1Nga ensowera enfu bwe zoonoona akaloosa akawunya obulungi, bwe katyo akasobyo akatono bwe koonoona amagezi nʼekitiibwa.
2Omutima gwʼomuntu owʼamagezi gumukozesa ekituufu, naye ogwʼomusirusiru gumutwala kukola bitasaana.
3Ne bwʼaba ngʼatambula, amanyibwa nga talina magezi, era buli amulaba agamba nti musirusiru.
4Mukama wo bwʼakunyiigiranga, tomulaganga busungu; okuddamu nʼeggonjebwa kukyusa ekiruyi.
5Ekibi ekirala kye nalaba, kye kikwata ku nsobi yʼomufuzi:
6nalaba ngʼabasirusiru baweebwa ebifo ebisava, naye ngʼabagagga bo baweebwa ebyo ebya wansi.
7Ate nalaba ngʼabaddu beebagala embalaasi, songa abalangira batambuza bigere ngʼabaddu.
8Asima ekinnya alikigwamu, nʼoyo amenya ekisenge omusota gulimubojja.
9Oyo ayasa amayinja gamulumya, nʼoyo ayasa enku zimulumya.
10Embazzi bwe tebaako bwogi, nʼetewagalwa, agitemya ateekwa okufuba ennyo, naye obumanyirivu bwe buwangula.
11Omusota bwe guluma nga tegunnakola bya bufuusa, omufuusa talina kyafunamu.
12Ebigambo ebiva mu kamwa kʼomuntu owʼamagezi bya muwendo nnyo eri abo ababiwulira, naye akamwa kʼomusirusiru kamusuula mu ntata.
13Entandikwa yʼebigambo bye nga temuli nsa, ne ku nkomerero yaabyo biba mususa.
14Omusirusiru asavuwaza ebigambo.
14Tewali amanyi birijja, kale ani asobola okumubuulira ebiribaawo oluvannyuma lwe?
15Omusirusiru aterebuka mangu olwʼekitamugendedde bulungi, nʼabulwa nʼekkubo erimutwala mu kibuga.
16Zikusanze gwʼensi kabaka bwʼaba nga yali muddu, nga nʼabalangira bakeera kwetamiirira!
17Olina omukisa gwʼensi kabaka wo bwʼaba nga wa lulyo lulangira, ate nga nʼabalangira bo bamanyi ekiseera ekyʼokuliiramu, olwʼokufuna amaanyi so si lwa kutamiira.
18Obugayaavu buleetera akasolya kʼennyumba okutonnya, nʼemikono egitayagala kukola gireetera ennyumba okutonnya.
19Ekijjulo kikolebwa lwa kusanyuka, ne wayini yeeyagaza obulamu, naye ensimbi yʼesobola byonna.
20Tokolimira kabaka mu mutima gwo newaakubadde okukolimira omugagga mu kisenge kyo, kubanga ennyonyi eyʼomu bbanga eyinza okwetikka ebigambo byo nga biwandiikiddwa ku biwaawaatiro byayo nʼebibatuusaako.