Yeremiya 42:1-22 LGCB2014 - Bible AI

¹ⓟ Awo abaduumizi ba magye bonna, ngʼogasseeko Yokanaani mutabani wa Kaleya ne Yezaniya mutabani wa Kosaaya, nʼabantu bonna okuva ku asokerwako wansi okutuuka ku akomererayo waggulu baatuukirira

²nnabbi Yeremiya ne bamugamba nti, “Tukwegayiridde, wulira okusaba kwaffe osabe Mukama Katonda wo ku lwʼabantu bano bonna abafisseewo. Kale naawe nga bwʼolaba, abaali abangi kaakano tusigaddewo batono nnyo.

³Saba Mukama Katonda wo atubuulire gye tusaanye okulaga ne kye tusaanye okukola.”

⁴Nnabbi Yeremiya nʼabagamba nti, “Mbawulidde, ddala nzija kubasabira eri Mukama Katonda wammwe nga bwe munsabye; nzija kubabuulira byonna Mukama byʼanaŋŋamba, sirina kye nnaabakisa.”

⁵Awo ne bagamba Yeremiya nti, “Mukama abeere omujulirwa owʼamazima era omwesigwa gye tuli, bwe tutalikola kyonna Mukama Katonda wo kyʼanaakutuma okutugamba.

⁶Oba kyangu oba kikalubo tujja kugondera Mukama Katonda waffe, gye tukutuma kaakano, tulyoke tufune emirembe, kubanga tujja kugondera Mukama Katonda waffe.”

⁷Bwe waayitawo ennaku kkumi ekigambo kya Mukama ne kijjira Yeremiya.

⁸Nʼalyoka ayita Yokanaani omwana wa Kaleya nʼabaduumizi bʼeggye lya Yuda bonna abaali naye, nʼabantu bonna okuva ku asokerwako wansi okutuuka ku akomererayo waggulu.

⁹Nʼabagamba nti, “Bwʼati bwʼayogera Mukama, Katonda wa Isirayiri, gye mwantuma okubabuuliza nti,

¹⁰‘Bwe munaasigala mu nsi eno, nzija kubazimba era siibaleke kugwa. Nzija kubasimba so si kubasimbula, kubanga nnumiddwa olwʼekikangabwa kye mbatuusizzaako.

¹¹Temutya kabaka wʼe Babulooni, kaakano gwe mutya. Temumutya, bwʼayogera Mukama, kubanga ndi nammwe era nzija kubalokola, mbanunule mu mukono gwa kabaka oyo.

¹²Nzija kubalaga ekisa alyoke abakwatirwe ekisa, abakomyewo mu nsi yammwe.’

¹³“Wabula bwe mugamba nti, ‘Tetuusigale mu nsi eno gye mbakomezzaamu,’ olwo munaaba temugondedde Mukama Katonda wammwe.

¹⁴Bwe mugamba nti, ‘Nedda, tujja kugenda tubeere e Misiri, gye tutaalabe ntalo wadde okuwulira ekkondeere nga livuga oba okubulwa omugaati ogwʼokulya,’

¹⁵kale nno muwulire ekigambo kya Mukama, mmwe abaasigalawo mu Yuda. Bwʼati bwʼayogera Mukama owʼEggye, Katonda wa Isirayiri nti, ‘Bwe munaamalirira okugenda e Misiri era ne mugenda okubeererayo ddala,

¹⁶olwo ekitala kye mutya kijja kubasanga eyo, nʼenjala gye mutya ejja kubagoberera e Misiri era eyo gye mulifiira.

¹⁷Mumanyire ddala nti, Abo bonna abamaliridde okugenda e Misiri okusenga eyo balifa kitala, nʼenjala ne kawumpuli; tewaliba nʼomu alisigalawo wadde okuwona ekikangabwa kye ndibaleetako.’

¹⁸Bwʼati bwʼayogera Mukama owʼEggye, Katonda wa Isirayiri nti, ‘Ngʼobusungu bwange nʼekiruyi bwe bifukiddwa ku abo abali mu Yerusaalemi, bwe kityo ekiruyi kyange bwe kinaafukibwa ku mmwe bwe munaagenda e Misiri. Munaabeera kya kukolimirwa, era kya ntiisa, era kya kusalirwa musango era kivume: temuliraba kifo kino nate.’

¹⁹“Mmwe abafisseewo ku Yuda, Mukama abagambye nti, ‘Temugenda Misiri.’ Mumanye kino nga mbalabula leero

²⁰nti, Mwakola ekisobyo kinene bwe mwantuma eri Mukama Katonda wammwe ne mugamba nti, ‘Tusabire eri Mukama Katonda waffe: tubuulire byonna byʼagamba tujja kubikola.’

²¹Mbabuulidde leero, naye era temugondedde Mukama Katonda wammwe mu byonna bye yantuma okubagamba.

²²Kale nno mutegeerere ddala kino nga mulittibwa na kitala, oba njala oba kawumpuli mu nsi gye mwagala okugenda okusengamu.”