Yeremiya 3:1-25 LGCB2014 - Bible AI

¹“Omusajja bwʼagoba mukazi we, omukazi oyo nʼagenda nʼafuuka owʼomusajja omulala, omusajja we alimukomyawo nate? Ensi eba teyonoonekedde ddala nnyo? Naye obadde nga malaaya, ngʼolina abasajja bangi; naye kaakano oyagala okukomawo gye ndi?” bwʼayogera Mukama.

²Yimusa amaaso go olabe ku ntikko yʼobusozi. Waliwo ekifo we bateebakira naawe? Ku mabbali gʼekkubo we watulanga nʼolinda abasajja ngʼoli nga Omuwalabu mu ddungu; nʼolyoka oyonoona ensi nʼobwenzi bwo nʼekibi kyo.

³Noolwekyo enkuba kyevudde eziyizibwa, nʼenkuba eya ttoggo nʼetetonnya. Naye era otemya nga malaaya tokwatibwa nsonyi.

⁴Tewakaŋŋamba nti Kitange ggwe mukwano gwange okuva mu buto bwange,

⁵onoonyiigira ddala emirembe gyonna, olisunguwala emirembe gyonna? Bwʼotyo bwʼoyogera, naye okoze ebibi byonna ebisoboka.

⁶ⓒ Mu nnaku zʼobufuzi bwa kabaka Yosiya Mukama yayogera nange nʼaŋŋamba nti, “Olabye Isirayiri etali neesigwa kyʼekoze? Agenze ku buli kasozi na buli wansi wʼomuti oguyimiridde ne yeeyisa ngʼomukazi omwenzi.

⁷Nalowooza nti, Bwʼalimala okukola bino byonna agenda kudda gye ndi naye teyadda, era muganda we atali mwesigwa Yuda nʼakiraba.

⁸Yalaba nti bwe namala okugoba Isirayiri eyanvaako, ne muwa nʼebbaluwa eyʼokumugoba olwʼobwenzi bwe. Naye ate nʼendaba muganda we atali mwesigwa Yuda nga taliimu kutya, naye nʼagenda nʼakola obwenzi.

⁹Awo obwenzi bwe bwatuuka ne bumwanguyira nnyo nʼayenda nʼasinza amayinja nʼebikonge.

¹⁰Naye wadde nga byonna bimaze okubaawo, muganda we Yuda atali mwesigwa, teyakomawo gye ndi na mutima gwe gwonna, naye yali alimbalimba,” bwʼayogera Mukama.

¹¹Mukama nʼaŋŋamba nti, Isirayiri asudde obwesigwa, mutukuvu okusinga Yuda atali mwesigwa.

¹²Genda obuulire abantu bʼomu bukiikakkono obubaka buno, obagambe nti,

¹²“ ‘Komawo ggwe Isirayiri, eyanvaako,’ bwʼayogera Mukama. ‘Siribatunuuliza busungu kubanga ndi waakisa,’ bwʼayogera Mukama; ‘Sirisiba busungu ku mwoyo emirembe gyonna.

¹³Mukkirize bukkiriza ekibi kyammwe, mwajeemera Mukama Katonda wammwe, mwasinza bakatonda abalala, wansi wa buli muti oguyimiridde, era ne mutaŋŋondera,’ ”

¹³bwʼayogera Mukama.

¹⁴“Mukomeewo mmwe abaana abanvaako,” bwʼayogera Mukama; “kubanga nze bbammwe, era ndibalondamu omu ku omu okuva mu buli kibuga, babiri babiri okuva mu buli kika mbaleete ku lusozi Sayuuni.

¹⁵Era ndibawa abasumba abakola ngʼomutima gwange bwe gwagala, abalibakulembera mu kumanya era ne mu kutegeera.

¹⁶Ennaku bwe zirituuka nga mwaze era nga muli bangi nnyo mu nsi,” bwʼayogera Mukama, “abantu baliba tebakyayogera ku Ssanduuko yʼEndagaano. Baliba tebakyagirowooza nako, okugijjukira; oba okulumwa emitima olwʼobutaba nayo wadde okukola endala.

¹⁷Ebbanga lyonna Yerusaalemi kiriyitibwa Entebe ya Mukama eyʼObwakabaka, amawanga gonna mwe ganaakuŋŋaaniranga okumugulumiza Mukama mu Yerusaalemi era tebaliddayo kugoberera mitima gyabwe minyoomi.

¹⁸Mu nnaku ezo ennyumba ya Yuda eryegatta ku nnyumba ya Isirayiri, era bombi awamu baliva mu nsi eyʼomu bukiikakkono ne bajja mu nsi gye ndiwa bakitammwe okuba omugabo.”

¹⁹“Nze kennyini nalowooza nga nayagala okubayisanga nga batabani bange, era mbawe ensi eyeegombebwa, nga gwe mugabo ogusinga obulungi mu mawanga gonna. Nalowooza nti mulimpita ‘Kitammwe,’ ne mutanvaako ne mwongera okungoberera.

²⁰Naye ngʼomukazi atali mwesigwa eri bba bwʼabeera, bwe mutyo bwe mutabadde beesigwa gye ndi, mmwe ennyumba ya Isirayiri,”

²⁰bwʼayogera Mukama.

²¹Okukaaba kwʼAbaana ba Isirayiri kuwuliddwa ku ntikko zʼensozi ezitaliiko kantu, nga bakaaba nʼokwegayirira, kubanga baatambulira mu kukola ebibi, ne beerabira Mukama Katonda waabwe.

²¹

²²“Mukomeewo mmwe abantu abatali beesigwa, nnaabawonya ne mbafuula abeesigwa.” Ne mugamba nti, “Weewaawo tujja kudda gyʼoli, kubanga ggwe Mukama Katonda waffe.

²³Ddala okusuubira obuyambi okuva mu nsozi gye twasinzizanga bakatonda abalala temuli kantu. Ddala mu Mukama Katonda waffe mwe muli obulokozi bwa Isirayiri.

²⁴Naye okuva mu buto bwaffe bakatonda abo abalala abatagasa balidde ne bamalawo ebibala bakitaffe bye baamalirako amaanyi gaabwe, embuzi zaabwe, nʼente zaabwe, batabani baabwe ne bawala baabwe.

²⁵Leka tugalamire, ngʼensonyi zitutta, nʼobuswavu bwaffe butuyitiridde kubanga twonoonye eri Mukama Katonda waffe, ffe ne bakadde baffe, okuva mu buto bwaffe nʼokutuusa ku lunaku luno; kubanga tetugondedde ddoboozi lya Mukama Katonda waffe.”