Oluyimba 5:1-16 LGCB2014 - Bible AI

¹Nzize mu nnimiro yange mwannyinaze, omugole wange; nkuŋŋaanyiza mooli yange nʼebyʼakawoowo byange. Ndidde ebisenge byange ebyʼomubisi gwʼenjuki gwange ne nywa nʼomubisi gwange, Nywedde wayini wange nʼamata gange. Abemikwano mulye munywe, munywere ddala, mmwe abaagalana.

²Nnali ngalamidde, ngʼomutima gwange guwulira. Ne mpulira muganzi wange ngʼakonkona, nʼayogera nti, “Nziguliraawo mwannyinaze, Owoomukwano, ejjiba lyange, owe wange ataliiko bbala, kubanga omutwe gwange gutobye omusulo, nʼenviiri zange zibisiwadde olwʼobunnyogovu.”

³Nziggyeko ekkooti yange, nnaagyambala ntya nate? Nanaabye ebigere, nnaddayo ntya mu ttaka gye binaddugalira?

⁴Muganzi wange bwe yakwata ku munyolo, omutima gwange ne gubuukabuuka.

⁵Ne ngolokoka okuggulirawo muganzi wange, emikono gyange nga gitonnya mooli, nʼengalo zange nga zikulukuta mooli, ku minyolo gyʼekufulu.

⁶Ne ŋŋenda okuggulirawo muganzi wange, naye muganzi wange ngʼavuddewo, yeetambulidde. Omutima gwange gwasanyuka bwe nnawulira eddoboozi lye. Ne munoonya naye nʼambula, ne mukoowoola naye nga taddamu.

⁷Abakuumi baansanga bwe baali nga balawuna mu kibuga; baankuba, ne bandeetako ebinuubule, ne batwala nʼekyambalo kyange, abasajja abo abakuuma bbugwe.

⁸Mmwe abawala ba Yerusaalemi, mbakuutira nti bwe mulaba ku muganzi wange, mumutegeeze ngʼokwagala kwange gyʼali bwe kunzita.

⁸

⁹Owange, kiki muganzi wo kyʼalina kyasinza abalungi abalala ggwe omukazi akira abalala obulungi? Kiki muganzi wo kyasinza abalala nʼokutukuutira nʼotukuutira bwʼotyo?

⁹

¹⁰Muganzi wange alabika bulungi nnyo era mumyufu, atabula ne mu bantu omutwalo.

¹¹Omutwe gwe gwa zaabu ennongoose ennyo; nʼenviiri ze zirimu amayengo, era nzirugavu nga nnamuŋŋoona.

¹²Amaaso ge gali ngʼamayiba ku mabbali gʼemigga egyʼamazzi, agaanaazibwa nʼamata, ne gaba ngʼamayinja agʼomuwendo omungi.

¹³Amatama ge gali ngʼemisiri egyʼobuwoowo, obuleeta akaloosa akalungi. Emimwa gye giri ngʼamalanga agakulukuta mooli.

¹⁴Emikono gye giri ngʼemitayimbwa egya zaabu egiteekebwamu amayinja agʼomuwendo. Omubiri gwe guli ngʼamasanga amayooyote agatoneddwa ne safiro.

¹⁵Amagulu ge gali ngʼempagi ezʼamayinja aganyirira ezisimbibwa mu zaabu ennungi. Mu ndabika afaanana Lebanooni omulungi ngʼemivule gyayo.

¹⁶Enjogera ye mpomerevu, weewaawo awamu nʼebyo byonna ayagalibwa. Ono ye muganzi wange, ye mukwano gwange; mmwe abawala ba Yerusaalemi.