Yeremiya 23:1-40 LGCB2014 - Bible AI

¹“Zibasanze abasumba abazikiriza era abasaasaanya endiga zʼekisibo kyange!” bwʼayogera Mukama.

²Noolwekyo, bwʼati bwʼayogera Mukama, Katonda wa Isirayiri ebikwata ku basumba abalabirira abantu bange nti, “Kubanga musaasaanyizza abantu bange ne mubagoba ne mutabalabirira, nzija kubaleetako ebibonerezo olwʼebibi bye mukoze,” bwʼayogera Mukama.

³“Nze kennyini nzija kukuŋŋaanya abaasigalawo ku kisibo kyange okuva mu mawanga gonna gye nabagobera, mbakomyewo mu kisibo kyabwe, gye banaabalira ebibala beeyongere obungi.

⁴Ndibawa abasumba abanaabalabirira, era tebaliddayo kutya oba kuggwaamu maanyi, era tewaabe nʼomu abula,” bwʼayogera Mukama.

⁵“Ennaku zijja, lwe ndiyimusiza Dawudi Ettabi ettukuvu, Kabaka alikulembera nʼamagezi akole ebituufu ebyʼobwenkanya mu nsi,” bwayogera Mukama.

⁶Mu mirembe gye, Yuda alirokolebwa ne Isirayiri alibeera mu mirembe. Lino lye linnya lye balimuyita: Mukama OBUTUUKIRIVU BWAFFE.

⁷“Noolwekyo ennaku zijja, abantu lwe batalyogera nate nti, ‘Ddala nga Mukama bwali omulamu eyaggya Abayisirayiri mu Misiri,’ bwayogera Mukama,

⁸naye bagambe nti, ‘Ddala nga Mukama bwʼali omulamu, eyaggya abaana ba Isirayiri mu nsi eyʼomu bukiikakkono era ne mu nsi zonna gye yali abagobedde.’ Olwo balibeera mu nsi yaabwe ku bwabwe,” bwʼayogera Mukama.

⁹Ebikwata ku bannabbi: omutima gwange gwennyise mu nda yange amagumba gange gonna gakankana, nninga omusajja omutamiivu, ngʼomusajja afugiddwa omwenge, ku lwa Mukama nʼebigambo bye ebitukuvu.

¹⁰Ensi ejjudde abenzi; olwʼekikolimo ensi esigadde nkalu era nʼamalundiro gʼomu ddungu meereere. Bannabbi bagoberera amakubo amabi era bakozesa obuyinza bwabwe mu butali bwenkanya.

¹⁰

¹¹“Nnabbi ne kabona bombi tebalina Katonda, ne mu yeekaalu yange mbasanze nga bakoleramu ebibi,”

¹¹bwʼayogera Mukama.

¹²“Noolwekyo amakubo gaabwe gajja kuseerera era bajja kusuulibwa mu kizikiza era eyo gye baligwira. Ndibaleetako okuzikirira mu mwaka gwe balibonerezebwamu,”

¹²bwʼayogera Mukama.

¹³“Mu bannabbi bʼe Samaliya nalaba ekintu kino ekyenyinyalwa. Balagulira wansi wa Baali ne babuza abantu bange Isirayiri.

¹⁴ⓡ Era ne mu bannabbi ba Yerusaalemi ndabye ekintu ekibi ennyo. Bakola ebyʼobwenzi ne batambulira mu bulimba. Bagumya abo abakozi bʼebibi ne wataba nʼomu ava mu kwonoona kwe. Bonna bali nga Sodomu gye ndi; abantu ba Yerusaalemi bali nga Ggomola.”

¹⁵Noolwekyo, bwʼati bwʼayogera Mukama Katonda owʼEggye ebikwata ku bannabbi nti, “Nzija kubaliisa emmere ekaawa banywe amazzi agʼobutwa, kubanga okuva mu bannabbi ba Yerusaalemi, obutatya Katonda bubunye mu nsi yonna.”

¹⁶Bwʼati bwʼayogera Mukama Katonda owʼeggye nti, “Temuwuliriza bannabbi bye babategeeza: babajjuza essuubi ekyamu. Boogera ebirooto ebiva mu mitima gyabwe, so si ebiva mu kamwa ka Mukama Katonda.

¹⁷Bagamba abo abannyooma nti, ‘Mukama Katonda agamba onoobeera nʼemirembe.’ Abo abagoberera obukakanyavu bwʼemitima gyabwe babagamba nti, ‘Tewali kabi kanaakujjira.’

