Yeremiya 20:1-18 LGCB2014 - Bible AI

¹Awo Pasukuli eyali kabona mutabani wa Immeri, eyali omukulu mu yeekaalu ya Mukama, yawulira nga Yeremiya awa obubaka buno,

²nʼalagira Yeremiya akubibwe. Nʼasibibwa mu nvuba eyali mu mulyango ogwʼekyengulu ogwa Benyamini ku yeekaalu ya Mukama.

³Olunaku olwaddirira, nga Pasukuli amusumuludde mu nvuba, Yeremiya nʼamugamba nti, “Mukama takyakuyita Pasukuli, naye Magolumissabibu.

⁴Kubanga bwʼati bwʼayogera Mukama nti, ‘Laba, ndikufuula ekyʼentiisa, ekikangabwa, eri ggwe nʼeri mikwano gyo bonna; era balifa ekitala kyʼabalabe baabwe, nʼamaaso go galikiraba, era Yuda yonna ndigiwaayo mu mukono gwa kabaka wʼe Babulooni, alibatwala e Babulooni oba okubattisa ekitala.

⁵Era ndigabula obugagga bwʼekibuga kino bwonna obulimu, nʼebyʼomuwendo omungi era nʼebyʼobugagga byonna ebya bakabaka ba Yuda mu mukono gwʼabalabe baabwe. Balibutwala babwetikke ngʼomunyago mu Babulooni.

⁶Era ggwe Pasukuli, era nʼabo bonna abʼomu nnyumba yo balitwalibwa mu busibe, e Babulooni. Eyo gyʼolifiira era oziikibwe, ggwe ne mikwano gyo bonna bʼotegeezezza obunnabbi obwʼobulimba.’ ”

⁷Ayi Mukama, wannimba era nʼennimbibwa, wansinza amaanyi nʼompangula. Nvumibwa okuva ku makya okuzibya obudde, buli muntu ankudaalira.

⁸Buli lwe njogera, ndeekaana ne nnangirira akatabanguko nʼokuzikirira. Kale ekigambo kya Mukama kindeetera kuvumwa na kusekererwa buli lunaku.

⁹Naye bwe ŋŋamba nti, “Sijja kumwogerako oba okweyongera okwogera mu linnya lye,” ekigambo kye mu mutima gwange kiri ngʼomuliro ogwaka, ogukwekeddwa mu magumba gange. Nkooye okukizibiikiriza era ddala sisobola.

¹⁰Mpulira bangi nga beegeya nti, “Akabi kali enjuuyi zonna. Mumuloope. Leka naffe tumuloope.” Mikwano gyange bonna banninda ngwe, nga bagamba nti, “Oboolyawo anaasobya, tumugweko tuwoolere eggwanga.”

¹¹Naye Mukama ali nange ngʼomulwanyi owʼamaanyi owʼentiisa, kale abanjigganya kyebaliva bagwa ne bataddayo kuyimirira. Baakulemererwa era baswalire ddala nʼokuswala kwabwe tekulyerabirwa emirembe gyonna.

¹²Ayi Mukama Katonda owʼEggye oyo agezesa abatuukirivu, alaba ebiri munda mu mitima era nʼebirowoozo, kale leka ndabe bwʼobawoolererako eggwanga, kubanga ensonga zange nzitadde mu mikono gyo.

¹²

¹³Muyimbire Mukama Katonda. Mumuwe ettendo. Kubanga awonyezza obulamu bwʼomunaku mu mikono gyʼabo abakozi bʼebibi.

¹⁴ⓜ Lukolimirwe olunaku kwe nazaalirwa! Olunaku mmange kwe yanzaalira luleme kuweebwa mukisa!

¹⁵Akolimirwe eyaleetera kitange amawulire, agaamusanyusa ennyo, ngʼagamba nti, “Omwana omulenzi akuzaaliddwa.”

¹⁶Omusajja oyo abeere ngʼebibuga Mukama bye yamenyaamenya awatali kusaasira kwonna. Okukaaba kuwulirwe ku makya, ne nduulu zʼabalwanyi mu ttuntu.

¹⁷Yandinzitidde mu lubuto lwa mmange. Mmange yandibadde entaana yange, olubuto lwe ne luba lunene emirembe gyonna.

¹⁸Lwaki nava mu lubuto okulaba emitawaana nʼobuyinike era ennaku zange ne nzimala mu buswavu?