Yeremiya 2:1-37 LGCB2014 - Bible AI

¹Ekigambo kya Mukama Katonda ne kinzijira nga kigamba nti,

²Genda olangirire nga Yerusaalemi ewulira nti, Bwʼati bwʼayogera Mukama Katonda nti,

²“Nzijukira okwewaayo kwe weewaayo ngʼokyali muto, engeri gye wanjagalamu nga twakafumbiriganwa, wangoberera mu ddungu mu nsi etali nnime.

³Isirayiri wali mutukuvu wa Mukama, ebibala ebibereberye ebyamakungula ge; bonna abaakulyangako nga bazzizza omusango, akabi nga kabatuukako,”

³bwʼayogera Mukama Katonda.

⁴Muwulirize ekigambo kya Mukama mwe ezzadde lya Yakobo, era nʼabʼenju zonna ezʼebika ebyʼomu Isirayiri.

⁵Bwʼati bwʼayogera Mukama nti, Kibi ki bakitammwe kye bansangamu ne banvaako ne bagenda ewala ennyo bwe batyo? Baagoberera ebifaananyi bya bakatonda abakole nʼemikono ebitaliimu nabo bennyini ne bafuuka ebitaliimu.

⁶Ne batagamba nako nti; “Ali ludda wa Mukama eyatuggya mu nsi yʼe Misiri; eyatuyisa mu lukoola, mu nsi eyʼamalungu nʼobunnya, mu nsi enkalu nʼekisiikirize ekyʼokufa, mu nsi omutali muntu nʼomu, so nʼomuntu yenna mwʼatayinza kuyita?”

⁷Ne mbaleeta mu nsi engimu, mulye ebibala byamu nʼebintu ebirungi. Naye bwe mwajja ne mwonoona ensi yange, ne mufuula omugabo gwange ekivume.

⁸Bakabona ne batabuuzaako nti, “Mukama ali ludda wa?” Abo abakola ku mateeka tebammanya. Abakulembeze ne banjeemera. Bannabbi nga baweereza ku lwa Baali, ne bagoberera ebitagasa.

⁹“Kyenva nnyongera okubalumiriza,” “Era ndirumiriza nʼabaana bʼabaana bammwe.

⁹bwʼayogera Mukama,

¹⁰Muwunguke ennyanja mugende ku bizinga bya Kittimu mulabe; era mutume e Kedali, mwetegereze. Mujja kulaba nga tekibangawo.

¹¹Waali wabaddewo eggwanga erikyusa bakatonda baalyo, wadde nga si bakatonda, naye nga bitaliimu? Naye abantu bange baawaanyisa ekitiibwa kyabwe nʼebitagasa.

¹²Wewuunye ggwe eggulu, era okankane nʼentiisa eyʼamaanyi,”

¹²bwʼayogera Mukama.

¹³“Kubanga abantu bange bakoze ebibi bibiri, banvuddeko nze ensulo eyʼamazzi amalamu ne beesimira ettanka ezʼomu ttaka, ettanka ezʼomu ttaka ezirimu enjatika ezitanyweeramu mazzi.”

¹⁴“Isirayiri muddu, omuddu omuzaale? Kale lwaki afuuse omuyiggo?

¹⁵Bamuwulugumirako ngʼempologoma bwʼewuluguma, abalabe bawulugumye nnyo. Ensi ye efuuse matongo, ebibuga bye bigyiridde ddala omuliro birekeddwa ttayo, nga temukyali muntu nʼomu.

¹⁶Ate era abasajja bʼe Noofu nʼe Tapenesi bamaliddewo ddala ekitiibwa kyo.

¹⁷Si ggwe weeretedde bino ngʼova ku Mukama Katonda wo, eyakukulemberanga akulage ekkubo?

¹⁸Kaakano olowooza onooganyulwamu ki okugenda okukolagana ne Misiri? Olowooza kiki kyʼonoganyulwa bwʼonogenda okukolagana ne Bwasuli?

¹⁹Ebibi byo byennyini bye biri kubonereza, nʼokudda kwo emabega kwe kulikusalira omusango. Kale lowooza era otegeere nga bwe kiri ekibi era ekyʼomutawaana gyʼoli bwʼova ku Mukama Katonda wo, nʼoba nga tokyantya,”

¹⁹bwʼayogera Mukama, Katonda owʼeggye.

