Omubuulizi 3:1-22 LGCB2014 - Bible AI

¹Buli kintu kirina ekiseera kyakyo, na buli ekikolebwa wansi wʼeggulu kirina ekiseera kyakyo.

²Waliwo ekiseera ekyʼokuzaalibwa nʼekiseera ekyʼokufa; ekiseera ekyʼokusimba ate nʼekiseera ekyʼokukungula ebyo ebyasimbibwa;

³ekiseera ekyʼokutta nʼekiseera ekyʼokuwonya; ekiseera ekyʼokumenya nʼekiseera ekyʼokuzimba;

⁴ekiseera ekyʼokukaabiramu nʼekiseera ekyʼokusekeramu; ekiseera ekyʼokukungubaga nʼekiseera ekyʼokuzina;

⁵ekiseera ekyʼokusaasaanyizaamu amayinja, nʼekiseera ekyʼokugakuŋŋaanyizaamu; ekiseera ekyʼokugwiramu mu kifuba nʼekiseera ekyʼokukyewaliramu;

⁶waliwo ekiseera ekyʼokunoonyezaamu nʼekiseera ekyʼokulekeraawo okunoonya; ekiseera ekyʼokukuumiramu ekintu nʼekiseera ekyʼokukisuuliramu;

⁷nʼekiseera ekyʼokuyulizaamu nʼekiseera ekyʼokuddabiririzaamu; ekiseera ekyʼokusirikiramu nʼekiseera ekyʼokwogereramu;

⁸waliwo ekiseera ekyʼokwagaliramu nʼekiseera ekyʼokukyayiramu; ekiseera ekyʼentalo nʼekiseera ekyʼeddembe;

⁹Ddala omuntu kiki kyʼafuna mu kutegana kwe?

¹⁰Ndabye omugugu Katonda gwʼatadde ku bantu.

¹¹Buli kimu yakikola nga kirungi mu kiseera kyakyo. Kyokka newaakubadde nga Katonda yateeka mu mitima gyʼabantu okutegeera obulamu obutaggwaawo, omuntu tayinza kuteebereza mulimu gwa Katonda gwonna, we gutandikira oba we gukoma.

¹²Mmanyi nga tewali kisingira bantu kusanyuka na kukola bulungi nga balamu.

¹³Buli muntu alyoke alye, anywe afune okwesiima olwʼebyo ebiva mu kutegana kwe, kubanga ekyo kirabo kya Katonda.

¹⁴Mmanyi nga buli Katonda kyʼakola kya lubeerera; tekyongerwako, era tewali kikijjibwako. Katonda yakikola bwʼatyo, abantu balyoke bamutye.

¹⁵Ekyo ekiriwo kyʼamala dda okubaawo; nʼekyo ekinaaberawo kyabaawo dda; era Katonda alagira ebyali bibaddewo, ne byongera okubaawo.

¹⁶Ate era nalaba nga wansi wʼenjuba, mu kifo kyʼokusala amazima waliwo kusaliriza; ne mu kifo kyʼobutuukirivu waliwo bwonoonyi.

¹⁷Ne njogera munda yange nti Katonda aliramula abatuukirivu nʼaboonoonyi; kubanga yateekawo ekiseera ekya buli kimu; era na buli mulimu.

¹⁸Ne ndowooza nti Katonda agezesa abaana bʼabantu era bajjukire nti nsolo busolo.

¹⁹Kubanga ekituuka ku baana bʼabantu kye kituuka ne ku nsolo; omuntu afa, nʼensolo nʼefa. Bonna bassa omukka gwe gumu; omuntu talina nkizo ku nsolo. Byonna butaliimu.

²⁰Bonna bagenda mu kifo kye kimu, bonna bava mu nfuufu era mu nfuufu mwe badda.

²¹Ani amanyi obanga omwoyo gwʼomuntu gwambuka waggulu, ogwʼensolo gwo ne gukka mu ttaka?

²²Bwe ntyo nalaba nga tewali kisinga muntu kusanyukira mulimu gwe, kubanga ekyo gwe mugabo gwe. Anti tewali asobola kumukomyawo alabe ebyo ebiribaawo oluvannyuma lwe.