Yeremiya 51:1-64 LGCB2014 - Bible AI

¹Bwʼati bwʼayogera Mukama nti, “Laba, ndiyimusa omwoyo gwʼomuzikiriza alumbe Babulooni nʼabantu ba Lebukamaayi.

²Ndituma abagwira e Babulooni bamuwewe era bazikirize ensi ye; balimulumba ku buli luuyi ku lunaku olwʼokuzikirira kwe.

³Omulasi talikuba busaale bwe, taliyambala wadde ebyambalo bye ebyokulwanyisa. Temusonyiwa batabani be; muzikiririze ddala amaggye ge.

⁴Baligwa nga battiddwa e Babulooni, nga batuusiddwako ebiwundu ebyʼamaanyi mu nguudo ze.

⁵Kubanga Yuda ne Isirayiri tebinnalekebwa Katonda waabwe, oyo Mukama Katonda owʼEggye, wadde ngʼensi yaabwe esingiddwa omusango mu maaso gʼOmutukuvu wa Isirayiri.”

⁵

⁶“Mudduke Babulooni. Mudduke okuwonya obulamu bwammwe. Temusaanawo olwʼebibi bye. Kiseera kya Mukama okwesasuza; alimusasula ekyo ekimusaanira.

⁷Babulooni yali kikompe kya zaabu mu mukono gwa Mukama; yatamiiza ensi yonna. Amawanga gaanywa wayini we, kyegavudde galaluka.

⁸Babulooni kirigwa mangu ago ne kimenyekamenyeka. Mukikungubagire. Munoonye eddagala olwʼobulumi bwʼakyo oboolyawo anaawonyezebwa.”

⁸

⁹ⓩ “ ‘Twandiwonyezza Babulooni, naye tayinza kuwonyezeka. Leka tumuleke buli muntu adde mu nsi ye, kubanga omusango gwe gutuuse mu bwengula, gusituse gulinnye okutuuka ku bire.’ ”

⁹

¹⁰“ ‘Mukama atulwaniridde, mujje tukitegeeze mu Sayuuni ekyo Mukama Katonda waffe kyʼakoze.’ ”

¹⁰

¹¹“Muwagale obusaale, mukwate engabo! Mukama ayungudde bakabaka abʼe Bumeedi, kubanga ekigendererwa kye kuzikiriza Babulooni. Mukama aliwalana eggwanga, aliwalana eggwanga olwa yeekaalu ye.

¹²Muyimuse bendera mwolekere bbugwe wa Babulooni! Mwongereko abakuumi, muteekeko abaserikale, mutegeke okulumba mbagirawo! Mukama alituukiriza ekigendererwa bye, ensala ye okwolekera abantu ba Babulooni.

¹³Gwe abeera okumpi nʼamazzi amangi, omugagga mu bintu ebyʼomuwendo, enkomerero yo etuuse, ekiseera kyo ekyʼokuzikirizibwa kituuse.

¹⁴Mukama Katonda owʼEggye yeerayiridde ku lulwe; ddala ndikujjuza abasajja, ngʼebibinja byʼenzige, era balireekaana nga bakuwangudde.

¹⁴

¹⁵“Ensi yagikola nʼamaanyi ge; yagiteekawo nʼamagezi ge, nʼayanjuluza eggulu nʼokutegeera kwe.

¹⁶Bwʼabwatuka, amazzi agʼomu ggulu gawuluguma; ayimusa ebire okuva ku nkomerero yʼensi. Amyansisa eggulu mu nkuba era nʼaggya empewo mu mawanika ge.

¹⁶

¹⁷“Buli muntu talina magezi wadde okutegeera; Buli muweesi aswadde olwʼebifaananyi bya bakatonda byʼakoze nʼemikono gye. Ebifaananyi bye bya bulimba; tebirina mukka.

¹⁸Tebigasa, bintu bya kuzannyazannya; omusango gwabwe bwe gunajja, bajja kuzikirira.

¹⁹Oyo omugabo gwa Yakobo tali nga bano, kubanga yakola ebintu byonna, nga mwotwalidde nʼeggwanga lyʼomugabo gwe, nʼerinnya lye ye Mukama Katonda owʼEggye.

¹⁹

²⁰“Muli mbazzi yange, ekyokulwanyisa kyange ekyʼolutalo, mmwe be nkozesa okubetenta amawanga, mmwe be nkozesa okuzikiriza obwakabaka,

²¹era ggwe gwe ndikozesa okubetenta embalaasi nʼomwebagazi, ggwe gwe ndikozesa okubetenta ekigaali nʼomuvuzi waakyo,

²²era ggwe gwe ndikozesa okubetenta omusajja nʼomukazi, era ggwe ndikozesa okubetenta omukadde nʼomuvubuka, era ggwe gwe ndikozesa okubetenta omuvubuka nʼomuwala omuto.

