Yeremiya 21:1-14 LGCB2014 - Bible AI

¹Kino kye kigambo ekyajja eri Yeremiya okuva eri Mukama, kabaka Zeddekiya bwe yamutumira Pasukuli mutabani wa Malukiya ne Zeffaniya kabona mutabani wa Maaseya okumugamba nti,

²ⓝ “Tubuulize kaakano ku Mukama kubanga Nebukadduneeza kabaka wʼe Babulooni atulumbye. Oboolyawo Mukama anatukolera ekyamagero ngʼedda, Nebukadduneeza nʼatuleka.”

³Naye Yeremiya nʼabaddamu nti, “Mugambe Zeddekiya nti,

⁴‘Bwʼati bwʼayogera Mukama Katonda wa Isirayiri nti, Nnaatera okuboolekeza ebyokulwanyisa byammwe ebiri mu mikono gyammwe bye mukozesa okulwanyisa kabaka wʼe Babulooni nʼAbakaludaaya ababazinze ne beetooloola ebweru wa bbugwe wʼekibuga kyammwe. Nzija kubakuŋŋaanyiza munda mu kibuga kino.

⁵Nze kennyini nzija kubalwanyisa nʼomukono gwange ogwʼamaanyi, ogugoloddwa mu busungu, nʼekiruyi nʼobukambwe obungi.

⁶Era ndittisa kawumpuli omubi, abantu awamu nʼensolo, mu kibuga kino.

⁷Oluvannyuma lwʼekyo, nnaawaayo Zeddekiya kabaka wa Yuda, nʼabakungu be nʼabantu bonna mu kibuga kino abanaaba bawonye kawumpuli, ekitala nʼenjala ebya Nebukadduneeza kabaka wʼe Babulooni nʼabalabe baabwe ababanoonya okubatta. Nebukadduneeza anaabatta nʼekitala, taabalage kisa nʼakatono wadde okubasaasira oba okubasonyiwa.’

⁸“Era abantu bagambe nti, ‘Bwʼati Mukama bwʼayogera nti: Laba mbateereddewo ekkubo eryʼobulamu era nʼekkubo eryʼokufa.

⁹Buli anaasigala mu kibuga kino ajja kufa ekitala, oba enjala oba kawumpuli. Naye buli afuluma ne yeewaayo eri Abakaludaaya ababazingizza, ajja kuba mulamu, era anaawonya obulamu bwe.

¹⁰Mmaliridde okuleetera ekibuga kino akabi so si mirembe, bwʼayogera Mukama. Kijja kuweebwayo mu mikono gya kabaka wʼe Babulooni, era ajja kukizikiriza nʼomuliro.’

¹¹“Nʼekirala gamba ennyumba ya Yuda eyʼobwakabaka nti, ‘Wulira ekigambo kya Mukama;

¹²Ggwe ennyumba ya Dawudi,

¹²kino Mukama kyʼagamba: Musale emisango mu bwenkanya, mununule ababa banyagiddwa ababanyigiriza, obusungu bwange buleme kuvaayo bubookye ngʼomuliro olwʼekibi kye mukoze, nga tewakyali nʼomu abuziyiza.

¹³Laba nkugguddeko olutalo, ggwe Yerusaalemi abeera waggulu wʼekiwonvu, ku lusozi olwagaagavu olwʼekyaziyazi, mmwe abagamba nti, “Ani ayinza okutulumba? Ani ayinza okuyingira mu nnyumba zaffe?”

¹³bwʼayogera Mukama,

¹⁴Nzija kubabonereza ngʼebikolwa byammwe bwe biri, era ndikoleeza omuliro mu kibira kyammwe, gwokye byonna ebikyetoolodde,’ ”

¹⁴bwʼayogera Mukama.