Omubuulizi 9:1-18 LGCB2014 - Bible AI

¹Awo ne ndowooza ku ebyo, ne nzuula ngʼomutuukirivu nʼomugezi bye bakola biri mu mukono gwa Katonda; naye tewali muntu nʼomu amanyi obanga kwagalibwa oba kukyayibwa bye bimulindiridde.

²Omutuukirivu nʼomwonoonyi, omulungi nʼomubi, omuyonjo nʼomujama, abo abawaayo ssaddaaka nʼabo abatagiwaayo bonna gye bagenda yʼemu.

²Nga bwe kiri eri omuntu omulungi, era bwe kiri nʼeri omwonoonyi; Nga bwe kiri eri abo abalayira, era bwe kiri nʼeri abo abatya okulayira.

³Bonna ekibalindiridde kimu; kano ke kabi akabeera wansi wʼenjuba. Ate emitima gyʼabantu mu bulamu buno giraluse gijjudde ebibi, bayaayaanira buli kimu; nʼoluvannyuma ne bakka emagombe eri bannaabwe.

⁴Naye omuntu omulamu aba nʼessuubi, wadde embwa ennamu esinga empologoma enfu!

⁵Kubanga buli kiramu kimanya nga kya kufa, naye abafu tebaliiko kye bamanyi: tebakyagasa wadde okujjukirwa.

⁶Okwagala kwabwe, nʼobukyayi bwabwe, nʼobuggya bwabwe nga bizikiridde; nga tebakyetaba mu ebyo byonna ebikolebwa wansi wʼenjuba.

⁷Genda olye emmere yo ngʼosanyuka, onywe ne wayini wo nga weeyagala; kubanga Katonda asiimye kyʼokola.

⁸Yambalanga engoye ennyonjo[3], era weesiigenga nʼebyakaloosa.

⁹Ssanyukanga ne mukyala wo gwʼoyagala ennaku zo zonna, mu bulamu buno obutaliimu, Katonda bwʼakuwadde wansi wʼenjuba, kubanga ekyo gwe mugabo gwo mu kutegana kwo kwʼoteganamu wansi wʼenjuba.

¹⁰Buli omukono gwo kye gugenda okukola, kikole nʼamaanyi go gonna; kubanga teri mulimu wadde okulowooza, oba okutegeera wadde amagezi emagombe gyʼolaga.

¹¹Ate nalaba nga wansi wʼenjuba, ngʼowʼembiro ennyingi si yʼawangula mu mpaka, era ne kirimaanyi si yʼawangula olutalo, ngʼate bakalimagezi bonna si be baatiikirira; wabula ngʼomukisa gukwata bukwasi oyo aba aliwo mu kifo ekituufu ne mu kiseera ekituufu.

¹²Kubanga omuntu tamanya kinaamubaako. Ngʼekyenyanja bwe kikwatibwa mu muyonjo, oba ennyonyi nga bwʼegwa ku mutego, nʼabaana bʼomuntu bwe batyo bwe beesanga mu biseera ebya kabi, ebibatuukako nga tebabyetegekedde.

¹³Era ekirala kye nalaba ekyampuniikiriza ennyo kye kino:

¹⁴waaliwo akabuga nga kalimu abantu batono ddala, kabaka owʼamaanyi nʼajja nʼakazingiza nʼakazimbako ekigo ekinene.

¹⁵Mu kabuga ako mwalimu omusajja omugezi, omwavu, ngʼamanyi ekyʼokukola okuwonya akabuga ako, bwʼatyo mu magezi ge ne kanunulwa. Naye nno ne wabulawo amujjukira.

¹⁶Awo ne ndaba nti newaakubadde ngʼamagezi gasinga amaanyi, naye owʼamagezi bwʼaba omwavu, anyoomebwa, ne kyʼayogera tekissibwako mwoyo.

¹⁷Naye ne bwe kiba kityo, ebigambo ebyʼekimpowooze ebiva mu kamwa kʼomugezi bissibwako omwoyo, okusinga okuleekaana kwʼomufuzi wʼabasirusiru.

¹⁸Amagezi gasinga ebyokulwanyisa mu lutalo, naye omwonoonyi omu azikiriza ebirungi bingi.