Omubuulizi 6:1-12 LGCB2014 - Bible AI

¹Waliwo ekibi ekirala kye ndabye wansi wʼenjuba era kibuutikidde abantu.

²Katonda awa omuntu obugagga, nʼamuwa ebintu ebingi awamu nʼekitiibwa, na buli mutima gwe kye gwetaaga nʼakifuna; naye Katonda nʼamumma okubisanyukiramu, kyokka omugwira nʼajja nʼabisanyukiramu. Kino butaliimu era kya bubalagaze!

³Omuntu ayinza okuba nʼabaana kikumi, nʼawangaala; bwʼatasanyukira mu bugagga bwe, era nʼataziikwa mu kitiibwa, ne bwʼaba ngʼawangadde nnyo, omwana afiira mu lubuto ngʼagenda okuzaalibwa amusingira wala.

⁴Omwana oyo ajja nga taliiko kyʼamanyi nʼagendera mu butamanya era nʼerinnya lye ne libulira mu butamanya.

⁵Newaakubadde talabye njuba, wadde okubaako kyʼamanya, kyokka awummula bulungi okusinga omusajja oyo:

⁶omusajja oyo ne bwʼawangaala emyaka enkumi bbiri, naye nʼatasanyukira mu bya bugagga bwe. Bombi tebalaga mu kifo kye kimu?

⁷Buli muntu ateganira mumwa gwe, naye tasobola kukkuta byʼalina.

⁸Kale omuntu omugezi asinga oyo omusirusiru: omwavu bwʼamanya okwefuga mu maaso gʼabalala, agasibwa ki?

⁹Amaaso kye galaba kisinga olufulube lwʼebirowoozo. Era na kino nakyo butaliimu, na kugoberera mpewo.

¹⁰Buli ekibaawo kyʼateekebwateekebwa dda, nʼomuntu kyali kyamanyibwa, tewali muntu ayinza kulwana nʼoyo amusinza amaanyi, nʼamusobola.

¹¹Ebigambo gye bikoma obungi, gye bikoma nʼobutabaamu makulu; kale ekyo kigasa kitya omuntu?

¹²Kale ani amanyi ekirungi eri omuntu, mu nnaku ezo entono zʼamala mu bulamu bwe obutaliimu, obuli ngʼekisiikirize? Ani wansi wʼenjuba ayinza okutegeeza ekirimubaako ngʼavudde mu bulamu buno?