Omubuulizi 8:1-17 LGCB2014 - Bible AI

¹Ani afaanana omuntu omugezi amanyi okunnyonnyola buli kintu? Amagezi gaakaayakanyisa obwenyi bwʼomuntu, ne gakyusa emitaafu gyamu.

²Nkugamba nti Gondera ekiragiro kya kabaka, kubanga walayira[2] mu maaso ga Katonda.

³Toyanguyiriza kuva mu maaso ga kabaka. Kyokka ensonga bwʼebanga etali ntuufu, tobanga ku ludda lumuwakanya, kubanga ye akola buli kyʼayagala.

⁴Kubanga ekigambo kya kabaka kisukkuluma byonna; kale ani ayinza okumubuuza nti, “Okolaki ekyo?”

⁵Oyo agondera ekiragiro kye talituukibwako kabi, omutima ogwʼamagezi gulimanya ekiseera ekisaana okukoleramu ekintu gundi, nʼengeri eyʼokukolamu ekintu ekyo.

⁶Kubanga waliwo ekiseera ekituufu nʼenkola esaana ku buli kintu, newaakubadde ngʼobuyinike bwʼomuntu bumuzitoowerera okukamala.

⁷Nga bwe watali muntu amanyi binaabaawo, kale ani ayinza okumutegeeza ebinajja?

⁸Tewali muntu alina buyinza kufuga mpewo; bwe kityo tewali nʼomu alina buyinza ku lunaku lwa kufa kwe. Ngʼomuntu bwʼaweebwa ebiragiro mu biseera ebyʼolutalo, bwe kityo nʼobutali butuukirivu bwe buduumira abo ababutambuliramu.

⁹Ebyo byonna bye nalaba bwe nagezaako okwekenneenya buli kintu ekikolebwa wansi wʼenjuba. Waliwo ekiseera omufuzi buli lwʼabinika baafuga, kyokka nga yeerumya yekka.

¹⁰Ndabye abantu abakozi bʼebibi nga baziikibwa, abo abaawaanibwanga mu kibuga nga bazze mu kifo ekitukuvu. Na kino nakyo butaliimu.

¹¹Omuntu bwʼasalirwa omusango nʼatabonererezebwawo, emitima gyʼababi gijjula kuteekateeka kukola bubi.

¹²Newaakubadde ngʼomuntu omubi azza emisango kikumi, ate nʼawangaala, nkimanyi ngʼabatuukirivu, abo abatya Katonda bijja kubagendera bulungi.

¹³Naye olwokubanga abakozi bʼebibi tebatya Katonda, tebiyinza kubagendera bulungi, era nʼennaku zaabwe zinaayitanga mangu ngʼekisiikirize.

¹⁴Waliwo ekintu ekirala ekiraga obutaliimu ekiri ku nsi: abantu abatuukirivu batukibwako ebyo ebisaanira ababi, ate abatali batuukirivu ne batuukibwako ebyo ebigwanira abatuukirivu. Kino nakyo nkiyita butaliimu.

¹⁵Bwe ntyo nteesa nti omuntu yeyagalire mu bulamu: kubanga wansi wʼenjuba tewali kisinga, wabula omuntu okulya nʼokunywa nʼokweyagala. Kale essanyu linaamuwerekeranga mu mirimu gye, ennaku zonna ezʼobulamu bwe Katonda bwʼamuwadde wansi wʼenjuba.

¹⁶Bwe nanoonyereza amagezi ne neetegereza okutegana kwʼomuntu ku nsi kuno, nga teyeebaka emisana nʼekiro.

¹⁷Ne ndaba ebyo byonna Katonda byʼakoze, nga tewali nʼomu ayinza kutegeera Katonda byʼakola wansi wʼenjuba, omuntu ne bwʼagezaako ennyo okukinoonyereza tayinza kukivumbula. Newaakubadde omuntu omugezi yeefuula nti akimanyi, tayinza kukitegeera.