Yeremiya 15:1-21 LGCB2014 - Bible AI

¹ⓑ Awo Mukama nʼalyoka aŋŋamba nti, “Musa ne Samwiri ne bwe bandiyimiridde okunneegayirira, sandisonyiye bantu bano. Bagobe okuva mu maaso gange, banviire.

²ⓒ Era bwe bakubuuza nti, ‘Tunaagenda wa?’

²Bagambe nti, ‘Kino Mukama kyagamba nti, Abʼokuttibwa bagenda kuttibwa, nʼabʼekitala bafe ekitala, nʼabʼenjala bafe enjala, nʼabʼokuwambibwa bawambibwe.’ ”

³“Ndiweereza engeri nnya ezʼokubazikiriza,” bwʼayogera Mukama. “Ekitala kya kufumita, embwa zikulule, ebinyonyi ebyʼomu bbanga nʼensolo ezʼomu nsiko zirye nʼokuzikiriza.

⁴ⓓ Era ndibawaayo babeetamwe eruuyi nʼeruuyi mu bwakabaka bwonna obwʼomu nsi olwʼekyo Manase mutabani wa Keezeekiya kabaka wa Yuda kye yakola mu Yerusaalemi.

⁵Ani alikukwatirwa ekisa ggwe Yerusaalemi? Oba ani alikukungubagira? Oba ani alikyama okubuuza ebikufaako?

⁶Mwanneegaana,” bwʼayogera Mukama. “Temutya kudda nnyuma. Noolwekyo mbagololeddeko omukono gwange ne mbazikiriza. Sikyasobola kukukwatirwa kisa.

⁷Era ndibakuŋŋunta nʼakakuŋŋunta mu miryango gyʼebibuga ebyʼomu nsi. Ndizikiriza abantu bange ne mbamalawo kubanga tebaaleka makubo gaabwe.

⁸Bannamwandu beeyongedde obungi okusinga nʼomusenyu gwʼennyanja. Mu ttuntu mbaleetedde omuzikiriza amalewo ababazaalira abalenzi abato. Mbakubiddewo obubalagaze nʼentiisa.

⁹Eyazaala omusanvu ayongobedde, awejjawejja. Enjuba ye egudde nga bukyali misana, amaanyi gamuwedde, ensonyi zimukutte, awuunze, awuubadde. Nʼabo abawonyeewo ndi wa kubasogga ekitala, mu maaso ga balabe baabwe,”

⁹bwayogera Mukama.

¹⁰Zinsanze, mmange lwaki wanzaala omuntu eggwanga lyonna gwe lirwanyisa ne likuluusanya? Siwolanga wadde okweyazika, kyokka buli muntu ankolimira.

¹¹Mukama agamba nti, “Ddala ndikununula olwʼekigendererwa ekirungi, ddala ndireetera abalabe bo okukwegayirira, mu biseera ebyʼokuluma obujiji, mu biseera ebyʼakabi.

¹²Omusajja ayinza okumenya ekikomo oba ekyuma ekyʼomu bukiikakkono?

¹³Ndiwaayo ebyʼobugagga byo nʼebintu byo ebyʼomuwendo ennyo binyagibwe awatali kusasulwa, olwʼebibi byo byonna ebikoleddwa mu ggwanga lyonna.

¹⁴ⓔ Ndibafuula abasibe bʼabalabe bammwe mu ggwanga lye mutamanyi, kubanga obusungu bwange bwakukoleeza omuliro ogunaabookya gubamalewo.”

¹⁵Ayi Mukama ggwe omanyi byonna. Nzijukira ondabirire. Ompalanire eggwanga ku abo abanjigganya. Mu kugumiikiriza kwo okunene tontwala. Lowooza ku ngeri gye mbonyeebonye ku lulwo.

¹⁶Ebigambo byo bwe byanzijira, ne mbirya, byali ssanyu era okujaguza kwʼomutima gwange. Kubanga mpitibwa linnya lyo, Ayi Mukama Katonda owʼEggye.

¹⁷Situulangako mu kuŋŋaaniro lyʼabo abʼebinyumu era sibeerangako mu biduula nabo. Natuulanga nzekka kubanga naliko omukono gwo, era wandeetera okwekyawa.

¹⁸Lwaki okulumwa kwange tekukoma era nʼekiwundu kyange ne kitawona? Onomberera ngʼakagga akalimbalimba ngʼensulo ekalira?

¹⁹Noolwekyo kino Mukama kyʼagamba nti, “Bwe muneenenya, ndibakomyawo musobole okumpeereza; bwe mulyogera ebigambo ebisaana so si ebitasaanidde, mulibeera boogezi bange. Leka abantu bano be baba bajja gyʼoli, so si ggwe okugenda gye bali.

²⁰Ndikufuula ekisenge eri abantu bano, ekisenge ekinywezebbwa ekyʼekikomo. Balikulwanyisa naye tebalikuwangula, kubanga ndi naawe, okukununula, nʼokukulokola,”

²⁰bwʼayogera Mukama.

²¹“Ndikununula okuva mu mukono gwʼabakozi bʼebibi era nʼenkuggya mu mukono gwʼabasajja abakambwe,” bwʼayogera Mukama.