Yakobo 2:1-26 LGCB2014 - Bible AI

¹Abooluganda, mmwe abakkiririza mu Mukama waffe Yesu Kristo, Mukama owʼekitiibwa, temusosolanga mu bantu.

²Kubanga singa omuntu omu ajja mu kuŋŋaaniro lyammwe, ngʼayambadde engoye ezʼomuwendo omunene, ngʼanaanise nʼempeta eza zaabu ku ngalo ze, mu kiseera kye kimu ne wajjawo nʼomusajja omwavu ngʼali mu ngoye ezisensusesensuse,

³ne mwaniriza omugagga, ne mumugamba nti, “Tuulira wano kyokka ne mugamba omwavu nti Ggwe oyinza okuyimirira wali, oba si ekyo tuula wano wansi wʼakatebe kwe nteeka ebigere byange,”

⁴kale muba temwesosoddeemu mwekka na mwekka nga mukyamizibwa ebirowoozo byammwe ebibi?

⁵Mumpulirize, abooluganda abaagalwa, Katonda teyalonda abo ensi bʼeyita abaavu, okuba abagagga mu kukkiriza, era okuba abasika abʼobwakabaka obwʼomu ggulu, Katonda bwe yasuubiza abo abamwagala?

⁶Naye munyooma omwavu. Abagagga si be babanyigiriza ne babatwala ne mu mbuga zʼamateeka?

⁷Era si be banyoomoola erinnya eddungi lye muyitibwa?

⁸Kiba kirungi nnyo era kya kitiibwa bwe mugondera etteeka eriri mu Kyawandiikibwa erigamba nti, ⓐ “Yagalanga muliraanwa wo nga bwe weeyagala wekka.”

⁹Naye bwe musosola mu bantu muba mukoze kibi, nʼetteeka libasingisa omusango ngʼaboonoonyi.

¹⁰Era omuntu akwata amateeka gonna, naye nʼasobyako erimu, omusango gumusinga mu ngeri yʼemu ngʼoli asobezza amateeka gonna.

¹¹Kubanga Katonda eyagamba nti, ⓑ “Toyendanga”, era yʼomu eyagamba nti, ⓒ “Tottanga”. Noolwekyo singa toyenda, naye nʼotta oba mumenyi wa mateeka gonna.

¹²Noolwekyo mwogere era mukole ngʼamateeka agʼeddembe bwe gali naye nga mumanyi nti tunaatera okulamulwa.

¹³Kubanga abo abatalina kisa, nabo tebalikwatirwa kisa. Ekisa kiwangula omusango.

¹⁴Abooluganda, kibagasa ki okugamba nti Mulina okukkiriza kyokka ngʼokukkiriza kwammwe temukwoleka mu bikolwa? Mulowooza ngʼokukkiriza ngʼokwo kugenda kubalokola?

¹⁵Singa muganda wo oba mwannyoko takyalina kyakwambala wadde ekyokulya,

¹⁶naye omu ku mmwe nʼamugamba nti, “Genda mirembe, obugume, era olye bulungi”, naye nga tamuwaddeeyo byetaago bya mubiri, olwo kimugasa ki?

¹⁷Noolwekyo nʼokukkiriza bwe kutyo; bwe kutabaako bikolwa kuba kufu.

¹⁸Naye omuntu ayinza okugamba nti, “Ggwe olina okukkiriza nange nnina ebikolwa; ndaga okukkiriza kwo okutaliiko bikolwa, nange nkulage ebikolwa byange nga bwe bikakasa okukkiriza kwange.”

¹⁹Okukkiriza obukkiriza nti Waliwo Katonda omu yekka, kirungi. Naye ne baddayimooni nabo bakkiriza nʼokukankana ne bakankana!

²⁰Musirusiru ggwe! Oliyiga ddi ngʼokukkiriza okutaliiko bikolwa tekuliiko kye kugasa?

²¹Jjajjaffe Ibulayimu teyaweebwa obutuukirivu olwʼekikolwa kye yakola, bwe yawaayo omwana we lsaaka, afiire ku kyoto?

²²Mulaba nga Ibulayimu bwe yalina okukkiriza, era okukkiriza kwe ne kutuukirizibwa olwʼebikolwa bye,

²³ⓓ nʼekyawandiikibwa ne kituukirizibwa ekigamba nti, “lbulayimu yakkiriza Katonda, ne kimubalirwa okuba obutuukirivu, era nʼayitibwa mukwano gwa Katonda.”

²⁴Kaakano mutegedde ngʼomuntu asiimibwa Katonda olwʼebyo byʼakola, so si lwa kukkiriza kyokka.

²⁵Ekyokulabirako ekirala kye kya Lakabu, eyali malaaya. Teyaweebwa butuukirivu lwa kikolwa ekyʼokusembeza ababaka, nʼoluvannyuma nʼabasiibulira mu kkubo eddala nga baddayo, okubawonya?

²⁶Ngʼomubiri bwe guba omufu omwoyo bwe gutagubeeramu, nʼokukkiriza bwe kutyo kuba kufu bwe kuteeyolekera mu bikolwa.