Omubuulizi 1:1-18 LGCB2014 - Bible AI

¹Ebigambo byʼOmubuulizi, mutabani wa Dawudi kabaka mu Yerusaalemi.

²“Obutaliimu! Obutaliimu!” bwʼayogera Omubuulizi. Byonna butaliimu.

³Omuntu afuna ki mu byonna byʼakola, mu byonna ebimukooya wansi wʼenjuba?

⁴Omulembe ogumu gugenda, omulala ne gujja, naye ensi ebeerera emirembe gyonna.

⁵Enjuba evaayo era nʼegwa, ate nʼeyanguwa okutuuka mu kifo mwʼeviirayo.

⁶Empewo ekunta ngʼeraga obukiikaddyo, ne yeetooloola okutuuka obukiikakkono; empewo yeetooloola ne yeetooloola, nʼekomerawo ku biwaawaatiro byayo.

⁷Emigga gyonna gikulukuta nga giraga mu nnyanja, naye ennyanja tejjula; ekifo emigga gye gikulukutira era gye gyeyongera okukulukutira.

⁸Ebintu byonna bijjudde obukoowu omuntu bwʼatasobola kutenda! Eriiso terimatira kulaba, wadde okutu okukoowa okuwulira.

⁹Ekyo ekyabaawo era kye kigenda okubaawo, nʼekyo ekikoleddwa era kye kigenda okukolebwa; era tewali kintu kiggya wansi wʼenjuba.

¹⁰Waali wabaddewo ekintu ekyali kigambiddwa nti Laba kino kiggya? Kyaliwo dda mu mirembe egyatusooka?

¹¹Tewali kujjukira bintu byasooka era tewaliba kujjukira bintu ebyo ebitanabaawo mu ebyo ebijja oluvannyuma.

¹²Nze Omubuulizi nali kabaka wa Isirayiri mu Yerusaalemi.

¹³Nagezaako nʼomutima gwange okuyiga nʼokwetegereza nʼamagezi gange gonna mu ebyo ebikolebwa wansi wʼeggulu; omulimu Katonda gwe yawa abaana bʼabantu okukola, guteganya.

¹⁴Ndabye ebintu byonna ebikolebwa wansi wʼenjuba; era laba, byonna butaliimu na kugoberera mpewo.

¹⁵Ekyo ekyakyama tekisoboka kugololebwa, nʼekibulako tekibalibwa.

¹⁶Nayogera munda yange nti Nfunye amagezi mangi agasinga agʼabo bonna abaali babadde mu Yerusaalemi, era nfunye amagezi nʼokumanya kungi.

¹⁷Era omutima gwange ne gumanya okwawula amagezi nʼeddalu, nʼobutategeera. Ne ntegeera nti na kino nakyo kugoberera mpewo.

¹⁸Kubanga mu magezi amangi mujjiramu okunakuwala kungi; amagezi gye gakoma obungi, nʼokunakuwala gye gukoma.