Yeremiya 1:1-19 LGCB2014 - Bible AI

¹Ebigambo ebyayogerwa Yeremiya, mutabani wa Kirukiya, owʼoku bakabona abaali mu Anasosi mu nsi ya Benyamini.

²ⓐ Mukama Katonda yayogera naye mu mirembe gya Yosiya, kabaka wa Yuda, mutabani wa Amoni, nga yakafugira emyaka kkumi nʼesatu,

³ⓑ ne mu biro bya Yekoyakimu mutabani wa Yosiya kabaka wa Yuda, okutuusa mu mwezi ogwokutaano, ogwʼomwaka ogwʼekkumi nʼogumu ogwʼobufuzi bwa Zeddekiya mutabani wa Yosiya kabaka wa Yuda, abantu bʼe Yerusaalemi lwe baatwalibwa mu buwaŋŋanguse.

⁴Ekigambo kya Mukama Katonda ne kinzijira, ngʼagamba nti,

⁵“Nakumanya bwe nnali sinnakubumba mu lubuto lwa maama wo; nga tonnava mu lubuto nʼakutukuza. Nakulonda okubeera nnabbi eri amawanga.”

⁶Ne ndyoka ŋŋamba nti, “Laba nno, Mukama Katonda! Simanyi kwogera mu bantu, ndi mwana muto.”

⁷Naye Mukama Katonda nʼaŋŋamba nti, “Toyogera nti, ‘Ndi mwana bwana;’ kubanga yonna gye nnaakutumanga gyʼonoogendanga, era byonna bye nnaakulagiranga byʼonooyogeranga.

⁸Tobatyanga, kubanga nze ndi naawe okukuwonya,” bwʼayogera Mukama Katonda.

⁹Awo Mukama Katonda nʼagolola omukono gwe, nʼakwata ku mimwa gyange, nʼaŋŋamba, nti, “Wuliriza. Nkuwa ebigambo byʼonooyogeranga.

¹⁰Leero nkutaddewo okuba nʼobuyinza ku mawanga era ne ku bwakabaka. Okusimbula nʼokumenya, okuzikiriza nʼokuwamba; okuzimba nʼokusimba.”

¹¹Ekigambo kya Mukama Katonda ate ne kinzijira nga kigamba nti, “Yeremiya kiki ekyo kyʼolaba?”

¹¹Ne ŋŋamba nti, “Ndaba ettabi lyʼomuti ogwʼomulozi.”

¹²Awo Mukama Katonda nʼaŋŋamba nti, “Olabye bulungi, kubanga neetegereza ndabe ngʼekigambo kyange kituukirira.”

¹³Ekigambo kya Mukama Katonda ne kinzijjira nate nti, “Kiki kyʼolaba, kaakano?” Ne ŋŋamba nti, “Ndaba ensuwa eyʼamazzi ageesera, ngʼetunudde waggulu mu bukiikakkono.”

¹⁴Awo Mukama Katonda nʼaŋŋamba nti, “Okuzikirira kujja kubaawo nga kutandikira mu bukiikakkono kutuuke ku bantu bonna abali mu ggwanga.

¹⁵Kubanga laba nnaatera okuyita abantu bonna abʼomu bwakabaka obuli mu bukiikakkono,” bwʼayogera Mukama Katonda.

¹⁵Bakabaka baabwe balyoke bajje bateeke entebe zaabwe ezʼobwakabaka mu miryango egiyingira ekibuga Yerusaalemi, balizinda bbugwe waakyo yenna era bazinde nʼebibuga byonna ebya Yuda.

¹⁶Era ndibonereza abantu bange olwʼebibi byabwe byonna, kubanga banvaako ne booteeza obubaane eri bakatonda abalala, era ne basinza ebibajje bye beekolera nʼemikono gyabwe.

¹⁷“Naye ggwe weetegeke! Yimirira obabuulire byonna bye nkulagira. Tobatya kubanga bwʼonoobatya nzija kubakutiisa.

¹⁸Kubanga leero nze nkufudde ekibuga ekiriko enkomera ezʼamaanyi, era empagi eyʼekyuma, era bbugwe owʼekikomo eri ensi yonna, eri bakabaka ba Yuda, eri abakungu baayo, ne bakabona nʼabantu abʼomu nsi.

¹⁹Balirwana naawe naye tebalikuwangula; kubanga nze ndi wamu naawe okukununula,” bwʼayogera Mukama Katonda.