Yeremiya 22:1-30 LGCB2014 - Bible AI

¹Bwʼati bwʼayogera Mukama nti, “Serengeta ogende mu lubiri lwa kabaka wa Yuda

²olangirire obubaka buno nti, Wulira ekigambo kya Katonda ggwe kabaka wa Yuda, ggwʼatuula ku ntebe ya Dawudi, mmwe abakungu nʼabantu bammwe abayita mu miryango gino.

³Bwʼati bwʼayogera Mukama nti, Musale emisango egyʼensonga, mukole ebituufu. Anyagiddwako ebibye mu muggye mu mukono gwʼoyo amujooga. Temukola kibi oba ebyʼobukambwe eri omugwira, newaakubadde atalina kitaawe, newaakubadde nnamwandu so temuyiwa musaayi gwʼabantu abataliiko musango mu kifo kino.

⁴Kubanga bwe muneegendereza ne mukuuma ebiragiro bino, olwo bakabaka abatuula ku ntebe ya Dawudi baliyita mu miryango gyʼolubiri luno nga batudde mu magaali gaabwe nʼabo abeebagadde embalaasi nga bawerekerwako nʼabakungu baabwe, nʼabantu baabwe.

⁵ⓞ ‘Naye bwe mutaagondere biragiro bino, nneelayirira ku lwange nti Ekifo kino kijja kufuuka matongo,’ bwʼayogera Mukama.”

⁶Kubanga kino Mukama kyʼagamba ku lubiri lwa kabaka wa Yuda nti, “Newaakubadde ngʼoli nga Gireyaadi gye ndi, ngʼentikko yʼolusozi Lebanooni, ddala ddala nzija kukufuula ddungu, ngʼebibuga ebitaliimu bantu.

⁷Ndikusindikira abakuzikiriza, buli musajja nʼebyokulwanyisa bye, era balitema emivule gyo egisinga obulungi ne bagisuula mu muliro.

⁸“Abantu abava mu mawanga amangi baliyita ku kibuga kino nga beebuuzaganya bokka ne bokka nti, ‘Lwaki Mukama yakola ekintu ekifaanana bwe kiti ku kibuga kino ekikulu bwe kiti?’

⁹Era ekyʼokuddamu kibeere nti, ‘Kubanga beerabira endagaano ya Mukama Katonda waabwe ne basinza era ne baweereza bakatonda abalala.’ ”

¹⁰Temukaabira kabaka afudde oba okumukungubagira, wabula mukaabire nnyo oyo omuwaŋŋanguse, kubanga taliddayo kulaba nsi ye nate.

¹¹Kubanga kino Mukama kyʼagamba ku Sallumu mutabani wa Yosiya kabaka wa Yuda eyasikira Yosiya nʼafuuka kabaka wa Yuda naye nʼatwalibwa. “Talidda.

¹²Alifiira eyo gye baamutwala nga musibe, taliraba nsi eno nate.”

¹³Zimusanze oyo azimba olubiri ku butali butuukirivu, ebisenge bye ebya waggulu ku butali bwenkanya abantu bʼensi ye nʼabakozeseza bwereere nʼatabasasula mpeera yaabwe.

¹⁴Agamba nti, “Nzija kwezimbira olubiri olunene nʼebisenge ebya waggulu ebigazi ennyo.” “Kale nnaakola amadirisa amanene nnaateekamu emivule era nnaasiigako langi emyufu.”

¹⁴

¹⁵Okweyongerayongera emivule emingi kikufuula kabaka? Kitaawo teyalina byakulya na byakunywa? Yakola ebituufu ebyʼobwenkanya. Noolwekyo byonna byamugendera bulungi.

¹⁶Yalwanirira abaavu nʼabali mu bwetaavu kale byonna ne bimugendera bulungi. Ekyo si kye kitegeeza okummanya? bwʼayogera Mukama.

¹⁷“Naye amaaso gammwe nʼemitima gyammwe biri ku magoba agʼobukuusa, ne ku kuyiwa omusaayi ogutaliiko musango ne ku kunyigiriza ne ku kunyaga.”

¹⁸ⓟ Noolwekyo kino Mukama kyʼayogera ku Yekoyakimu omwana wa Yosiya kabaka wa Yuda nti, “Tebalimukungubagira; ‘Kikafuuwe, mukama wange!’ Kikafuuwe, obugagga bwe!

¹⁹Aliziikibwa nga bwe baziika endogoyi, akululwe asuulibwe ebweru wʼenzigi za Yerusaalemi.”

¹⁹

²⁰“Genda mu Lebanooni okaabe, leka eddoboozi lyo liwulirwe mu Basani. Kaabira ku Abalimu, kubanga bonna ababadde ku ludda lwo bazikiridde.

²¹Nayogera gyʼoli ngʼokyali mu biseera byo ebyʼobugagga naye nʼogamba nti, ‘Sijja kuwuliriza!’ Bwʼoti bwʼobadde okuva mu buto bwo, togonderanga ku ddoboozi lyange.

²²Empewo erikunguzza abalunzi bʼebisibo byo bonna, nʼabawagizi bo batwalibwe mu buwaŋŋanguse. Olwo okwatibwe ensonyi oggweemu amaanyi olwʼebibi byo byonna.

²³ⓠ Mmwe abali mu Lebanooni,[1] abesulira mu bizimbe ebyʼemivule, nga mulikaaba, ngʼobulumi bubajjidde! Okulumwa ngʼokwʼomukazi alumwa okuzaala.”

²⁴“Ddala ddala nga bwe ndi omulamu, wadde ggwe Koniya omwana wa Yekoyakimu, singa wali mpeta eyʼobuyinza ku mukono gwange ogwa ddyo, nandikusiseeko,” bwʼayogera Mukama.

²⁵Ndikuwaayo eri abo abanoonya obulamu bwo, abo bootya, Nebukadduneeza kabaka wʼe Babulooni era nʼeri Abakaludaaya.

²⁶Ndikusuula mu nsi endala gye mutaazaalibwa, ggwe ne maama wo eyakuzaala, era eyo mwembi gye mulifiira.

²⁷Temulidda mu nsi gye mwegomba okuddamu.

²⁸Omusajja ono Koniya kintu ekinyoomebwa, ekimenyese, ekitaliiko ayagala? Lwaki ye nʼabaana be balikanyugibwa ebweru, basuulibwe mu nsi gye batamanyi?

²⁹Ayi ggwe ensi, ensi, wulira ekigambo kya Katonda!

³⁰Bwʼati bwʼayogera Mukama nti, “Omusajja ono mumubale ngʼatazaalangako kubanga tewali ku baana be alikulaakulana, alituula ku ntebe ya Dawudi oba aliddayo okufuga mu Yuda.”