Tito 2:1-15 LGCB2014 - Bible AI

¹Naye ggwe yogeranga ebyo ebitayawukana na njigiriza entuufu.

²Kubirizanga abasajja abakulu babe bateefu, abassibwamu ekitiibwa, abeegendereza, abajjudde okukkiriza, okwagala nʼokugumiikiriza.

³Abakazi abakulu nabo bakubirize bwʼotyo babe nʼempisa ezisaanira abantu ba Katonda, nga tebawaayiriza, era nga tebatamiira, wabula nga bayigiriza ebirungi,

⁴balyoke basobole okugunjula abakazi abato okwagalanga babbaabwe awamu nʼabaana baabwe.

⁵Era babenga beegendereza, era abalongoofu, era abakola obulungi emirimu mu maka gaabwe, era abawulize eri babbaabwe, ekigambo kya Katonda kiremenga okuvvoolebwa.

⁶Nʼabavubuka bakubirizenga babe beegendereza,

⁷mu bintu byonna, ngʼobeera ekyokulabirako ekirungi mu byonna byʼokola, ngʼoli mwesimbu era assaayo omwoyo mu kuyigiriza kwo.

⁸Buli kyʼoyogera kiteekwa okuba nga tekiriiko kya kunenyezebwa, oyo awakanya alyoke aswale, nga talina kibi kya kukwogerako.

⁹Era kubirizanga abaddu bawulirenga bakama baabwe era babagonderenga mu byonna, nga tebabawakanya,

¹⁰wadde okubabbangako ebyabwe. Wabula babenga beesigwa ddala mu byonna, nga beeyisa bulungi, abantu balyoke bayaayaanire okuyigiriza kwa Katonda Omulokozi waffe mu buli ngeri yonna.

¹¹Kubanga ekisa kya Katonda ekireetera abantu bonna obulokozi kirabise,

¹²era kituyigiriza tuleke obutatya Katonda, nʼokwegomba kwʼensi, tulyoke tube beegendereza, abatuukirivu abatya Katonda nga tuli mu mulembe gwa kaakano;

¹³nga tulindirira olunaku lwe tusuubira, nʼokulabika kwʼekitiibwa kya Katonda omukulu era Omulokozi waffe Yesu Kristo;

¹⁴eyeewaayo ku lwaffe, alyoke atununule mu bujeemu bwaffe bwonna, era yeerongooseza eggwanga eryʼenvuma, erinyiikirira ebikolwa ebirungi.

¹⁵Ebyo byʼobanga oyigiriza abantu. Buuliriranga era nenyanga nʼobuyinza bwonna. Omuntu yenna takunyoomanga.