁸Batabani ba Nuuwa abaava mu lyato ye Seemu, ne Kaamu ne Yafeesi. Kaamu ye yali kitaawe wa Kanani.

¹⁹Bonna abasatu be baali batabani ba Nuuwa; era okuva mu bano ensi yonna yajjula abantu.

²⁰Nuuwa nʼatandika okulima nʼasimba emizabbibu;

²¹nʼanywa omwenge nʼatamiira, ne yeebaka mu weema ngʼali bwereere.

²²Kaamu kitaawe wa Kanani nʼalaba obwereere bwa kitaawe, nʼabuulirako baganda be ababiri abaali ebweru.

²³Awo ne bateeka olugoye ku bibegabega byabwe ne batambula ekyennyumannyuma, ne babikka ku bwereere bwa kitaabwe.

²⁴Omwenge bwe gwamwamukako, Nuuwa nʼazuukuka nʼategeera mutabani we omuto kyʼamukoze.

²⁵Nʼakolimira ezzadde lya Kaamu nʼagamba nti,

²⁵“Kanani akolimirwe, abeere muddu wa baddu eri baganda be.”

²⁶Era nʼagamba nti, “Mukama Katonda wange, awe Seemu omukisa, Kanani abeere muddu we.”

²⁷Katonda yaza Yafeesi, abeere mu weema za Seemu, Kanani abeere muddu we.

²⁸Oluvannyuma lwʼamataba Nuuwa yawangaala emyaka emirala ebikumi bisatu mu ataano.

²⁹Emyaka gyonna Nuuwa, gye yamala ku nsi ne giba lwenda mu amakumi ataano, nʼafa.