Oluyimba 4:1-16 LGCB2014 - Bible AI

¹Ngʼolabika bulungi, gwe njagala, laba ondabikidde bulungi. Amaaso go mayiba mu lugoye mwʼogabisse. Enviiri zo ziri ngʼeggana lyʼembuzi eziserengeta okuva ku lusozi Gireyaadi.

²Amannyo go gali ngʼekisibo kyʼendiga nga kye zijje zisalibweko ebyoya, nga ziva okunaazibwa. Buli emu nnongo eri nʼennongo ginnaayo, so tewali eri yokka.

³Emimwa gyo giri ngʼewuzi eyʼolugoye olutwakaavu; nʼakamwa ko kandabikira bulungi. Amatama go mu lugoye lwʼogabisseeko gali ngʼekitundu kyʼekkomamawanga.[7]

⁴Ensingo yo eri ngʼomulongooti gwa Dawudi, ogwatereezebwa obulungi; ne ku gwo nga kuliko engabo lukumi, zonna nga ngabo zʼabasajja abalwanyi.

⁵Amabeere go gombi gali ngʼabaana bʼempeewo, abʼempeewo, nga balongo, abaliira mu malanga.

⁶Okutuusa obudde nga bukedde, nʼebisiikirize nga biweddewo, ndigenda ku lusozi olunene olwa mooli ne ku kasozi akʼomugavu.

⁷Ngʼolabika bulungi wenna, omwagalwa wange, toliiko bbala na limu.

⁷

⁸Jjangu tuve mu Lebanooni, omugole wange, jjangu tuve mu Lebanooni. Lengera okuva ku ntikko ya Amana, nʼokuva ku ntikko ya Seniri ne ku ntikko ya Kerumooni, nʼokuva mu mpuku eyʼempologoma, ne ku nsozi ezʼengo.

⁹Osenzesenze omutima gwange, mwannyinaze, omugole wange; otutte omutima gwange, ne munye yʼeriiso lyo gyʼonkubye, nʼomukuufu ogumu ogwʼomu bulago bwo.

¹⁰Ngʼokwagala kwo kulungi mwannyinaze, omugole wange, okwagala kwo nga kusinga nnyo wayini, nʼakawoowo akʼamafuta go kasinga ebyʼakawoowo ebyʼengeri zonna obulungi.

¹¹Emimwa gyo gitonnya obuwoomi ngʼebisenge ebyʼomubisi gwʼenjuki, omugole wange; amata nʼomubisi gwʼenjuki biri wansi wʼolulimi lwo. Akaloosa akʼebyambalo byo kali ngʼakawoowo akʼe Lebanooni.

¹²Oli nnimiro eyasimbibwa, mwannyinaze, omugole wange, era oli luzzi olwasibibwa[8], ensulo eyateekebwako akabonero.

¹³Ebimera byo nnimiro ya mikomamawanga, erina ebibala byonna ebyʼomuwendo, ne kofera nʼemiti egyʼomugavu

¹⁴nʼomugavu ne kalikomu, ne kalamo ne kinamoni, nʼemiti egyʼebika byʼomugavu byonna, ne mooli ne akalosi, wamu nʼebyʼakawoowo byonna ebisinga obulungi.

¹⁵Oli nsulo ya nnimiro, oluzzi olwʼamazzi amalamu, olukulukuta okuva mu Lebanooni.[9]

¹⁵

¹⁶Zuukuka gwe empewo eyʼobukiikakkono, naawe empewo eyʼobukiikaddyo jjangu.[10] Mukuntire ku nnimiro yange, akaloosa, kaayo akalungi kasaasaane wonna, Muleke muganzi wange ajje mu nnimiro ye, alye ebibala byamu ebyʼomuwendo.