Yobu 2:1-13 LGCB2014 - Bible AI

¹Ku lunaku olulala bamalayika ne bajja okukiika mu maaso ga Mukama Katonda, ne Setaani naye nʼajjiramu.

²Mukama Katonda nʼabuuza Setaani nti, “Ova wa?” Setaani nʼamuddamu nti, “Nva kutalaaga ensi yonna.”

³Mukama Katonda nʼagamba Setaani nti, “Olowoozezza ku muddu wange Yobu? Talina kyakunenyezebwa, mwesimbu, atya Katonda era eyeewala ekibi bwʼatyo talina amufaanana. Anywezezza obutuukirivu bwe newaakubadde nga wansokasoka mmuzikirize awatali nsonga.”

⁴Setaani nʼamuddamu nti, “Eddiba olwʼeddiba, omuntu kyaliva awaayo byonna byʼalina olwʼokuwonya obulamu bwe;

⁵naye golola omukono gwo okwate ku magumba ge nʼomubiri gwe olabe oba taakwegaane.”

⁶Mukama Katonda nʼamugamba nti, “Weewaawo, ali mu mukono gwo, kyokka mulekere obulamu bwe.”

⁷Awo Setaani nʼava awali Mukama Katonda, nʼalwaza Yobu amayute amazibu okuva ku mutwe, okutuukira ddala ku bigere.

⁸Yobu nʼatandika okweyaguzanga oluggyo ngʼeno bwʼatudde mu vvu.

⁹Kyokka mukyala we nʼamugamba nti, “Okyagugubidde ku butuukirivu bwo? Weegaane Katonda ofe!”

¹⁰Naye ye nʼamuddamu nti, “Oyogera ngʼomu ku bakazi abatategeera bwe bandyogedde! Tunaafunanga birungi byereere mu mukono gwa Katonda?” Mu bino byonna Yobu teyayonoona na kamwa ke.

¹¹Awo mikwano gya Yobu abasatu; Erifaazi[5] Omutemani, Birudaadi Omusuki, ne Zofali Omunaamasi bwe baawulira emitawaana egyali gituuse ku mukwano gwabwe, ne bajja buli omu okuva ewuwe ne basisinkana nga bwe baali bateesezza, bagende bamusaasire bamuzzeemu amaanyi.

¹²Tebaamutegeererawo nga bakyali wala, olwʼembeera gye yalimu; ne bayimusa amaloboozi gaabwe ne bakuba ebiwoobe ne bayuza ebyambalo byabwe ne bayiwa enfuufu ku mitwe gyabwe.

¹³Awo ne batuula naye we yali atudde okumala ennaku musanvu emisana nʼekiro nga tewali anyega, olwʼobulumi obungi Yobu bwe yalimu.