Yeremiya 18:1-23 LGCB2014 - Bible AI

¹Kino kyʼekigambo ekyajjira Yeremiya ekyava eri Mukama nti,

²“Serengeta mu nnyumba yʼomubumbi nkuweere eyo obubaka bwange.”

³Awo ne nserengeta eri ennyumba yʼomubumbi ne mmulaba ngʼakolera emirimu gye ku nnamuziga.

⁴Naye ekintu kye yali abumba kyali kyonoonekedde mu ngalo ze, omubumbi kyeyava akibumbamu ekintu ekirala ngʼakibumba nga bwe yasiima.

⁵Awo ekigambo kya Mukama ne kinzijira nga kigamba nti,

⁶“Gwe ennyumba ya Isirayiri, siyinza nze kubakola ngʼomubumbi ono bwʼakoze?” bwʼayogera Mukama. “Okufaanana ngʼebbumba mu mukono gwʼomubumbi, bwe mutyo bwe muli mu ngalo zange, ggwe ennyumba ya Isirayiri.

⁷Ekiseera kyonna bwe nnangirira nti eggwanga oba obwakabaka bwa kusiguukululwa, okumenyebwa era nʼokuzikirizibwa,

⁸era singa eggwanga lye nalabula lyenenya ebibi byalyo, olwo ndyejjusa ne sibatuusaako kabi ke nnali ŋŋambye okubakola.

⁹Era ekiseera kyonna nnangirira ebikwata ku ggwanga oba obwakabaka nti ndizimba era ndisimba,

¹⁰era bwe likola ebibi mu maaso gange, ne litaŋŋondera, ndyejjusa obulungi bwe nagamba okubakolera.”

¹¹“Noolwekyo gamba abantu ba Yuda nʼabo ababeera mu Yerusaalemi nti, ‘Kino Mukama kyʼayogera nti, Laba ntekateeka okubatuusaako ekikangabwa era nteesezza okubakola akabi. Kale muve mu makubo gammwe amabi, buli omu ku mmwe, mukyuse enneeyisa yammwe nʼebikolwa byammwe.’

¹²Naye ne boogera nti, ‘Tekirina kye kigasa. Tujja kugenda mu maaso ne ntegeka yaffe; buli omu ku ffe anaakolanga ngʼobukakanyavu bwʼomutima gwe bwe buli.’ ”

¹³Noolwekyo bwʼati Mukama ngʼagamba nti, “Mwebuuzeeko mu mawanga. Ani eyali awuliddeko ekintu bwe kiti? Muwala wange Isirayiri akoze ekintu ekyʼekivve.

¹⁴Omuzira oguli ku Lebanooni gwali guwedde ku njazi zaakwo? Amazzi gaakwo amannyogovu agava ewala gaali galeseeyoko okukulukuta?

¹⁵Naye ate abantu bange banneerabidde, banyookezza obubaane eri bakatonda abalala, abaleetera okwesittala mu makubo gaabwe era ne mu makubo agʼedda era ne balaga mu bukubokubo.

¹⁶Ensi yaabwe ya kusigala matongo, ekintu ekyʼokusekererwa emirembe gyonna, abo bonna abayise balyewuunya era ne banyeenya emitwe gyabwe.

¹⁷Ndibasaasaanya mu maaso gʼabalabe baabwe ngʼempewo eva ebuvanjuba; ndibalaga mabega so si maaso gange ku lunaku olwʼokulabirako ennaku.”

¹⁸Awo ne balyoka bagamba nti, “Mujje tubeeko kye tukola Yeremiya. Kubanga bakabona weebali banaatutegeezanga amateeka, nʼamagezi tunaagafunanga ku bagezi, era nʼebyobunnabbi binaavanga mu bannabbi. Kaakano mujje tumulumbe tumuwakanye era tuleme okussaayo omwoyo ku bigambo bye.”

¹⁹Ompulirize, Ayi Mukama, owulirize abampakanya kye bagamba.

²⁰Ebikolwa ebirungi binaasasulwanga na bikolwa ebibi? Bansimidde obunnya. Ojjukire nga nayimirira mu maaso go ne nkaaba ku lwabwe, nga nsaba olekeraawo okubasunguwalira.

²¹Noolwekyo abaana baabwe baleke bafe enjala, obaweeyo battibwe nʼekitala. Leka bakazi baabwe bafuuke bagumba era babe bannamwandu; abasajja baabwe battibwe; abavubuka baabwe batirimbulwe nʼekitala mu lutalo.

²²Leka okukaaba kuwulirwe nga kuva mu nnyumba zaabwe, bwe banaalumbibwa ne bazindibwa embagirawo, kubanga bansimidde ekinnya bankwate era bateze ebigere byange emitego.

²³Naye Ayi Mukama, gwʼomanyi byonna, bye bateesa banzite. Tobasonyiwa byonoono byabwe wadde okusangulawo ebibi byabwe mu maaso go. Obawangulire ddala, era obabonereze mu kiseera kyʼobusungu bwo.