Yeremiya 52:1-34 LGCB2014 - Bible AI

¹Zeddekiya yali wa myaka amakumi abiri mu gumu egyʼobukulu we yafuukira kabaka, nʼafugira emyaka kkumi na gumu mu Yerusaalemi. Nnyina yayitibwanga Kamutali muwala wa Yeremiya owʼe Libuna.

²Zeddekiya nʼakola ebyʼomuzizo mu maaso ga Mukama, nga Yekoyakimu bwe yali akoze.

³Abalabe ba Yerusaalemi ne Yuda ne babalumba kubanga Mukama yali abanyiigidde. Ku nkomerero nʼabagobamu mu nsi. Ebyo byonna ne bituuka ku Yerusaalemi ne ku Yuda, Mukama nʼokubagoba nʼabagoba mu maaso ge, ne Zeddekiya nʼajeemera kabaka wʼe Babulooni.

⁴ⓐ Mu mwaka ogwʼomwenda ogwʼobufuzi bwa Zeddekiya, ku lunaku olwʼekkumi mu mwezi ogwʼekkumi, Nebukadduneeza kabaka wʼe Babulooni nʼeggye lye lyonna, nʼalumba Yerusaalemi, ekibuga ekyo nʼakizingiza nʼakizimbako ebifunvu okukyetooloola.

⁵Ekibuga ne bakizimbako ebifunvu okutuusa mu mwaka ogwʼekkumi nʼogumu ogwʼobufuzi bwa kabaka Zeddekiya.

⁶Ku lunaku olwʼomwenda olwʼomwezi ogwokuna enjala nʼeba nnyingi nnyo mu kibuga nga tewaali kyakulya.

⁷Bbugwe wʼekibuga yamenyebwa Abakaludaaya. Eggye lyonna erya Yerusaalemi ne lidduka okuva mu kibuga kiro nga bayita mu mulyango oguli wakati wʼebisenge ebibiri ebiri okumpi nʼennimiro lwa kabaka, newaakubadde ngʼAbakaludaaya baali beetoolodde ekibuga. Badduka ne bagenda mu Alaba.

⁸Eggye lyʼAbakaludaaya ne ligoba kabaka Zeddekiya ne bamukwatira mu nsenyi ezʼe Yeriko, Abaserikale be bonna ne bamuvaako ne basaasaana.

⁹Nʼakwatibwa.

⁹Zeddekiya nʼatwalibwa eri kabaka wʼe Babulooni e Libuna mu nsi eyʼe Kamasi; nʼamusalira omusango ne gumusinga.

¹⁰Awo kabaka wʼe Babulooni nʼatta batabani ba Zeddekiya nga kitaabwe alaba; nʼatta nʼabakungu bonna aba Yuda.

¹¹Nʼalyoka aggyamu Zeddekiya amaaso nʼamusiba mu masamba agʼebikomo nʼamutwala e Babulooni, gye yamuteeka mu kkomera okutuusa lwe yafa.

¹²Ku lunaku olwʼekkumi olwʼomwezi ogwokutaano, mu mwaka ogwʼekkumi ogwʼobufuzi bwa Nebukadduneeza kabaka wʼe Babulooni, Nebuzaladaani omuduumizi wʼeggye erikuuma kabaka, eyaweerezanga kabaka wʼe Babulooni, yajja e Yerusaalemi.

¹³Nebukadduneeza nʼayokya yeekaalu ya Mukama nʼolubiri lwa kabaka, nʼennyumba zonna eza Yerusaalemi. Buli kizimbe kyonna ekyʼomugaso nʼakyokya.

¹⁴Eggye lya Babulooni lyonna eryali liduumirwa omuduumizi wʼabakuumi bakabaka ne limenyera ddala ebisenge bya Yerusaalemi.

¹⁵Nebuzaladaani omuduumizi wʼabakuumi nʼatwala abamu ku baavu ennyo nʼabo abaasigala mu kibuga, awamu nʼabaweesi nʼabaali beewaddeyo, mu buwaŋŋanguse eri kabaka wʼe Babulooni.

¹⁶Naye Nebuzaladaani nʼasigazaayo abamu ku baavu ennyo mu ggwanga okulabiriranga emizabbibu nʼokulimanga.

¹⁷ⓑ Abakaludaaya ne bamenya empagi ezʼebikomo, nʼebikondo ebyali biseetulwa, nʼEnnyanja eyʼekikomo, ebyali mu nnyumba ya Mukama ne batwala ekikomo kyonna e Babulooni.