²⁰Mukama owʼeggye agamba nti, “Isirayiri, ebbanga ddene eriyiseewo bukya weggya mu buyinza bwange, nʼogamba nti, ‘Sijja kukugondera.’ Era ddala, ku buli kasozi era na buli wansi wʼomuti oguyimiridde wakuba obwamalaaya ngʼovuunamira bakatonda abalala.

²¹Songa nnali nkusimbye ngʼoli muzabbibu omulungi, ensigo eteriimu kikyamu nʼakatono, naye ate lwaki oyonoonese nʼofuuka ngʼomuzabbibu ogwʼomu nsiko?

²²Kubanga ne bwʼonaaba nʼoluvu nʼokozesa ne sabbuuni omungi, naye era ebbala lyo nʼobutali butuukirivu bwo bisigala bikyalabika,”

²²bwʼayogera Mukama Katonda.

²³Oyinza otya okugamba nti, “Sseeyonoonanga, sigobereranga ba Baali?” Jjukira bwe weeyisa ngʼoli mu kiwonvu; tegeere kye wakola. Oli ngʼeŋŋamira enkazi efuumuuka embiro ngeraga eno nʼeri,

²⁴ngʼendogoyi eyʼomu nsiko eddukira mu ddungu mwʼemanyidde, ngʼewunyiriza mu bbanga eno nʼeri mu kwaka kwayo, mu kiseera ekyo ani ayinza okugiziyiza? Ensajja zonna ezigyetaaga tezeetaaga kwekooya; mu biseera byʼokulabaganiramu za kugifuna.

²⁵Tokooya bigere byo, era tokaza mimiro gyo. Naye nʼoddamu nti, “Ebyo bya bwereere, sisobola kukyuka, nayagala bakatonda abalala, nteekwa okubanoonya.”

²⁶Ngʼomubbi bwʼaswala ngʼakwatiddwa, nʼennyumba ya Isirayiri bwʼeswala bwʼetyo, bakabaka baayo, nʼabalangira baayo, ne bakabona baayo, era ne bannabbi baayo,

²⁷nga bagamba emiti nti, “Ggwe kitange,” era nʼejjinja nti, “Ggwe wanzaala.” Bankubye amabega, naye bwe balaba ennaku bankaabirira nti, “Yimuka ojje otulokole.”

²⁸Kale bakatonda be weekolera baluwa? Leka bajje, bwe baba basobola okukulokola mu biseera ebyʼemitawaana. Kubanga obungi bwa bakatonda bammwe bwenkanankana nʼebibuga byo ggwe Yuda.

²⁹“Lwaki munneemulugunyiza? Mwenna mwanneeddiimira,”

²⁹bwʼayogera Mukama.

³⁰Abaana bammwe nababonereza naye nga bwerere, tebakkiriza kugololwa. Mmwe bennyini ne mwettira bannabbi bammwe ngʼempologoma bwʼetta.

³¹Mmwe abʼomulembe guno muwulirize ekigambo kya Katonda. Mbadde nga ddungu gye muli ngʼensi ejjudde ekizikiza ekyʼamaanyi? Kale lwaki abantu bange bagamba nti, “Tulina eddembe, tetukyadda gyʼoli?”

³²Omuwala omuto ayinza okwerabira ebikomo, oba omugole okwerabira ekyambalo kye? Naye ngʼate abantu bange Bannerabidde!

³³Ngʼomanyi nnyo okukuba amakubo agʼokunoonya abanaakwagala! Nʼasembayo okuba omukugu mu bamalaaya aba alina kuyigira ku ggwe.

³⁴Engoye zo zijjudde omusaayi gwʼabaavu nʼabatalina musango, awatali kugamba nti bakwatibwa nga babba. Ate nga wadde byonna biri bwe bityo

³⁵ogamba nti, “Sirina musango, ddala takyanninako busungu!” Laba, ŋŋenda kukusalira omusango olwʼokugamba nti, “Sirina kibi kye nkoze.”

³⁶Lwaki ogenda ngʼokyusakyusa amakubo go! Misiri ejja kukuswaza nga Bwasuli bwe yakuswaza.

³⁷Era nʼeyo olivaayo ngʼemikono ogyetisse ku mutwe, kubanga Mukama agaanye abo be weesiga; tagenda kukuyamba.