Yeremiya 7:1-34 LGCB2014 - Bible AI

¹Kino kye kigambo ekyajjira Yeremiya okuva eri Mukama.

²Yimirira ku mulyango gwʼennyumba ya Mukama otegeeze abantu obubaka buno.

²Muwuliriza ekigambo kya Mukama, mmwe mwenna abantu ba Yuda abayita mu miryango gino okusinza Mukama.

³Bwʼati bwʼayogera Mukama owʼEggye, Katonda wa Isirayiri nti, “Mulongoose amakubo gammwe nʼebikolwa byammwe, nange ndibalekera ekifo kino ne mubeeramu.

⁴Teweesiga bigambo bino ebibuzaabuza ne mwogera nti, ‘Eno ye yeekaalu ya Mukama, yeekaalu ya Mukama, yeekaalu ya Mukama!’

⁵‘Kubanga bwe munaalongoosezanga ddala amakubo gammwe nʼebikolwa byammwe; era bwe munaalaganga obwenkanya eri omuntu ne munne,

⁶ne mulekayo okunyigiriza omugwira, ne mulekwa, ne nnamwandu, ne mulekayo nʼokutta abataliiko musango mu kifo ekyo, era ne mutasinza bakatonda abalala okwereetera emisango mmwe bennyini,

⁷kale ndibatuuza mu kifo ekyo mu nsi gye nawa bajjajjammwe ebeere yammwe emirembe nʼemirembe.

⁸Kale laba, mwesiga ebigambo ebitaliimu, ebitagasa.

⁹“Munabba ne mutta, ne mukola obwenzi ne mulayira ebyʼobulimba, ne mwoteza obubaane eri Baali, ne mutambula okugoberera bakatonda abalala be mutamanyanga;

¹⁰ne mulyoka mujja ne muyimirira mu maaso gange mu nnyumba eno, eyitibwa Erinnya lyange, ne mugamba nti, ‘Tuli bulungi, tuli bulungi,’ ne mulyoka mukola ebyʼemizizo byonna?

¹¹ⓘ Mulowooza nti ennyumba eno eyitibwa ennyumba yange, mpuku yʼabanyazi? Laba, nze kennyini nkirabye,” bwʼayogera Mukama.

¹²ⓙ “Mugende kaakano mu kifo kyange ekyali e Siiro ekifo gye nasooka okuteeka essinzizo lyʼerinnya lyange, mulabe kye nakikola olwʼekibi kyʼabantu bange Isirayiri.

¹³Bwʼati bwʼayogera Mukama nti, Bwe mwali mukola ebintu bino byonna, nayogera nammwe emirundi mingi naye ne mutampulira; nabakoowoola ne mutampitaba.

¹⁴Noolwekyo, ekyo kye nakola e Siiro nzija kukikola kaakano ku nnyumba eyitibwa Erinnya lyange, era gye mwesiga, era nʼebifo bye nabawa mmwe ne bakitammwe.

¹⁵Ndibagoba ne mu maaso gange, nga bwe nagoba baganda bammwe bonna, ezzadde lya Efulayimu lyonna.

¹⁶“Noolwekyo tosabira bantu abo wadde okubegayiririra newaakubadde okubasabira oba okubawolereza, kubanga siikuwulire.

¹⁷Tolaba bye bakola mu bibuga bya Yuda era ne mu nguudo za Yerusaalemi?

¹⁸ⓚ Abaana balonda enku, bakitaabwe ne bakuma omuliro, olwo abakazi ne bakanda eŋŋaano ne bakolera kabaka wʼeggulu omukazi emigaati. Bafuka ekiweebwayo ekyokunywa eri bakatonda abalala okunkwasa obusungu.

¹⁹Naye nze gwe balumya?” bwʼayogera Mukama. “Tebeerumya bokka, ne beeswazaswaza?”

²⁰Noolwekyo bwʼatyo bwʼayogera Mukama nti, “Laba obusungu bwange nʼekiruyi kyange bijja kufukibwa ku kifo kino, ku bantu ne ku nsolo, ku miti egyʼomu ttale era ne ku bibala ebyʼomu ttaka; bujja kubuubuuka era tebujja kukoma.”

²¹“Bwʼati bwʼayogera Mukama owʼEggye, Katonda wa Isirayiri nti, Mugatte ebiweebwayo byammwe ebyokebwa ku ssaddaaka zammwe, ennyama mugyeriire.

²²Kubanga ku lunaku lwe nabaggya mu Misiri saayogera eri bakitammwe wadde okubalagira ebikwata ku biweebwayo ebyokebwa wadde ssaddaaka.

²³Naye etteeka lino lye nabawa ligamba nti, ‘Muŋŋondere, nange nnaabeera Katonda wammwe, nammwe munaabeera bantu bange. Mutambulire mu makubo gonna ge mbalagira, mulyoke mubeere bulungi.’

²⁴Naye tebampulira wadde okunzisaako omwoyo, wabula bagoberera okuteesa kwʼemitima gyabwe egijjudde ebibi. Badda emabega so tebaalaga mu maaso.

²⁵Okuva mu biseera bajjajjammwe bye baaviiramu e Misiri okutuusa kaakano, mbadde mpeereza abaddu bange bannabbi emirundi nʼemirundi.

²⁶Naye tebampuliriza wadde okunzisaako omwoyo, bakakanyaza ensingo zaabwe era ne bakola ebibi ne basinga ne bajjajjaabwe.”

²⁷“Kale ojja kubagamba bino byonna naye tebajja kukuwuliriza, bwʼonoobayita tebajja kukwanukula.

²⁸Noolwekyo bagambe nti, ‘Lino lyʼeggwanga eritagondera Mukama Katonda waalyo oba okufaayo ku kugololwa. Amazima gabulawo, tegali ku mimwa gyabwe.

²⁹Salako enviiri zo ggwe Yerusaalemi, ozisuule wala ddala okaabire ku ntikko zʼensozi, kubanga Mukama alese abantu be era nʼasuula abʼomu mulembe guno mwʼasunguwalidde ennyo.’ ”

³⁰“Abantu ba Yuda bakoze ekintu ekyʼekivve mu maaso gange, bwʼayogera Mukama. Batadde bakatonda abalala mu nnyumba yange eyitibwa erinnya lyange ne bagyonoona.

³¹ⓛ Bazimbye ebifo ebigulumivu ebya Tofesi mu kiwonvu kya mutabani wa Kinomu ne bassaddaakiramu batabani baabwe be bazaala nʼabawala, kye saalowoozaako wadde okukibalagira.

³²Laba, ennaku zijja,” bwʼatyo bwʼayogera Mukama, bwe kitariyitibwa Kiwonvu kya Tofesi oba ekya Kinnomu ne kiyitibwa Kiwonvu kya ttambiro: kubanga baliziikamu Tofesi okutuusa we wataliba bbanga lya kuziikamu.

³³Era emirambo gyʼabantu bano gifuuke emmere yʼebinyonyi ebyʼomu bbanga era nʼensolo ezʼomu nsiko, era waleme kubaawo muntu wakuzigoba;

³⁴ⓜ olwo nga nkomezza amaloboozi agʼokusanyuka nʼokujaguza, nʼeddoboozi lyʼomusajja awasa nʼeryʼomugole we mu bibuga bya Yuda ne mu nguudo za Yerusaalemi, olwo ensi ngʼefuuse matongo.