¹⁸Ne batwala nʼentamu, nʼebisena, nʼebisalako ebisirinza, nʼebibya, nʼebijiiko, nʼebintu byonna ebyʼekikomo ebyakozesebwanga mu kuweereza mu Yeekaalu.

¹⁹Omuduumizi wʼabakuumi ba kabaka nʼatwala ebensani nʼebibya byʼobubaane, nʼebijiiko, nʼebikondo bye ttaala, nʼebibya, nʼentamu ebikozesebwa mu kiweebwayo ekyokunywa, byonna ebyali byakolebwa mu zaabu ne ffeeza.

²⁰Ekikomo okuva ku mpagi ebbiri, nʼEnnyanja, nʼennume ekkumi nʼebbiri ezʼebikomo wansi waayo, nʼebikondo kabaka Sulemaani bye yali akoledde yeekaalu ya Mukama, byali bizito nnyo ebitapimika.

²¹Buli emu ku mpagi yali obuwanvu mita munaana ne desimoolo emu; nʼobwetoolovu mita ttaano ne desimoolo nnya; nʼomubiri gwayo gwali nga sentimita musanvu nga yamuwuluka.

²²Yaliko nʼomutwe gwʼekikomo, nʼomutwe gumu ngʼobuwanvu bwayo nga mita bbiri ne desimoolo ssatu, omutwe nga guliko ebitimbe nʼamakomamawanga enjuuyi zonna, byonna nga bya bikomo; empagi eyookubiri nayo yaliko ebifaanana ebyo nʼamakomamawanga.

²³Mu buli mbiriizi za buli mpagi kwaliko amakomamawanga kyenda mu mukaaga era gonna awamu okwetooloola empagi gaali amakomamawanga kikumi.

²⁴Omuduumizi wa bakuumi nʼatwala Seraaya kabona asinga obukulu ne Sefaniya kabona owookubiri nʼabaggazi abasatu nga basibe.

²⁵Abo abaali bakyali mu kibuga, nʼatwalako omukungu akulira eggye, nʼabawi bʼamagezi omusanvu. Nʼatwala nʼomuwandiisi eyali omukungu omukulu avunaanyizibwa okuwandiika abayingira mu magye ne basajja be nkaaga abaasangibwa mu kibuga.

²⁶Nebuzaladaani omuduumizi nʼabatwala bonna nʼabaleeta eri kabaka wʼe Babulooni e Libuna.

²⁷Kabaka nʼabattira eyo e Libuna, mu Kamasi.

²⁷Bwʼatyo Yuda nʼawaŋŋangusibwa, okuva mu nsi ya boobwe.

²⁸Buno bwe bungi bwʼabantu Nebukadduneeza be yatwala mu buwaŋŋanguse mu mwaka ogwʼomusanvu ogwʼobufuzi bwe:

²⁸Abayudaaya enkumi ssatu mu amakumi abiri mu basatu;

²⁹mu mwaka ogwʼomunaana ogwa Nebukadduneeza,

²⁹nʼatwala lunaana mu asatu mu babiri okuva e Yerusaalemi;

³⁰mu mwaka gwe ogwʼamakumi abiri mu esatu, Bonna awamu ne baba abantu enkumi nnya mu lukaaga.

³⁰Abayudaaya lusanvu mu ana mu bataano be baatwalibwa Nebuzaladaani omuduumizi wa bakuumi wa kabaka.

³¹Awo mu mwaka ogwʼamakumi asatu mu omusanvu ogwʼokusibibwa kwa Yekoyakini kabaka wa Yuda, mu mwaka Evirumerodaki lwe yafuuka kabaka wʼe Babulooni, nʼata Yekoyakini kabaka wa Yuda, nʼamuggya mu kkomera ku lunaku olwʼamakumi abiri mu etaano olwʼomwezi ogwʼekkumi nʼebiri.

³²Nʼayogera naye nʼekisa nʼamuwa entebe eyʼekitiibwa eya waggulu okusinga eza bakabaka abalala abaali naye e Babulooni.

³³Yekoyakini nʼakyusa okuva mu ngoye ezʼekkomera era obulamu bwe obusembayo nʼaliranga ku mmeeza ya kabaka.

³⁴Era kabaka wʼe Babulooni yawanga Yekoyakini ensako eya buli lunaku, obulamu bwe bwonna okutuusa lwe yafa.