Omubuulizi 12:1-14 LGCB2014 - Bible AI

¹Jjukiranga omutonzi wo mu nnaku ezʼobuvubuka bwo, ngʼennaku embi tezinnakutuukako nʼemyaka nga teginnasembera, mwʼolyogerera nti Sizisanyukira;

²ngʼenjuba nʼobutangaavu, omwezi nʼemmunyeenye nga tebinnafuuka kizikiza; nga nʼebire biweddemu enkuba;

³abakuumi bʼenju mwe balikankanira, nʼabasajja abʼamaanyi mwe bakutamizibwa, nga nʼabo abasa baleseeyo okusa, kubanga batono, nʼabo abalingiza mu butuli nga tebakyalaba;

⁴nga nʼenzigi ezʼolekedde enguudo zigaddwawo, nʼeddoboozi lyʼokusa nga livumbedde; ngʼabasajja bagolokoka olwʼeddoboozi lyʼennyonyi, naye nga ennyimba zaabwe zivumbedde;

⁵nga batya buli kiwanvu nʼakabi akali mu nguudo, ngʼomubira gumulisizza, ngʼenseenene yeewalula era nga tewakyali alimu keetaaga kino oba kiri. Omuntu nʼagenda mu nnyumba ye gyʼalimala ekiseera ekiwanvu nʼabakungubazi ne babuna enguudo.

⁶Jjukira omutonzi wo ngʼomuguwa gwa ffeeza tegunnakutuka oba ebbakuli eya zaabu nga tennayatika, ngʼensuwa tennayatikira ku luzzi obanga ne nnamuziga tennamenyekera ku luzzi,

⁷ngʼenfuufu edda mu ttaka mwe yava, nʼomwoyo ne gudda eri Katonda eyaguwa omuntu.

⁸Obutaliimu! Obutaliimu! Omubuulizi bwʼagamba, “Buli kintu butaliimu.”

⁹Omubuulizi teyali mugezi kyokka, wabula yayigiriza nʼabantu ebyʼamagezi. Yalowooza nʼanoonyereza nʼayiiyaayo engero nnyingi.

¹⁰Omubuulizi yanoonyereza nʼafuna ebigambo ebituufu byennyini, ne bye yawandiika byali byesimbu era nga bya mazima.

¹¹Ebigambo byʼabantu abagezi biri ngʼemiwunda, engero zino ezakuŋŋaanyizibwa omusumba omu ziri ngʼemisumaali egyakomererwa ne ginywezebwa ennyo.

¹²Mwana wange weekuume ekintu kyonna ekyongerwako.

¹²Okuwandiika ebitabo ebingi tekukoma, nʼokuyiga okungi kukooya omubiri.

¹³Kale byonna biwuliddwa; eno yʼenkomerero yaabyo: Tyanga Katonda okwatenga amateeka ge, kubanga ekyo omuntu kyʼagwanira okukola.

¹⁴Kubanga Katonda alisala omusango olwa buli kikolwa; ekyo ekyakwekebwa, nga kirungi oba nga kibi.