Tito 1:1-16 LGCB2014 - Bible AI

¹Pawulo omuweereza wa Katonda, era omutume wa Yesu Kristo ngʼokukkiriza kwʼabalonde ba Katonda bwe kuli nʼokutegeera amazima agali mu kutya Katonda,

²ebyesigamye ku kusuubira okwʼobulamu obutaggwaawo, Katonda owʼamazima kwe yasuubiza ngʼebiro ebyʼemirembe nʼemirembe tebinnabaawo,

³naye mu ntuuko zaabyo, yayolesa ekigambo kye mu kubuulira Enjiri, kwe nateresebwa ngʼekiragiro kya Katonda Omulokozi waffe bwe kiri,

⁴eri Tito omwana wange ddala ngʼokukkiriza kwaffe ffenna okwa awamu bwe kuli, nʼekisa nʼemirembe ebiva eri Katonda Kitaffe ne Kristo Yesu omulokozi waffe.

⁵Kyennava nkuleka mu Kuleete, olyoke otereeze ebyo ebyetaaga okutereeza, era otekewo nʼabakadde[1] bʼekkanisa mu buli kibuga, nga bwe nakulagira.

⁶Omuntu ateekwa okuba nga taliiko kya kunenyezebwa, nga musajja alina omukazi omu, era nga nʼabaana baabwe bakkiriza, nga tebalina kibi kiyinza kuboogerwako era nga tebeenyigira mu bikolwa bya buseegu oba mu bujeemu.

⁷Omulabirizi kimugwanira okuba nga taliiko kya kunenyezebwa ngʼomuwanika wa Katonda, nga si mukakanyavu, nga si wa busungu, nga si mutamiivu, nga si mukambwe, nga teyeegomba kufuna magoba mu bukuusa

⁸naye ayaniriza abagenyi, ayagala okukola obulungi, omutegeevu, nga mwenkanya, nga mutukuvu, era ngʼamanyi okwefuga.

⁹Ateekwa okuba omuntu anywerera ku kigambo ekyesigwa, alyoke asobole okunnyonnyola abantu enjigiriza entuufu, nʼokulaga obukyamu bwʼabo abagiwakanya.

¹⁰Kubanga waliwo bangi abawakana, aboogera ebitaliimu era abalimba, nʼokusingira ddala abo abʼomu bakomole.

¹¹Basaanye okusirisibwa, kubanga boonoona buli maka, nga bayigiriza ebitabagwanidde, balyoke beefunire amagoba agʼobukuusa.

¹²Omu ku bo, nnabbi waabwe bo kyeyava agamba nti:

¹²“Abakuleete balimba bulijjo, zʼensolo enkambwe, era ba mululu ate bagayaavu.”

¹³Kye yagamba kya mazima. Noolwekyo oteekwa okubanenya nʼamaanyi kiryoke kibaleetere okukkiriza okutuufu,

¹⁴balekeraawo okuwuliriza enfumo ezʼEkiyudaaya, nʼebiragiro abantu abakyama okuva ku mazima bye bagunja.

¹⁵Eri abalongoofu, ebintu byonna biba birongoofu, naye eri abo abatali balongoofu nʼabatakkiriza, tewaba kirongoofu na kimu. Kubanga amagezi gaabwe nʼebirowoozo byabwe byayonooneka.

¹⁶Bagamba nti Bamanyi Katonda, naye mu bikolwa byabwe bamwegaana. Bagwenyufu era bajeemu, tebasaanira kuweebwa mulimu mulungi nʼakatono.