Oluyimba 2:1-17 LGCB2014 - Bible AI

¹Ndi kimuli kya Looza ekya Saloni,[5] eddanga eryʼomu biwonvu.

²Ngʼeddanga mu maggwa, gwe njagala ennyo bwʼali bwʼatyo mu baweereza abakazi.

²

³Ngʼomucungwa mu miti egyʼomu kibira, aŋŋanza bwʼali bwʼatyo mu bavubuka. Neesiima okutuula mu kisiikirize kye, nʼekibala kye kimpomera.

⁴Yantwala ku kijjulo, nʼokwagala kwe ne ku mmaamira.

⁵Munzizeemu amaanyi nʼezabbibu enkalu, mumbuddeebudde nʼemicungwa kubanga okwagala kunzirisizza.

⁶Omukono gwe ogwa kkono guli wansi wa mutwe gwange, nʼomukono gwe ogwa ddyo gumpambatira.

⁷Mmwe abawala ba Yerusaalemi, mbakuutira, ngʼempeewo nʼenjaza ezʼomu ttale, temusisimula newaakubadde okuzuukusa okwagala okutuusa nga kweyagalidde.

⁷

⁸Wuliriza omwagalwa wange, Laba, ajja ngʼabuukirabuukira ku nsozi, ngʼazinira ku busozi.

⁹Omwagalwa wange ali ngʼempeewo oba ennangaazi ento. Laba ayimiridde emabega wʼolukomera lwaffe, Alingiza mu madirisa, alabikira mu mulimu ogulukibwa ogwʼomu ddirisa.

¹⁰Omwagalwa wange yaŋŋamba nti, “Golokoka, Owoomukwano, omulungi wange, ojje tugende,

¹¹kubanga laba ttoggo aweddeko, nʼenkuba eweddeyo.

¹²Ebimuli bimulisizza, nʼebiro ebyʼokuyimba bituuse, era nʼokukaaba kwʼamayiba kuwulirwa mu nsi.

¹³Omutiini[6] gubala ettiini zaagwo, nʼemizabbibu gimulisizza ne gibunya akawoowo kaagyo. Golokoka Owoomukwano, omulungi wange ojje tugende.”

¹⁴Ggwe ejjiba lyange, eribeera mu njatika ezʼomu njazi, mu bwekwekero obwʼamayinja, ndaga amaaso go, ka mpulire eddoboozi lyo, kubanga eddoboozi lyo ddungi nnyo, nʼamaaso go gasanyusa.

¹⁵Tukwatire ebibe, obube obutono, obwonoona ennimiro ezʼemizabbibu, kubanga ennimiro zaffe ezʼemizabbibu zimulisizza.

¹⁵

¹⁶Muganzi wange, wange nzekka, era nange ndi wuwe; aliisiza ekisibo kye mu malanga,

¹⁷okutuusa obudde nga bukedde nʼebisiikirize nga biddukidde ddala; okyuke omwagalwa wange obe ngʼempeewo oba ennangaazi ento ku busozi obwʼe Beseri.