²³Ggwe gwe ndikozesa okubetenta omusumba nʼekisibo kye, ggwe gwe ndikozesa okubetenta omulimi nʼente ennume, ggwe gwe ndikozesa okubetenta bagavana nʼabakungu.

²⁴“Ndisasula Babulooni ne bonna ababeeramu nga mulaba olwʼebibi byonna bye baakola mu Sayuuni,” bwʼayogera Mukama.

²⁵“Mbalinako ensonga, ggwe olusozi oluzikiriza, mmwe abazikiriza ensi yonna,” bwʼayogera Mukama. “Ndikugolererako omukono gwange, nkusuule ku mayinja gʼensozi, nkufuule olusozi olutakyayaka.

²⁶Tewali jjinja lirikuggibwako kukola jjinja lya ku nsonda, wadde ejjinja lyonna okukola omusingi, kubanga olibeera matongo emirembe gyonna,”

²⁶bwʼayogera Mukama.

²⁷“Yimusa bendera mu ggwanga! Fuuwa omulere mu mawanga! Tegeka amawanga okumulwanyisa; koowoola obwakabaka buno bumulumbe: obwa Alalati ne Mini ne Asukenaazi. Londa omuduumizi amulumba, weereza embalaasi eziri ngʼekibinja kyʼenzige.

²⁸Teekateeka amawanga okumulwanyisa; bakabaka Abameedi, bagavana baabwe era nʼabakungu baabwe bonna, nʼamawanga ge bafuga.

²⁹Ensi ekankana ne yeenyola olwʼobulumi, kubanga ebigendererwa bya Mukama eri Babulooni tebikyuka, okuzikiriza ensi ya Babulooni waleme kubaawo agibeeramu.

³⁰Abalwanyi ba Babulooni balekedde awo okulwana; basigadde mu bigo byabwe. Baweddemu amaanyi; bafuuse nga bakazi. Ebifo bye mwʼabeera byokeddwa omuliro; emitayimbwa gyʼoku nzigi ze gimenyeddwa.

³¹Matalisi omu agoberera omulala, omubaka omu nʼagoberera munne, okulangirira eri kabaka wʼe Babulooni nti ekibuga kye kyonna kiwambiddwa,

³²entindo zʼemigga baziwambye, ensenyi ziyidde omuliro, nʼabaserikale batidde.”

³³Bwʼati bwʼayogera Mukama owʼEggye, Katonda wa Isirayiri nti, “Muwala wa Babulooni ali ngʼegguuliro, mu kiseera wʼanalinnyiririrwa; ebiseera ebyʼokumukungula binaatera okutuuka.”

³⁴“Nebukadduneeza kabaka wʼe Babulooni atukubyekubye, atutabudde, tufuuse ekikompe ekyereere. Atumize ngʼomusota nʼolubuto lwe nʼalujjuza ebyassava byaffe ebiwooma, ffe nʼatusesema.

³⁵Leka okubonaabona okututuuseeko kubeere ku Babulooni,” bwe boogera abatuula mu Sayuuni. “Leka omusaayi gubeere ku abo ababeera mu Babulooni,” bwayogera Yerusaalemi.

³⁶Mukama kyava ayogera nti, “Laba ndikulwanirira era ndikuwolerera eggwanga; Ndikaliza ennyanja ye nʼensulo ze.

³⁷Babulooni kirifuuka bifunvu, mpuku ya bibe, ekintu ekyenyinyalwa nʼokusekererwa, ekifo omutali abeeramu.

³⁸Abantu baakyo bonna bawuluguma ngʼempologoma ento, bavuumira wamu ngʼabaana bʼempologoma.

³⁹Naye nga bakyabuguumirira, ndibategekera ekijjulo, mbatamiize balyoke balekaane nga baseka, olwo beebake emirembe gyonna nga tebazuukuse,”

³⁹bwʼayogera Mukama.

⁴⁰“Ndibaserengesa ngʼabaana bʼendiga, battibwe, ngʼendiga nʼembuzi.

⁴⁰

⁴¹“Sesaki nga kiriwambibwa, okujaguza kwʼensi yonna kugwewo. Babulooni kifuuse matongo eri amawanga!

⁴²Ennyanja eribuutikira Babulooni; amayengo gaayo agawuluguma galigisaanikira.

⁴³Ebibuga bye birisigala matongo, ensi enkalu eyʼeddungu, ensi eteriimu muntu, eteyitamu muntu yenna.

⁴⁴Ndibonereza Beri mu Babulooni, mmusesemye bye yali amize. Amawanga nga tegakyesomba kugenda gyali. Ne bbugwe wa Babulooni aligwa.

