Yobu 1:1-22 LGCB2014 - Bible AI

¹ⓐ Waaliwo omusajja mu nsi ya Uzzi[1] erinnya lye Yobu; yali muntu ataliiko kya kunenyezebwa, nga wa mazima, eyeewalanga ekibi, era ngʼatya Katonda.

²Yalina abaana aboobulenzi musanvu nʼaboobuwala basatu.

³ⓑ Mu byobugagga ebingi ennyo bye yalina; mwe mwali endiga kasanvu, eŋŋamira enkumi ssatu, emigogo gyʼente ezirima ebikumi bitaano, endogoyi enkazi ebikumi bitaano, nʼabaddu bangi nnyo nnyini; yali mwatiikirivu okusinga abantu abalala bonna mu nsi zʼebuvanjuba.

⁴Batabani be baakwatanga embaga zʼamazaalibwa gaabwe buli omu mu mpalo ngʼennaku zaabwe bwe zaali ziddiriŋŋananga mu maka ga buli omu; era baayitanga bannyinaabwe bonsatule okubajagulizaangako.

⁵ⓒ Ennaku zʼembaga bwe zaggwangako, Yobu yabatumyanga nʼabatukuza;[2] yakeeranga mu makya nʼabaweerangayo ebiweebwayo ebyokebwa ngʼomuwendo gwabwe bwe gwali ngʼalowooza nti, “Oboolyawo ngʼabaana bange bayonoonye ne bavvoola Katonda mu mitima gyabwe.” Kino yakikolanga bulijjo.

⁶ⓓ Olunaku lumu, bamalayika ne bajja mu maaso ga Mukama, ne Setaani naye nʼajjiramu.

⁷Mukama nʼabuuza Setaani nti, “Ova wa?”

⁷Setaani nʼaddamu Mukama nti, “Nva kutalaaga nsi yonna okulaba ebintu nga bwe biri.”

⁸Mukama Katonda nʼabuuza Setaani nti, “Weetegerezza omuddu wange Yobu, atalina amufaanana, anzisaamu ekitiibwa, ataliiko kyakunenyezebwa era eyeewala buli ngeri yonna eyinza okukozesa omuntu ebibi?”

⁹ⓔ Setaani nʼaddamu Mukama Katonda nti, “Ekitiibwa akussaamu kya bwereere?

¹⁰Tomukozeeko lukomera ye nʼennyumba ye, nʼebyʼobugagga byʼalina? Buli kyʼakola okiwadde omukisa; nʼebyʼobugagga bye byeyongedde nnyo obungi!

¹¹ⓕ Kale geza okwate ku byʼalina obimuggyeko olabe nga taakwegaane nga nʼensi yonna eraba!”

¹²Mukama Katonda nʼagamba Setaani nti, “Byonna byʼalina biri mu mikono gyo, naye togeza nʼokwata ku bulamu bwe.” Oluvannyuma lwʼebyo Setaani nʼava mu maaso ga Mukama.

¹³Awo olunaku lumu, batabani ba Yobu ne bawala be bwe baali banywa omwenge era nga baliira ebyassava mu maka ga mukulu waabwe,

¹⁴omubaka nʼajja eri Yobu nʼamugamba nti, “Ente zibadde zirima nga nʼendogoyi ziri kumpi nazo,

¹⁵ⓖ Abaseba[3] ne bazigwako ne bazitwala era nʼabaddu bonna ne babatta nze nsigaddewo nzekka okujja okukutegeeza bino.”

¹⁶Oyo aba akyayogera ebyo, laba, omubaka omulala nʼatuuka naye nʼamugamba nti, “Omuliro gubuubuuse nga guva mu ggulu ne gusaanyaawo endiga zonna nʼabasumba baazo, nze nsigaddewo nzekka okukutegeeza bino.”

¹⁷Nʼoyo aba akyayogera, nʼomubaka omulala nʼatuuka, nʼagamba nti, “Abakaludaaya[4] bazze nga beetegese mu bibinja bisatu, ne bagwa ku ŋŋamira ne bazitwala era ne batta nʼabaddu ababadde bazirabirira, era nze nzekka nze nsigaddewo okujja okukumanyisa bino.”

¹⁸Aba akyayogera, laba, nʼomulala nʼajja nʼamugamba nti, “Batabani bo ne bawala bo babadde baliira era nga banywera omwenge mu nnyumba ya mukulu waabwe,

¹⁹ⓗ laba, omuyaga ogwʼamaanyi guvudde mu ddungu ne gugoyaagoya ennyumba yonna mwe babadde era bonna bafiiriddemu nze mponyeewo nzekka okujja okukubikira.”

²⁰Yobu olwawulira bino byonna, nʼagolokoka nʼayuza ebyambalo bye nʼamwa omutwe gwe, nʼavuunama nʼasinza:

²¹ⓘ nʼagamba nti,

²¹“Nazaalibwa sirina kantu era bwe ntyo bwe ndiddayo. Mukama ye yawa era Mukama yʼaggyeewo, erinnya lya Mukama Katonda lyebazibwe.”

²²Mu bino byonna Yobu teyayonoona kubanga teyeemulugunyiza Katonda.