Yeremiya 4:1-31 LGCB2014 - Bible AI

¹“Bwʼoba odda, ggwe Isirayiri,” bwʼayogera Mukama, “eri nze gyʼolina okudda. Bwʼoneggyako ebyʼomuzizo byonna nʼotosagaasagana,

²era singa olayira mu mazima, mu bwenkanya era mu ngeri entuufu yennyini nti, ‘Ddala nga Mukama bwʼali omulamu,’ olwo amawanga gonna mu ye mwe gajja okuweerwa omukisa era mu ye mwe ganeenyumiririzanga.”

³ⓓ Kubanga bwʼati bwʼayogera Mukama eri abantu ba Yuda era nʼeri abantu bʼomu Yerusaalemi nti, “Mulime ennimiro zammwe ezitali nnime, temusiga mu maggwa.

⁴Mukoowoole Mukama, mweweeyo mutukuze emitima gyammwe mwe abantu ba Yuda ne Yerusaalemi, obusungu bwange buleme okubuubuuka ngʼomuliro, olwʼebikolwa byammwe ebibi, ne wataba ayinza kubuzikiza.”

⁵“Kirangirire mu Yuda era okitegeeze mu Yerusaalemi ogambe nti, ‘Mufuuwe ekkondeere mu nsi yonna! Mulangirire nga mugamba nti, Mukuŋŋaane, tuddukire mu bibuga ebiriko ebigo!’

⁶Weereza obubaka eri Sayuuni nti, Mudduke temulwa, kubanga ndireeta okuzikiriza okuva mu bukiikakkono, okuzikiriza okwʼamaanyi.”

⁶

⁷Empologoma evudde mu kisaka kyayo, omuzikiriza wʼamawanga afulumye gyʼabeera, azze okumalawo ensi yo. Ebibuga byammwe bijja kuzikirizibwa bibuleko abibeeramu.

⁸Noolwekyo mwambale ebibukutu mukungubage, mukube ebiwoobe kubanga obusungu bwa Mukama obwʼamaanyi tebutuvuddeeko.

⁸

⁹Mukama nʼagamba nti, “Ku lunaku olwo, kabaka nʼomukungu baliggwaamu omwoyo, bakabona basamaalirire ne bannabbi beewuunye.”

¹⁰Ne ndyoka ŋŋamba nti, “Woowe Mukama Katonda, mazima olimbidde ddala abantu bano ne Yerusaalemi ngʼogamba nti, ‘Mulibeera nʼemirembe,’ ate nga ekitala kiri ddala ku mimiro gyaffe.”

¹¹Mu biseera ebyo abantu bano ne Yerusaalemi balibuulirwa nti, “Embuyaga ezookya eziva ku nsozi ezaakala ezʼomu ddungu zifuuwa abantu bange nga teziwujja buwuzzi wadde okulongoosa obulongoosa

¹²embuyaga ezisingako awo ze ziriva gye ndi. Era kaakano mbasalira emisango.”

¹³Laba ajja ngʼebire, amagaali ge ngʼempewo yʼakazimu, embalaasi ze zidduka okusinga empungu; zitusanze ffe kubanga tuzikiridde!

¹⁴Ayi Yerusaalemi, naaza omutima gwo guve mu kukola ebibi olyoke olokolebwe. Olikomya ddi ebirowoozo ebibi?

¹⁵Eddoboozi lyawulirwa okuva mu Ddaani, nga lirangirira okuzikirizibwa okuva mu nsozi za Efulayimu.

¹⁶“Labula amawanga nti Ajja: kirangirirwe mu Yerusaalemi nti, ‘Abalabe bajja okuva mu nsi eyʼewala nga bayimba ennyimba ezʼentalo nga balumba ebibuga bya Yuda.

¹⁷Bakyetoolodde ngʼabasajja abakuuma ennimiro kubanga Yuda yanjeemera,’ ”

¹⁷bwʼayogera Mukama.

¹⁸“Empisa zammwe, nʼebikolwa byammwe bye bibaleeseeko bino. Kino kye kibonerezo kyammwe. Nga kya bulumi! Nga kifumita omutima.”

¹⁸

¹⁹Obulumi, Ayi Obulumi! Neenyoolera mu bulumi! Ayi obulumi bwʼomutima gwange! Omutima gunkubagana munda, sisobola kusirika, kubanga mpulidde eddoboozi lyʼekkondeere, mpulidde enduulu zʼolutalo.

²⁰Okuzikirizibwa kweyongeddeko era ensi yonna eyonooneddwa. Eweema zange zisaanyiziddwawo mu kaseera buseera, nʼentimbe zange nga kutemya kikowe.

²¹Ndituusa ddi nga ndaba bbendera zʼolutalo nʼokuwulira amaloboozi gʼamakondeere?

²²“Kubanga abantu bange basirusiru, tebammanyi. Baana abatalina magezi; abatategeera. Bakagezimunnyu mu kukola ebibi, tebamanyi kukola birungi.”

²³Natunuulira ensi, nga njereere, ate ne ntunula ne ku ggulu, ngʼekitangaala kigenze.

²⁴Natunuulira agasozi nga gajugumira, nʼensozi zonna zaali ziyuuguuma.

²⁵Natunula, era laba, waali tewasigadde muntu nʼomu, era nʼebinyonyi byonna ebyʼomu bbanga byali bidduse.

²⁶Natunula, era laba, ensi eyʼebibala ebingi ngʼefuuse ddungu, era nʼebibuga byayo byonna nga byonoonese, mu maaso ga Mukama, olwʼobusungu bwe obungi.

²⁷Kubanga bwʼatyo bwʼayogera Mukama nti, “Ensi yonna eriyonoonebwa, wadde nga sirigizikiririza ddala.

²⁸Noolwekyo ensi erikungubaga era nʼeggulu waggulu lirikwata ekizikiza, kubanga njogedde era maliridde sijja kwejjusa wadde okukyusaamu.”

²⁹Olwʼokuyoogona kwʼabeebagazi bʼembalaasi nʼabalasa obusaale, ebibuga byonna biribuna emiwabo, abamu beesogge ebisaka; nʼabalala balinnye waggulu ku njazi. Ebibuga byonna birekeddwa ttayo; tewali abibeeramu.

³⁰Okola ki ggwe, ggwe eyayonoonebwa? Lwaki oyambala engoye entwakaavu, ne weeteekako ebyʼobugagga ebya zaabu, nʼamaaso nʼogasiiga langi? Omala biseera nga weeyonja. Baganzi bo bakunyoomoola; era baagala kukutta.

³¹Mpulira okukaaba ngʼokwʼomukazi alumwa okuzaala, okusinda ngʼokwʼoyo asindika omwana we asooka, okukaaba kwʼomuwala wa Sayuuni ngʼawejjawejja anoonya wʼanassiza omukka, ngʼagolola emikono gye ngʼagamba nti, “Zinsanze nze, nzirika. Obulamu bwange buweereddwayo mu batemu.”