¹⁸Naye ani ku bo eyali abadde mu lukiiko lwa Mukama Katonda okulaba oba okuwulira ekigambo kye?

¹⁹Laba, omuyaga gwa Mukama gujja kubwatuka nʼekiruyi, empewo eyʼakazimu eyetooloolera ku mitwe gyʼabakozi bʼebibi.

²⁰Obusungu bwa Mukama tebujja kukoma okutuusa ngʼamaze okutuukiriza ekigendererwa kyʼomutima gwe. Mu nnaku ezijja, mujja kukitegeera bulungi.

²¹Situmanga bannabbi bano, songa bagenda badduka nʼobubaka buno, era sogeranga nabo, songa bategeeza obunnabbi.

²²Naye singa bayimirira mu maaso gange, bandibuulidde abantu bange ebigambo byange, era bandibaggye mu makubo gaabwe amabi era ne mu bikolwa byabwe ebibi.”

²²

²³“Ndi Katonda abeera okumpi wokka, so si abeera ewala?”

²³bwʼayogera Mukama.

²⁴“Omuntu ayinza okwekweka mu bifo ebyʼekyama ne sisobola kumulaba?” “Sijjuza eggulu nʼensi?” bwʼayogera Mukama.

²⁴bwʼayogera Mukama.

²⁵“Mpulidde bannabbi aboogera ebyʼobulimba mu linnya lyange. Bagamba nti, ‘Naloose! Naloose!’

²⁶Kino kinaakoma ddi mu mitima gyʼabo bannabbi bʼobulimba, abategeeza ebyʼobulimba ebiva ku mitima gyabwe?

²⁷Balowooza nti Ebirooto bye balootolola bannaabwe bijja kuleetera abantu bange okwerabira erinnya lyange, nga bakitaabwe bwe beerabira erinnya lyange nga basinza Baali.

²⁸Nnabbi alina ekirooto ayogere ekirooto kye, nʼoyo alina ekigambo kyange akyogere mu bwesigwa. Kubanga ebisusunku birina nkolagana ki nʼeŋŋaano?” bwʼayogera Mukama.

²⁹“Ekigambo kyange tekiri nga muliro, ngʼennyondo eyasaayasa olwazi?” bwʼayogera Mukama.

³⁰“Noolwekyo, ndi mulabe wa bannabbi ababbiŋŋanako ebigambo ebiva gye ndi,” bwʼayogera Mukama.

³¹“Weewaawo,” bwʼayogera Mukama, “saagalira ddala bannabbi abayogerayogera nga bagamba nti, ‘Bwʼatyo Mukama bwʼagamba.’

³²Ddala ddala ndi mulabe wʼabo abawa obunnabbi bwʼebirooto ebikyamu. Babyogera ne babuza abantu bange nʼobulimba bwabwe obutaliimu, ate nga saabatuma wadde okubateekawo. Tebalina kye bayamba bantu bano nʼakatono,” bwʼayogera Mukama.

³³“Abantu bano, oba nnabbi oba kabona bwʼabuuza nti, ‘Bubaka ki Mukama bwʼatutumye?’ Bagambe nti, Bubaka ki? Nzija kubabuulira,” bwʼayogera Mukama.

³⁴Nnabbi, oba kabona oba omuntu yenna bwʼagamba nti, “Buno bwe bubaka bwa Mukama,” Nzija kubonereza omusajja oyo nʼabʼomu maka ge.

³⁵Kino buli omu kyʼanagamba mikwano gye oba abʼeŋŋanda ze. “Mukama, azeemu ki? Oba kiki Mukama kyʼayogedde?”

³⁶Naye temuddayo kugamba nti, “Buno bwe bubaka bwa Mukama,” kubanga buli kigambo kya muntu kifuuka bubaka bwe era mukyusa ebigambo bya Katonda omulamu, Mukama owʼEggye, Katonda waffe.

³⁷Kino kye munaabuuza nnabbi nti, “Kiki Mukama kyakuzzeemu?” Oba nti, “Mukama, agambye ki?”

³⁸Naye era mujja kugamba nti, “Buno bwe bubaka Mukama bwatutumye,” wadde nga nabagamba nti, Temusaanye kwogera nti, “Buno bwe bubaka bwa Mukama,”

³⁹kyenaava mbagobera ddala mu maaso gange ne mu kibuga ekyo kye nabawa, mmwe ne bakitammwe.

⁴⁰Ndibaleetako ekivume ekitaliggwaawo, nʼensonyi ezʼolubeerera ebitagenda kwerabirwa.