Yeremiya 26:1-24 LGCB2014 - Bible AI

¹ⓦ Awo Yekoyakimu mutabani wa Yosiya kabaka wa Yuda nga yakalya obwakabaka, ekigambo kino kyajja okuva eri Mukama.

²“Bwʼati bwʼayogera Mukama nti, Yimirira mu luggya lwʼennyumba ya Mukama oyogere eri abantu bonna abʼebibuga bya Yuda abazze okusinza mu nnyumba ya Mukama. Bagambe byonna bye nkulagira; tobaako na kyʼolekayo.

³Oboolyawo banaawulira, buli muntu nʼakyuka okuva mu makubo ge amabi. Olwo nnejjuse nneme kubaleetako kikangabwa kyembadde ntegeka olwʼokwonoona kwabwe.

⁴Bagambe, bwʼati bwʼayogera Mukama nti, ‘Bwe mutampulirize ne mugoberera amateeka gange ge mbawadde,

⁵era bwe mutaawulirize bigambo bya baddu bange bannabbi, be mbatumidde emirundi emingi wadde nga temubafuddeeko,

⁶ⓧ ndifuula enju eno nga Siiro era nʼekibuga kino ngʼekintu ekyʼokukolimirwa mu mawanga agʼensi.’ ”

⁷Bakabona ne bannabbi nʼabantu bonna ne bawulira Yeremiya ngʼayogera ebigambo bino mu nnyumba ya Mukama.

⁸Naye nga Yeremiya ya kamaliriza okubuulira abantu bonna ebintu byonna Mukama bye yali amulagidde okwogera, bakabona ne bannabbi, nʼabantu bonna ne bamukwata ne bagamba nti, “Oteekwa okufa!

⁹Lwaki oyogera ebyobunnabbi mu linnya lya Mukama nti, Ennyumba eno eneebeera nga Siiro, nʼekibuga kino kinaakubwa kisigale matongo?” Awo abantu bonna ne beetooloola Yeremiya mu nnyumba ya Mukama.

¹⁰Awo abakungu ba Yuda bwe baawulira ebigambo bino, ne bava mu lubiri ne bambuka mu nnyumba ya Mukama ne batuula mu bifo byabwe awayingirirwa ku Mulyango Omuggya ogwʼennyumba ya Mukama.

¹¹Awo bakabona ne bannabbi ne bagamba abakungu nʼabantu bonna nti, “Omusajja ono asaana kusalirwa musango gwa kufa kubanga ayogedde ebyobunnabbi ebibi ku kibuga kino. Mukiwulidde nʼamatu gammwe gennyini.”

¹²Awo Yeremiya nʼagamba abakungu bonna nʼabantu bonna nti, “Mukama yantuma njogere ebyobunnabbi bwe bityo ku nnyumba eno nʼekibuga kino ebintu byonna bye muwulidde.

¹³Kaakano mukyuse amakubo gammwe nʼebikolwa byammwe mugondere Mukama Katonda wammwe. Olwo Mukama anaakyusa nʼataleeta bikangabwa byʼaboogeddeko.

¹⁴Nze, ndi mu mikono gyammwe; munkole kyonna kye mulowooza nga kye kirungi era kye kituufu.

¹⁵Mumanyire ddala nno nti bwe munzita, mujja kwereetako omusango gwʼokuyiwa omusaayi ogutalina musango, mmwe nʼekibuga kino nʼabo abakibeeramu, kubanga ekyʼamazima Mukama ye yantumye okwogera gye muli ebigambo bino byonna mubiwulire.”

¹⁶Awo abakungu nʼabantu bonna ne bagamba bakabona ne bannabbi nti, “Omusajja ono tasaana kusalirwa musango gwa kufa! Ayogedde naffe mu linnya lya Mukama Katonda waffe.”

¹⁷Abamu ku bakadde ne bavaayo ne bajja mu maaso ne boogera eri ekibiina kyonna ekyʼabantu nti,

¹⁸ⓨ “Mikka owʼe Moreseesi yawa obunnabbi mu nnaku za Keezeekiya kabaka wa Yuda.

¹⁸Yagamba abantu bonna aba Yuda nti, Bwʼati bwʼayogera Mukama Katonda owʼEggye nti, ‘Sayuuni ajja kulimibwa ngʼennimiro, Yerusaalemi ajja kufuuka ntuumu ya mafunfugu, olusozi lwa yeekaalu, lufuuke akasozi akamezeeko ebisaka.’ ”

¹⁹“Keezeekiya oba omuntu omulala yenna mu Yuda, yamutta? Keezeekiya teyatya Mukama nʼanoonya ekisa kye? Era Mukama teyakyusa nʼataleeta kuzikirira kwe yali agambye okubaleetako? Naye tunaatera okwereetera obulabe obwʼamaanyi!”

²⁰Waaliwo omusajja omulala Uliya omwana wa Semayiya owʼe Kiriyasuyalimu, eyawa obunnabbi mu linnya lya Mukama. Yawa obunnabbi bwe bumu ngʼobwa Yeremiya obugugumbula ekibuga kino era nʼensi eno.

²¹Wabula kabaka Yekoyakimu nʼabakungu be bonna nʼabasajja be nʼabʼobuyinza, bwe baawulira ebigambo bye, kabaka nʼamunoonya okumutta, naye Uliya bwe yakiwulira nʼatya nʼaddukira e Misiri.

²²Awo kabaka Yekoyakimu nʼatuma Erunasani mutabani wa Akubooli nʼabasajja abawerako,

²³ne baggya Uliya e Misiri ne bamutwala eri kabaka Yekoyakimu, eyalagira attibwe nʼekitala omulambo gwe ne gusuulibwa mu kifo ekiziikibwamu ekya lukale.

²⁴Akikamu mutabani wa Safani nʼawolereza Yeremiya nʼamuwagira nʼataweebwayo eri bantu kuttibwa.