Yeremiya 5:1-31 LGCB2014 - Bible AI

¹Dduka ogende eno nʼeri mu nguudo za Yerusaalemi, tunulatunula olabe, noonya wonna we bakuŋŋaanira, bwʼonoosanga omuntu omu bwʼati omwesimbu owʼamazima, nnaasonyiwa ekibuga kino.

²Ne bwe boogera nti, “Nga Mukama bwali omulamu; baba balayirira bwereere.

³Ayi Mukama Katonda, amaaso go teganoonya mazima? Wabakuba naye ne batawulira bulumi wababetenta, naye ne bagaana okukangavvulwa. Beeyongedde kukakanyala, bagubye obwenyi okusinga nʼamayinja; era bagaanyi okwenenya.

⁴Ne njogera nti, ‘Bano baavu abasirusiru. Kubanga tebamanyi kkubo lya Mukama, amateeka ga Katonda waabwe.’

⁵Kale ndigenda eri abakulembeze njogere nabo; Kubanga bamanyi ekkubo lya Mukama, amateeka ga Katonda waabwe. Naye nabo bwe batyo baali baamenya dda ekikoligo nga baakutula ebisiba.

⁶Noolwekyo empologoma eriva mu kibira nʼebalya, nʼomusege ogwʼomu ddungu gulibasaanyaawo. Engo erikuumira okumpi nʼebibuga byabwe, buli muntu abifuluma ayuzibweyuzibwe; Kubanga ebibi byabwe bingi, okudda ennyuma kunene.”

⁶

⁷“Mbasonyiwe ntya? Abaana bammwe banvuddeko, ne balayiririra bakatonda abatali bakatonda. Bwe nabaliisa ne bakkuta, badda mu kwenda, ne beekuŋŋaanya ku nnyumba zʼabenzi.

⁸Baali ngʼembalaasi ennume ezikkuse ezitaamye, buli muntu ngʼakaayanira muka munne.

⁹Lwaki sibabonereza olwʼebintu ebyo? bwʼayogera Mukama, Lwaki siwoolera ggwanga ku nsi efaanana bwʼetyo?”

¹⁰“Yita mu nnimiro zʼemizabbibu gyabwe ogyonooneyonoone, naye togimalirawo ddala. Giggyeeko amatabi gaagyo, kubanga si bantu ba Mukama.

¹¹Kubanga ennyumba ya Isirayiri nʼennyumba ya Yuda zifuukidde ddala njeemu gye ndi,”

¹¹bwʼayogera Mukama.

¹²Boogedde ebyʼobulimba ku Mukama ne bagamba nti, “Talina kyajja kukola, tewali kabi kanaatugwako, era tetujja kulaba wadde kitala oba kyeya.

¹³Bannabbi mpewo buwewo era ekigambo tekibaliimu; noolwekyo leka kye boogera kikolebwe ku bo.”

¹⁴Noolwekyo bwʼati bwʼayogera Mukama, Katonda owʼEggye nti, “Kubanga abantu boogedde ebigambo bino, ndifuula ekigambo kyange mu kamwa kammwe okuba ngʼomuliro, nʼabantu bano okuba enku era omuliro gubookye,

¹⁵Laba, mbaleetera eggwanga eriva ewala, ggwe ennyumba ya Isirayiri,” bwʼayogera Mukama. Ensi eyaguma eyʼedda, abantu abʼolulimi lwe mutamanyi aboogera bye mutategeera

¹⁶Omufuko gwabwe ogwʼobusaale guli ngʼentaana eyasaamiridde, bonna balwanyi nnamige.

¹⁷Balirya amakungula gammwe nʼemmere yammwe; balirya batabani bammwe era ne bawala bammwe; balye emizabbibu nʼemitiini gyammwe, ebibuga byammwe ebiriko bbugwe bye mwesiga birizikirizibwa nʼebitala.

¹⁸Bwʼati bwʼayogera Mukama nti, “Naye ne mu nnaku ezo sigenda kubazikiririza ddala kubamalawo.

¹⁹Era abantu bammwe bwe bagamba nti, ‘Lwaki Katonda waffe atukoze ebintu bino byonna?’ Onoobagamba nti, ‘Nga bwe mwanvaako ne muweereza bakatonda abalala mu nsi yammwe, mujja kuweereza bakatonda abagwira mu nsi eteri yammwe.’

²⁰Langirira kino mu nnyumba ya Yakobo, kirangirire mu Yuda.

²¹ⓔ Wulira kino, mmwe abantu abasirusiru abatalina kutegeera, abalina amaaso naye nga tebalaba, abalina amatu naye nga tebawulira.

²²ⓕ Temuntya?” bwʼayogera Mukama; “temunkankanira? Nateeka omusenyu okuba ensalo yʼennyanja, olukomera olutaliggwaawo, lwetasobola kuvvuunuka; wadde ngʼamayengo galukubaakuba, tegasobola kuluwaguza, gayinza okuwuluguma, naye tegasobola kuluyitako.

²³Naye abantu bano balina omutima omwewagguze era omujeemu. Bajeemye banvuddeko.

²⁴Abateekuba mu kifuba kugamba nti, ‘Tutye Mukama Katonda waffe agaba enkuba, eya ddumbi nʼeya ttoggo, mu ntuuko zaayo; atugerekera ssabbiiti ezʼokukunguliramu.’ ”

²⁵Obutali butuukirivu bwammwe bubibakwese ebibi byammwe bibaggyeeko ebirungi.

²⁵

²⁶“Kubanga abasajja abakozi bʼebibi basangibwa mu bantu bange; abagalamira ne balindirira ngʼabasajja abatezi bʼobunyonyi. Batega abantu omutego.

²⁷Ngʼebisero ebijjudde ebinyonyi, enju zaabwe bwe zijjudde ebyʼenkwe. Noolwekyo bafuuse abʼamaanyi abagagga, ne bagejja era ne banyirira.

²⁸Ekibi kyabwe tekiriiko kkomo, tebasala misango mu bwenkanya, abatawolereza bataliiko ba kitaabwe okubayamba basinge emisango, era abatafaayo ku ddembe lya bakateeyamba.

²⁹Lwaki sibabonereza olwʼebintu ebyo?” bwʼayogera Mukama. “Nneme okwesasuza ku ggwanga eriri nga eryo?

³⁰Ekigambo ekyʼekitalo era ekyʼekivve kigudde mu nsi:

³¹Bannabbi bawa obunnabbi obwʼobulimba, bakabona bafugisa buyinza bwabwe ate abantu bange bwe batyo bwe bakyagala. Naye ku nkomerero munaakola mutya?”