Yeremiya 13:1-27 LGCB2014 - Bible AI

¹Bwʼati Mukama bwe yaŋŋamba nti, “Genda ogule olukoba olwa linena olwesibe mu kiwato kyo, naye tolunnyikanga mu mazzi.”

²Bwe ntyo ne neegulira olukoba, nga Mukama bwe yandagira, ne ndwesiba mu kiwato kyange.

³Awo ekigambo kya Mukama ne kinzijira omulundi ogwokubiri

⁴nti, “Ddira olukoba lwe wagula lwe weesibye mu kiwato kyo ogende ku mabbali gʼomugga Fulaati olukweke eyo mu lwatika lwʼolwazi.”

⁵Bwe ntyo ne ŋŋenda ne ndukweka ku mabbali gʼomugga Fulaati nga Mukama bwe yandagira.

⁶Ennaku nnyingi nga ziyiseewo, ate Mukama nandagira nti, “Genda kaakano ku Fulaati oleete olukoba lwe nakulagira okukwekayo.”

⁷Awo ne ndyoka ŋŋenda ku mugga Fulaati, ne nsimulayo olukoba ne nduggya mu kifo we nnali ndukwese. Naye laba, olukoba lwali lwonoonese, nga terukyalina kye lugasa.

⁸Awo ekigambo kya Mukama ne kinzijira nga kyogera nti,

⁹“Bwʼati bwʼayogera Mukama nti, ‘Bwe ntyo bwe ndikkakkanya okwegulumiza kwa Yuda ne Yerusaalemi.

¹⁰Abantu bano aboonoonyi abagaana okukwata ebigambo byange, abagoberera obujeemu bwʼemitima gyabwe ne bagoberera bakatonda abalala okubaweereza nʼokubasinza, bajja kuba ngʼolukoba olwo olutaliiko kye lugasa.

¹¹Ngʼolukoba bwe lunywerera mu kiwato kyʼomuntu, bwe ntyo bwe nzija okwagala ennyumba ya Isirayiri yonna nʼeya Yuda zinneesibeko,’ bwʼayogera Mukama, ‘balyoke babeere abantu bange, bagulumize erinnya lyange nʼettendo; naye bo ne batawulira.’ ”

¹²“Bagambe bwʼoti nti, ‘Bwʼati bwʼayogera Mukama Katonda wa Isirayiri, buli kita kiba kya kujjuza wayini.’ Nabo balikuddamu nti, ‘Tetumanyi nga buli kita kiba kya kujjuza wayini?’

¹³Olwo olyoke obagambe nti, ‘Bwʼati bwʼayogera Mukama nti, Laba nditamiiza abantu bonna abatuula mu nsi eno, ne bakabaka abatuula ku ntebe ya Dawudi eyʼobwakabaka, ne bakabona, ne bannabbi nʼabantu bonna abʼomu Yerusaalemi.

¹⁴Era buli omu alikoonagana ne munne, abalenzi ne bakitaabwe, bwʼayogera Mukama. Siribalumirwa, wadde okubaleka oba okubakwatirwa ekisa, ndibazikiriza.’”

¹⁵Wuliriza ontegere okutu; toba na malala, Mukama yʼakyogedde.

¹⁶Mukama Katonda wo mugulumize nga tannaleeta kizikiza, nga ebigere byo tebinneesittala ku nsozi ezikutte ekizikiza. Musuubira ekitangaala, naye ajja okukifuulamu ekisiikirize ekyʼokufa akikyuse kibe ekizikiza ekikutte ennyo.

¹⁷Naye bwe mutaafeeyo, emmeeme yange eneekaabira mu kyama olwʼamalala gammwe; amaaso gange gajja kukaaba nnyo nnyini gakulukuse amaziga era ekisibo kya Mukama kijja kuwambibwa.

¹⁸Gamba kabaka era ne namasole nti, “Mukke muve ku ntebe zammwe ezʼobwakabaka, kubanga engule zammwe ezʼebitiibwa zijja kugwa okuva ku mitwe gyammwe.”

¹⁹Ebibuga byʼe Negebu biggaddwawo, tewali nʼomu anaabiggulawo; Yuda yonna yaakutwalibwa mu buwaŋŋanguse, yonna yaakutwalibwa.

²⁰Muyimuse amaaso gammwe mulabe abo abava mu bukiikakkono. Kiruwa ekisibo ekyabaweebwa, endiga ezaabeeyinuzanga?

²¹Muligamba mutya Mukama bwʼalibawaayo okufugibwa abo be mwali mutwala nga abʼomukago? Temulirumwa ngʼomukazi alumwa okuzaala?

²²Era bwe weebuuza nti, “Lwaki kino kintuseeko?” Olwʼebibi byo ebingi engoye zo kyezivudde ziyuzibwa, era omubiri gwo ne gubonerezebwa.

²³Omuwesiyopya ayinza okukyusa olususu lwʼomubiri gwe oba engo okukyusa amabala gaayo? Bwe mutyo bwe mutasobola kukola birungi, mmwe abaamanyiira okukola ebibi.

²⁴Ndibasaasaanya ngʼebisusunku ebifuuyibwa empewo eva mu ddungu.

²⁵Guno gwe mugabo gwo gwe nakupimira, kubanga wanneerabira ne weesiga bakatonda abʼobulimba.

²⁵bwʼayogera Mukama,

²⁶Nze kennyini ndibikkula engoye zammwe ne nzibikka ku mitwe gyammwe, obwereere bwammwe ne bulabika.

²⁷Ndabye obwenzi bwammwe nʼobwamalaaya bwe mukoze. Ndabye ebikolwa byo ebyʼekivve ku busozi era ne mu nnimiro. Zikusanze ggwe, ayi Yerusaalemi! Olituusa ddi obutaba mulongoofu?