Yeremiya 28:1-17 LGCB2014 - Bible AI

¹ⓐ Mu mwezi ogwokutaano ogwʼomwaka gwe gumu, gwe mwaka ogwokuna, obufuzi bwa Zeddekiya kabaka wa Yuda nga bwʼakatandika, nnabbi Kananiya omwana wa Azuri eyali abeera e Gibyoni nʼaŋŋambira mu nnyumba ya Mukama nga ba kabona nʼabantu bonna we bali nti,

²“Bwʼati bwʼayogera Mukama owʼEggye, Katonda wa Isirayiri nti, ‘Nzija kumenya ekikoligo kya kabaka wʼe Babulooni.

³Emyaka ebiri nga teginnaggwaako, ndikomyawo ebintu byʼomu nnyumba ya Mukama mu kifo kino, Nebukadduneeza kabaka wʼe Babulooni bye yaggya wano nʼabitwala e Babulooni.

⁴Era ndikomyawo wano Yekoyakini mutabani wa Yekoyakimu kabaka wa Yuda nʼabantu abalala bonna abaava mu Yuda abaatwalibwa e Babulooni,’ bwʼayogera Mukama, ‘kubanga ndimenya ekikoligo kya kabaka wʼe Babulooni.’ ”

⁵Awo nnabbi Yeremiya nʼaddamu mu bunnabbi bwa Kananiya nga ne bakabona nʼabantu bonna we bali bayimiridde mu nnyumba ya Mukama, nʼagamba nti,

⁶“Amiina! Bwʼatyo Mukama bwʼaba akola! Mukama atuukirize ebigambo byʼoyogedde ngʼakomyawo ebintu ebyʼomu nnyumba ya Mukama era nʼabawambe bonna abakomyewo mu kifo kino okuva mu Babulooni.

⁷Wabula, wuliriza kye ŋŋenda okwogera ngʼowuliriza nʼabantu bano bonna nga bawulira.

⁸Okuva edda nʼedda bannabbi abaatusooka, ggwe nange baategeezanga kubaawo kwa ntalo, na bikangabwa na kawumpuli okugwa ku mawanga nʼobwakabaka obwʼamaanyi.

⁹Naye nnabbi eyategeeza obunnabbi obwʼemirembe ajja kulabibwa nga ddala atumiddwa Mukama era ngʼobubaka bwʼategeeza butuukiridde.”

¹⁰Awo nnabbi Kananiya nʼalyoka akwata ekikoligo ekyali ku nsingo ya Yeremiya nʼakimenya,

¹¹nʼalyoka ayogera eri abantu bonna nti, “Bwʼati bwʼayogera Mukama nti, ‘Mu ngeri yʼemu bwʼeti, bwe ndimenya ekikoligo ekya Nebukadduneeza kabaka wʼe Babulooni okuva ku mawanga gonna mu myaka ebiri.’ ” Naye ye nnabbi Yeremiya nʼavaawo ne yeetambulira.

¹²Bwe waayitawo ebbanga ttono nga nnabbi Kananiya amenye ekikoligo ku nsingo ya Yeremiya, ekigambo kya Mukama ne kijjira Yeremiya nti,

¹³“Genda ogambe Kananiya nti, ‘Bwʼati bwʼayogera Mukama nti, Omenye ekikoligo kya muti naye mu kifo kyakyo ojja kufunamu kikoligo kya kyuma.

¹⁴Bwʼati bwʼayogera Mukama owʼEggye, Katonda wa Isirayiri nti, Nditeeka ekikoligo ekyʼekyuma mu nsingo zʼamawanga gano gonna baweereze Nebukadduneeza kabaka wʼe Babulooni era balimuweereza. Ndimuwa obuyinza nʼensolo azifuge.’ ”

¹⁵Awo nnabbi Yeremiya nʼagamba nnabbi Kananiya nti, “Wuliriza, Kananiya! Mukama tannakutuma naye ggwe owalirizza eggwanga lino okwesiga obulimba.

¹⁶Noolwekyo kino Mukama kyagamba nti, ‘Ndikumpi okukuggya ku nsi. Omwaka guno gwennyini ogenda kufa, kubanga oyigirizza abantu okujeemera Mukama.’ ”

¹⁷Mu mwezi ogwʼomusanvu ogwʼomwaka gwe gumu, Kananiya nʼafa.