Yeremiya 8:1-22 LGCB2014 - Bible AI

¹“Mu kiseera ekyo, bwʼayogera Mukama, amagumba ga bakabaka ba Yuda, nʼamagumba gʼabalangira, nʼamagumba ga bakabona, nʼamagumba ga bannabbi, nʼamagumba gʼabatuuze bʼomu Yerusaalemi galiggyibwa mu ntaana zaago.

²Kale galyanikibwa mu musana, eri omwezi nʼemmunyeenye ezʼomu ggulu, ze baayagala era ne baaweereza era ze baagoberera ne beebuuzaako ne basinza. Tebalikuŋŋaanyizibwa wadde okuziikibwa naye balibeera ngʼebisasiro wansi ku ttaka.

³Nʼabantu bʼensi eno ennyonoonyi bwʼetyo abalisigalawo, be ndiba nsasaanyizza mu mawanga, balyegomba okufa okusinga okuba abalamu,” bwʼayogera Mukama Katonda owʼEggye.

⁴“Bategeeze nti, Bwʼati bwʼayogera Mukama nti, Omuntu bwʼagwa, tayimuka? Oba omuntu bwʼava mu kkubo ettuufu, takyusa nʼadda?

⁵Kale lwaki abantu bange bano banvaako ne bagendera ddala?

⁶Nawuliriza nʼobwegendereza naye tebayogera mazima; tewali muntu yenna yeenenya bibi byakoze nʼokwebuuza nti, ‘Kiki kino kyenkoze?’ Buli muntu akwata kkubo lye ngʼembalaasi efubutuka ngʼetwalibwa mu lutalo.

⁷Ebinyonyi ebibuukira mu bbanga bimanyi ebiseera mwe bitambulira; ne kaamukuukulu nʼakataayi ne ssekanyolya bimanyi ebiseera mwe bikomerawo, naye abantu bange tebamanyi biragiro bya Mukama.”

⁷

⁸Muyinza mutya okwogera nti, “Tuli bagezi nnyo, nʼamateeka ga Mukama tugalina, ate nga ekkalaamu yʼabawandiisi eyʼobulimba yeebikyusizza.

⁹Abagezigezi baliswala ne bakeŋŋentererwa era balitwalibwa. Bagaanyi ekigambo kya Mukama, magezi ki ge balina?

¹⁰ⓝ Noolwekyo bakazi baabwe ndibagabira abasajja abalala nʼennimiro zaabwe zitwalibwe abantu abalala. Bonna ba mululu okuva ku asembayo wansi okutuuka ku akomererayo waggulu, nnabbi ne kabona bonna balimba ne babba abantu.

¹¹ⓞ Ebiwundu byʼabantu bange babijjanjaba nga tebafaayo, babikomya kungulu nga boogera nti, Mirembe, Mirembe, ate nga teri mirembe.

¹²Baakwatibwa ensonyi bwe baakola ebivve? Nedda tebakwatibwa nsonyi wadde, so tebamanyi wadde okulimbalimba. Noolwekyo baligwira mu bagudde, balikka lwe balibonerezebwa,”

¹²bwʼayogera Mukama.

¹³“Ndimalirawo ddala amakungula gaabwe,” Tewaliba zabbibu, na mutiini, nʼebikoola byabwe biriwotoka. Bye mbawadde biribaggyibwako.

¹³bwʼayogera Mukama.

¹⁴Kiki ekitutuuzizza wano obutuuza? Mukuŋŋaane. Tuddukire mu bibuga ebiriko bbugwe tuzikiririre eyo. Mukama Katonda atuwaddeyo tuzikirire era atuwadde amazzi agalimu obutwa tuganywe, kubanga twonoonye mu maaso ge.

¹⁵Twasuubira mirembe naye tewali bulungi bwajja; twasuubira ekiseera ekyʼokuwonyezebwa naye waaliwo ntiisa.

¹⁶Okukaaba kwʼembalaasi zʼomulabe kuwulirwa mu Ddaani; ensi yonna yakankana olwʼokukaaba kwʼembalaasi. Bajja okuzikiriza ensi ne byonna ebigirimu, ekibuga ne bonna abakibeeramu.

¹⁶

¹⁷“Laba, ndikusindikira emisota egyʼobusagwa, amasalambwa gʼotasobola kufuga, emisota egyo girikuluma,”

¹⁷bwayogera Mukama.

¹⁸Nnina ennaku etewonyezeka, omutima gwange gwennyise.

¹⁹Wuliriza okukaaba kwʼabantu bange okuva mu nsi eyʼewala. “Mukama taliimu mu Sayuuni? Kabaka we takyalimu?” “Lwaki bansunguwaza nʼebifaananyi byabwe, bakatonda abalala abatagasa?”

²⁰“Amakungula gayise, nʼekyeya kiyise, tetulokolebbwa.”

²¹Nnumiziddwa olwʼokulumizibwa kwa muwala wange. Nkaaba ne nzijula ennaku.

²²Teri ddagala mu Gireyaadi? Teriiyo musawo? Lwaki ekiwundu kyʼabantu bange tekiwonyezebwa?