Yeremiya 10:1-25 LGCB2014 - Bible AI

¹Muwulire ekigambo Katonda kyʼabagamba, mmwe ennyumba ya Isirayiri.

²Bwʼati bwʼayogera Mukama nti,

²“Temugobereranga makubo gʼamawanga oba okweraliikirira obubonero obwʼoku ku ggulu, kubanga amawanga ge byeraliikirira.

³Kubanga empisa ezʼamawanga tezigasa; batema omuti mu kibira, omubazzi nʼaguyooyoota nʼebyuma bye.

⁴Bagunyiriza ne ffeeza ne zaabu, bagukomerera nʼenninga nʼennyondo guleme okunyeenyanyeenya.”

⁴

⁵“ⓠ Bakatonda bafaanana nga ssemufu mu nnimiro yʼebibala, era tebasobola kwogera kubanga basitulwa busitulwa tebasobola kutambula. Tobatya, tebayinza kukukola kabi konna, wadde okukola akalungi nʼakamu.”

⁶Tewali ali nga ggwe, Ayi Mukama Katonda. Oli mukulu, era erinnya lyo lyʼamaanyi nnyo.

⁷ⓡ Ani ataakutye, Ayi Kabaka wʼamawanga? Kubanga kino kye kikugwanira. Kubanga mu bagezigezi bonna bannaggwanga ne mu bwakabaka bwabwe bwonna tewali ali nga ggwe.

⁸Bonna tebalina magezi basirusiru, abo abayigira ku bakatonda ababajje mu miti.

⁹Ffeeza eyaweesebwa eyʼempewere eggyibwa e Talusiisi, ne zaabu eva e Yufazi, ffundi nʼomuweesi wa zaabu bye bakoze byambazibwa engoye eza kaniki ne zʼeffulungu. Gino gyonna mirimu gyʼabasajja abakalabakalaba.

¹⁰Naye Mukama ye Katonda ddala, ye Katonda omulamu, era Kabaka owʼemirembe gyonna. Bwʼasunguwala, ensi ekankana, amawanga tegasobola kugumira busungu bwe.

¹¹ⓢ “Bwʼoti bwʼoba obagamba nti, ‘Bakatonda abataakola ggulu na nsi ba kuzikirira bave ku nsi ne wansi wʼeggulu.’ ”

¹²Mukama yakola ensi nʼamaanyi ge, nʼatonda ebitonde byonna nʼamagezi ge, era okutegeera kwe, kwe kwayanjuluza eggulu.

¹³Bwʼafulumya eddoboozi lye, amazzi agali mu bire gawuluguma, asobozesa ebire okusituka nga biva ku nkomerero yʼensi. Amyansisa eggulu mu nkuba, era nʼaggya empewo mu mawanika ge.

¹⁴Buli muntu talina magezi era taliimu kutegeera; buli muweesi wa zaabu aswala olwʼekifaananyi kyʼakoze. Kubanga ebifaananyi bye ebisaanuuse bulimba, era tebiriimu bulamu.

¹⁵Tebiriiko kye bigasa, ebisaanye okunyoomebwa ebirizikirizibwa nga Mukama azze okusala omusango.

¹⁶Oyo Katonda Omugabo gwa Yakobo tali ngʼebyo, ye Mutonzi wʼebintu byonna, era owa Isirayiri, eggwanga eryʼomugabo gwe, Mukama Katonda owʼEggye lye linnya lye.

¹⁷Mukuŋŋaanye ebyammwe muve mu nsi, mmwe abazingiziddwa.

¹⁸Kubanga bwʼati bwʼayogera Mukama Katonda nti, “Laba nfuumuula abantu mbaggye mu nsi eno, era ndibaleetako ennaku balyoke bawambibwe.”

¹⁸

¹⁹Zinsanze nze olwʼekiwundu kyange ekinnuma ennyo. Naye ate ne ŋŋamba nti, “Eno ndwadde yange, nteekwa okugigumira.”

²⁰Eweema yange eyonooneddwa, era emiguwa gyonna gikutuse, abaana bange bandese, tewakyali. Tewali nʼomu asigaddewo kaakano kuzimba weema yange wadde okuzimba ekigango kyange.

²¹Kubanga abasumba bafuuse ngʼensolo tebakyebuuza ku Mukama. Noolwekyo tebakulaakulana era endiga zaabwe zonna zisaasaanye.

²²Wuliriza! Amawulire gatuuse, waliwo akeegugungo akʼamaanyi okuva mu nsi eyʼomu bukiikakkono, kajja kufuula ebibuga bya Yuda amatongo, ebisulo byʼebibe.

²³Mmanyi Ayi Mukama Katonda ngʼobulamu bwʼomuntu si bubwe, omuntu si yʼaluŋŋamya amakubo ge.

²⁴Nnuŋŋamya, Mukama Katonda naye mu kigera ekisaanidde, si mu busungu bwo, si kulwa ngʼonfuula ekitaliimu.

²⁵ⓣ Yiwa obusungu bwo ku mawanga agatakumanyi, agatakutwala ngʼekikulu, ku bantu abatakoowoola linnya lyo. Kubanga bamazeewo Yakobo, bamuliiridde ddala era ne boonoona ensi ye.