⁴⁴

⁴⁵“Mukiveemu, abantu bange! Mudduke muwonye obulamu bwammwe! Mudduke muwone obusungu bwa Mukama obubuubuuka.

⁴⁶Temutya wadde okuggwaamu amaanyi ngʼeŋŋambo ziyitiŋŋana mu nsi; olugambo olumu lujja omwaka guno, olulala omwaka ogujja, eŋŋambo zʼentalo mu ggwanga, era ezʼomufuzi ngʼalwana ne mufuzi munne.

⁴⁷Kubanga ekiseera kijja lwe ndibonereza ebifaananyi bya bakatonda ba Babulooni abaakolebwa nʼemikono; ensi eyo yonna eritabanguka, nʼemirambo gyʼabantu baayo abattiddwa gyonna gibeere omwo.

⁴⁸Eggulu nʼensi ne byonna ebibirimu birireekana olwʼessanyu olwa Babulooni, abalimuzikiriza balimulumba okuva mu bukiikakkono,”

⁴⁸bwʼayogera Mukama.

⁴⁹“Babulooni kirigwa olwʼAbayisirayiri abaafa, nga bonna abaafa mu nsi yonna bwe baweddewo olwa Babulooni.

⁵⁰Mmwe abawonye ekitala, mwanguwe okugenda! Mujjukire Mukama nga muli mu nsi eyʼewala, mulowooze ku Yerusaalemi.”

⁵¹“Tuweddemu amaanyi kubanga tuvumiddwa era tukwatiddwa ensonyi, kubanga abagwira bayingidde mu bifo ebitukuvu ebyʼennyumba ya Mukama.”

⁵²“Naye ennaku zijja,” bwʼayogera Mukama, “lwe ndibonereza ebifaananyi bya bakatonda be, be yakola nʼemikono, era mu nsi ye yonna, abaliko ebisago balisinda.

⁵³Newaakubadde nga Babulooni atuuka ku bire era ne yeenyweza nʼebigo bye ebyʼamaanyi, ndimusindikira abazikiriza,”

⁵³bwʼayogera Mukama.

⁵⁴“Eddoboozi lyʼokukaaba liva mu Babulooni, eddoboozi eryʼokuzikirira okunene okuva mu nsi yʼAbakaludaaya.

⁵⁵Mukama alizikiriza Babulooni, alizikiza oluyoogaano lwakyo olunene. Amayengo gʼabalabe galijja ngʼamazzi amangi; okuwuluguma kwʼamaloboozi kuliwulirwa.

⁵⁶Omuzikiriza alirumba Babulooni; abalwanyi be baliwambibwa, nʼemitego gyabwe girimenyebwa. Kubanga Mukama Katonda asasula, alisasula mu bujjuvu.

⁵⁷Nditamiiza abakungu be nʼabasajja be abajjudde amagezi, ne bagavana, abʼebitongole awamu nʼabalwanyi; balyebaka emirembe gyonna era tebalizuukuka,” bwʼayogera Kabaka ayitibwa Mukama Katonda owʼEggye.

⁵⁸Bwʼati bwʼayogera Mukama Katonda owʼEggye nti, “Bbugwe wa Babulooni omunene alisendebwa era nʼemiryango gye emiwanvu gyokebwe; abantu beetawanyiza bwerere nga bafuba, okutawaana kwʼeggwanga kuliba nku za muliro.”

⁵⁹Buno bwe bubaka Yeremiya bwe yawa omukungu Seraya mutabani wa Neriya, mutabani wa Maseya, bwe yagenda e Babulooni ne Zeddekiya kabaka wa Yuda, nga Zeddekiya afuga mu mwaka gwe ogwokuna. Seraya ye yali omu ku bakungu abakulu.

⁶⁰Yeremiya yali awandiise mu muzingo ebikangabwa byonna ebyali bigenda okutuuka ku Babulooni, byonna ebyali biwandiikiddwa ebyali bikwata ku Babulooni.

⁶¹Yagamba Seraya nti, “Bwʼotuuka mu Babulooni, laba ngʼosoma mu ddoboozi eryʼomwanguka ebigambo bino byonna.

⁶²Olwo ogambe nti, ‘Ayi Mukama, ogambye nti olizikiriza ekifo kino, nti tewali nsolo oba muntu alikibeeramu; kibeere matongo emirembe gyonna.’

⁶³Bwʼomalanga okusoma omuzingo guno gusibeeko ejjinja ogukanyuge mu mugga Fulaati.

⁶⁴Olyoke ogambe nti, ‘Bwʼati Babulooni bwalisaanawo aleme kubbulukuka olwʼakabi ke ndimuleetako. Nʼabantu be balizikirira.’ ”

⁶⁴Ebigambo bya Yeremiya bikoma awo.