Omubuulizi 2:1-26 LGCB2014 - Bible AI

¹Nayogera munda yange nti Jjangu kaakano ngezese okusanyuka: Weesanyuse. Naye laba, na kino kyali butaliimu.

²Nagamba nti Okuseka busirusiru. Era okusanyuka kugasa ki?

³Nanoonyereza nʼomutima gwange, bwe nnaasanyusa omubiri gwange nʼomwenge, nga nkyagoberera okunoonya amagezi. Nayagala okulaba abantu kyebasaanira okukola wansi wʼenjuba mu nnaku ezʼobulamu bwabwe entono.

⁴Natandikawo emirimu egyʼamaanyi: ne neezimbira amayumba ne neesimbira ennimiro ezʼemizabbibu.

⁵Ne neerimira ennimiro, ne neekolera nʼebifo ebigazi, ne nsimbamu buli ngeri ya miti egyʼebibala.

⁶Ne neesimira ebidiba omuva amazzi agʼokufukirira ebibira byʼemiti emito.

⁷Neefunira abaddu abasajja nʼabakazi, era nalina abaddu abaazaalirwa mu nnyumba yange. Ne mbeera nʼamagana gʼente nʼebisibo byʼendiga okusinga bonna abansooka okubeera mu Yerusaalemi.

⁸Ne neekuŋŋaanyiza ffeeza ne zaabu ebyavanga mu misolo, egyampebwanga bakabaka nʼegyavanga mu bwakabaka bwabwe. Neefunira abayimbi abasajja nʼabakazi, ne nfuna nʼebintu byonna ebisanyusa omuntu, ne neefunira nʼabakazi.

⁹Ne nfuuka mukulu ne nsukkirira bonna abansooka mu Yerusaalemi. Mu ebyo byonna nasigala siweebuuse mu magezi.

¹⁰Na buli amaaso gange kye gaayagala okulaba sa kigamma, omutima gwange ne ngusanyusa mu buli kimu. Omutima gwange gwasanyukira bye nakola byonna, era eyo yʼempeera yange olwʼokutegana kwange kwonna.

¹¹Awo bwe nalowooza byonna emikono gyange bye gyakola, nʼokutegana kwonna nga nkola, laba, byonna bwali butaliimu na kugoberera mpewo, tewaali na kimu kye nagobolola wansi wʼenjuba.

¹²Awo ne nkyuka ne ndowooza ku magezi, ne ku ddalu ne ku busirusiru, kubanga oyo aliddirira kabaka mu bigere alibaako ki kyʼakola, okuggyako ekyo kabaka kyʼakoze?

¹³Awo ne ndaba amagezi nga gasinga obusirusiru, nʼekitangaala nga kisinga ekizikiza.

¹⁴Omugezi amaaso ge gali mu mutwe gwe, naye atalina magezi atambulira mu kizikiza. Kyokka ne ntegeera nga bombi akabi kabatuukako.

¹⁵Ne ndyoka njogera mu mutima gwange nti, “Ekyo ekigwa ku musirusiru nange kirintuukako. Kale lwaki mbeera omugezi?” Era na kino ne nkizuula nga butaliimu.

¹⁶Kubanga ku mugezi ne ku musirusiru tewaliwo ajjukirwa lubeerera; mu nnaku ezirijja bombi baliba beerabirwa dda. Okufaanana ngʼomusirusiru nʼomugezi naye alifa.

¹⁷Awo ne nkyawa obulamu kubanga buli ekikolebwa wansi wʼenjuba kindeetera buyinike. Byonna butaliimu na kugoberera mpewo.

¹⁸Nakyawa okutegana kwange kwonna kwe nateganamu wansi wʼenjuba, kubanga byonna ndi wakubirekera oyo alinzirira mu bigere.

¹⁹Kale ani amanyi obanga aliba musajja mugezi oba musirusiru? Kyokka ye yʼaliba mukama wʼebyo byonna bye nateganira nga nkozesa amagezi gange wansi wʼenjuba; era na kino nakyo butaliimu.

²⁰Awo ne nterebuka olwʼokutegana kwange kwonna wansi wʼenjuba.

²¹Kubanga oluusi omuntu ategana ngʼakozesa amagezi ge nʼokumanya awamu nʼobukalabakalaba bwe, naye byonna ateekwa okubirekera oyo atabiteganiranga nako. Na kino nakyo butaliimu na kabi keereere.

²²Omuntu afuna ki mu kutegana kwe kwonna nʼokukaluubirirwa mu ebyo byʼateganamu wansi wʼenjuba?

²³Kubanga ennaku ze zonna nʼokutegana kwe bijjula bulumi; era ne mu kiro omutima gwe teguwummula; na kino nakyo butaliimu.

²⁴Tewali kisingira muntu kulya na kunywa na kusanyukira mu ebyo byʼakola. Na kino nkiraba, kiva mu mukono gwa Katonda,

²⁵kubanga awatali ye, ani ayinza okulya oba asobola okusanyuka?

²⁶Kubanga omuntu asanyusa Katonda, Katonda amuwa amagezi nʼokumanya nʼessanyu; naye omwonoonyi Katonda amuwa omulimu gwʼokukuŋŋaanyiza oyo asanyusa Katonda. Na kino nakyo butaliimu na kugoberera mpewo.