Yobu 10:1-22 LGCB2014 - Bible AI

¹“Obulamu bwange mbukyayidde ddala, noolwekyo leka nfukumule okwemulugunya kwange, njogerere mu kulumwa kwʼemmeeme yange.

²Nnaagamba Katonda nti, Tonsalira musango ne gunsinga, ntegeeza kyʼonvunaana.

³Kikusanyusa okunnyigiriza, okunyooma omulimu gwʼemikono gyo, nʼowagira emirimu gyʼabakozi bʼebibi?

⁴Amaaso go ga mubiri? Olaba ngʼomuntu bwʼalaba?

⁵Ennaku zo zisinga ezʼomuntu, nʼemyaka gyo gisinga egyʼomuntu,

⁶olyoke onoonye ebisobyo byange era obuulirize ekibi kye nkoze,

⁷newaakubadde ngʼomanyi nti sirina musango era nga tewali nʼomu ayinza kunzigya mu mukono gwo?

⁷

⁸“Emikono gyo gye gyammumba, gye gyankola. Ate kaakano onookyuka okunsanyaawo?

⁹Jjukira nti wammumba ngʼebbumba, ate kaakano onoonfuula ngʼenfuufu?

¹⁰Tewanzitulula ngʼamata nʼonkwasa ngʼomuzigo?”

¹¹Tewannyambaza omubiri nʼolususu, nʼoluka amagumba nʼebinywa nʼongatta?

¹²Kale wampa okuganja mu maaso go, era walabirira, nʼomwoyo gwange.

¹³Naye bino wabikweka mu mutima gwo, era mmanyi nga byali mu birowoozo byo.

¹⁴Singa nyonoona, ondaba era tewandindese nʼotombonereza.

¹⁵Bwe mba nga nsingibbwa omusango, zinsanze nze! Newaakubadde nga sirina musango, sisobola kuyimusa mutwe gwange, kubanga nzijjudde obuswavu era mu kunyigirizibwa kwange, mwe nsaanikiddwa.

¹⁶Bwe mba ngʼasituka, nʼonjigga ngʼempologoma, era nʼonnumba nʼamaanyi go amangi ennyo.

¹⁷Oleeta abajulizi abajja okunnumiriza, era obusungu bwo ne bweyongera gye ndi; amayengo ne gajja okunnumba olutata.

¹⁷

¹⁸“Kale lwaki wanziggya mu lubuto lwa mmange? Wandindese nga tewannabaawo liiso lyonna lindabyeko.

¹⁹Singa satondebwa, oba singa natwalibwa butereevu okuva mu lubuto ne nzikibwa.

²⁰Ennaku zange entono kumpi teziweddeeko? Ndeka mbeeko nʼakaseera akʼokusanyuka,

²¹nga sinnaba kugenda mu kifo eteri kudda, ekiri mu nsi ejjudde ekizikiza, nʼekisiikirize ekyʼebuziba,

²²yʼensi eyʼekizikiza ekikutte, eyeekisiikirize ekyʼebuziba era nʼokutabukatabuka, ngʼomusana gwayo guli nga ekizikiza.”