Yeremiya 17:1-27 LGCB2014 - Bible AI

¹“Ekibi kya Yuda kiwandiikiddwa nʼekkalaamu eyʼekyuma nʼejjinja essongovu; kirambiddwa ku mayinja gʼemitima gyabwe ne ku mayembe gʼebyoto byabwe.

²Nʼabaana baabwe basinziza ku byoto bya bakatonda ba Asera ebiri ku buli muti oguyimiridde era ne ku busozi obuwanvu.

³Olusozi lwange oluli mu nsi, obugagga bwammwe nʼebintu byo ebyʼomuwendo byonna, ndibiwaayo byonna binyagibwe nʼebifo byammwe ebigulumivu kwe musaddaakira olwʼekibi ekibunye mu nsi yonna.

⁴Musango gwo ggwe nti olifiirwa ensi gye nakuwa okuba omugabo gwo, ndikufuula muddu wa balabe bo mu nsi gyʼotomanyangako, kubanga mu busungu bwange omuliro gukoleezeddwa ogunaayakanga emirembe gyonna.”

⁵Bwʼati bwʼayogera Mukama nti, Akolimiddwa oyo eyeesiga omuntu era eyeesiga omubiri okuba amaanyi ge, era alina omutima oguva ku Katonda.

⁶Aliba ngʼekisaka mu ddungu, ataliraba birungi bwe birijja, naye alibeera mu biwalakate mu ddungu, ensi eyʼomunnyo omutali abeeramu.

⁶

⁷Naye alina omukisa omusajja oyo eyeesiga Mukama, nga Mukama lyʼessuubi lye.

⁸ⓖ Ali ngʼomuti ogusimbiddwa awali amazzi, ne gulandiza emirandira gyagwo ku mabbali gʼomugga, nga wadde omusana gujja, tegutya nʼamakoola gaagwo tegawotoka, so tegulyeraliikirira mu mwaka ogwʼekyeya era teguliremwa kubala bibala.

⁹Omutima mulimba okusinga ebintu byonna, era gulwadde endwadde etawonyezeka. Ani ayinza okugutegeera?

¹⁰ⓗ Nze Mukama nkebera omutima, ngezesa emmeeme, okuwa buli muntu ngʼamakubo ge bwe gali, ngʼebikolwa bye bwe biri.

¹¹Ngʼenkwale bwʼeyalula amagi geetebiikanga, bwʼatyo bwʼabeera oyo afuna obugagga mu makubo amakyamu; obulamu bwe nga bwakabeerawo kaseera buseera, bulimuggwaako era oluvannyuma alizuulibwa nga musiru.

¹¹

¹²Ekifo kyaffe ekitukuvu, ntebe eyʼekitiibwa eyagulumizibwa okuva ku lubereberye.

¹³Ayi Mukama essuubi lya Isirayiri, bonna abakuvaako baliswala. Abo abakuvaako ne bakuleka baliba ngʼabawandiikiddwa mu nfuufu, kubanga bavudde ku Mukama, oluzzi olwʼamazzi amalamu.

¹⁴Mponya, Ayi Mukama, nange nnaawona, ndokola nange nnaalokoka, kubanga ggwe gwe ntendereza.

¹⁵Tobakkiriza kuŋŋamba nti, “Ekigambo kya Mukama kiri ludda wa? Ka kituukirire nno kaakano!

¹⁶Sirekeddaawo kuba musumba wa ndiga zo, omanyi nga sikusabanga kubaleetako nnaku. Byonna ebiva mu kamwa kange tebikukwekeddwa, obimanyi.

¹⁷Toba wa ntiisa gye ndi, ggwe oli buddukiro bwange mu kiseera ekyʼokulabiramu ennaku.

¹⁸Abo abanjigganya leka baswale, era onkuume nneme kuswala; leka bagwemu ekyekango nze onkuume nneme okwekanga, batuuse ku lunaku olwʼekikangabwa, bazikiririze ddala.”

¹⁹Bwʼati Mukama bwe yaŋŋamba nti, “Genda oyimirire ku mulyango gwʼabantu, bakabaka ba Yuda mwe bayingirira nʼokufuluma; yimirira ne ku nzigi endala eza Yerusaalemi.

²⁰Bagambe nti, ‘Muwulirize ekigambo kya Mukama mmwe bakabaka ba Yuda nʼabantu bonna ababeera mu Yerusaalemi, abayita mu miryango gyʼekibuga.

²¹ⓘ Bwʼati bwʼayogera Mukama nti, Weegendereze oleme kufulumya mugugu gwonna mu nnyumba yo wadde okukola omulimu gwonna ku ssabbiiti, naye mukuume olunaku lwa Ssabbiiti nga lutukuvu nga temulukolerako mulimu gwonna,

²²ⓙ era kuuma olunaku lwa Ssabbiiti nga lutukuvu nga bwe nalagira bajjajjammwe.’

²³Naye tebaawuliriza wadde okukkiriza okunenyezebwa.

²⁴Kyokka bwe muneegendereza ne muŋŋondera, bwʼayogera Mukama, ‘ne mutayisa kintu kyonna kye mwetisse mu miryango gyʼekibuga ku ssabbiiti, naye ne mukuuma olwa Ssabbiiti nga lutukuvu obutakolerako mulimu gwonna,

²⁵olwo bakabaka abatuula ku ntebe ya Dawudi bajja kuyita mu miryango gyʼekibuga nʼabakungu baabwe. Bo nʼabakungu baabwe baakujja ngʼabamu bavuga amagaali abalala nga beebagadde embalaasi, nga bawerekeddwako abasajja ba Yuda nʼabo abali mu Yerusaalemi era ekibuga kino kiribeerwamu emirembe gyonna.

²⁶Abantu balijja okuva mu bibuga bya Yuda ne mu byalo ebiriraanye Yerusaalemi, okuva mu bitundu bya Benyamini ne mu biwonvu ne mu nsozi zʼebugwanjuba, nʼokuva mu nsi eyʼensozi eyʼe Negevu, nga baleeta ebiweebwayo ebyokebwa, ne ssaddaaka, ebiweebwayo ebyʼempeke, nʼobubaane era nʼebiweebwayo ebyʼokwebaza mu nnyumba ya Mukama.

²⁷Naye bwe mutaŋŋondere kukuuma lunaku lwa Ssabbiiti nga lutukuvu ne mwetikkirako emigugu gyammwe nga mufuluma mu nguudo za Yerusaalemi ku lunaku olwa Ssabbiiti, ndikoleeza omuliro ogutazikira mu miryango gya Yerusaalemi oguliyokya ebigo byakyo.’ ”