Yobu 24:1-25 LGCB2014 - Bible AI

¹Lwaki Ayinzabyonna tagera biseera? Lwaki abo abamumanyi tebalaba nnaku zaageze?

²Abantu bajjulula amayinja agalamba ensalo, ne balunda ebisolo bye babbye.

³Batwala endogoyi ya mulekwa ne batwala ennume ya nnamwandu ngʼomusingo.

⁴Basindiikiriza omunaku ne bamuggya mu kkubo, ne bawaliriza abaavu bonna mu ggwanga okwekweka.

⁵Endogoyi ezʼomu ddungu nga bwe zeeyisa, nʼabaavu bagenda bategana nnyo nga balondalonda obumere; mu ddungu mwe balonderera emmere yʼabaana baabwe.

⁶Essubi eririibwa ensolo zaabwe baliggya ku ttale lye, ne banoga nʼemizabbibu gyʼaboonoonyi.

⁷Olwʼokubulwa engoye, basula bwereere; tebalina kye beebikka mu mpewo.

⁸Enkuba yʼoku nsozi ebatobya, ne banywegera enjazi olwʼokubulwa we beggama.

⁹Omwana atalina kitaawe bamusika ku mabeere; omwana omuwere owʼomwavu bamuwamba olwʼebbanja.

¹⁰Olwʼokubulwa engoye bayita bwereere; betikka ebinywa byʼemmere naye basigala tebalidde.

¹¹Basogolera emizabbibu ku mayinja, ne basambira mu ssogolero, naye ne basigala nga balumwa ennyonta.

¹²Okusinda kwʼabantu kuwulirwa mu kibuga, nʼemmeeme zʼabafunye ebisago zikaabira obuyambi. Naye Katonda talina gwʼasinzisa musango.

¹³Waliwo abo abajeemera omusana, abatamanyi makubo ge, abatasigala mu kwaka kwagwo.

¹⁴Omutemu agolokoka nga obudde buzibye nʼatta omwavu nʼali mu kwetaaga; Ekiro abbira ddala.

¹⁵Eriiso lyʼomwenzi lirinda buzibe, ngʼagamba nti, ‘Tewali liiso linandaba,’ nʼabikka ne ku maaso ge.

¹⁶Mu kizikiza mwe basimira amayumba, kyokka emisana baba beggalidde. Tebaagala kitangaala.

¹⁷Eri abo bonna ekizikiza ekikutte bwe budde bwabwe obwʼoku makya. Kubanga bakola omukwano nʼebitiisa ebyʼomu nzikiza.

¹⁸Bali ngʼebyovu ebiri kungulu ku mazzi, era omugabo gwabwe mukolimire mu nsi. Tewali musogozi nʼomu alaga mu nnimiro zaabwe ezʼemizabbibu.

¹⁹Nga ekyeeya nʼebbugumu bwe bimalawo amazzi agava mu muzira, aboonoonyi bwe batyo bwe bamalibwawo emagombe.

²⁰Olubuto lunaamwerabiranga; envunyu eneemulyanga nʼewoomerwa; Tajjukirwenga nate, Omukozi wʼebibi amenyeka ngʼomuti.

²¹Bayiikiriza ne banyaga omugumba atazaala. Tebakolera nnamwandu bya kisa.

²²Naye Katonda awalula abʼamaanyi olwʼobuyinza bwe. Newaakubadde nga bakulaakulana, kyokka tebalina bukakafu ku bulamu bwabwe.

²³Ayinza okubaleka ne babeera mu mirembe nʼamaaso ge gabeera ku makubo gaabwe.

²⁴Bayimusibwa akaseera katono, oluvannyuma nga tebakyaliwo. Bakkakkanyizibwa ne bakala ne baggyibwawo nga abalala bonna. Basalibwa ngʼemitwe gyʼebirimba byʼeŋŋaano.

²⁵Bwe kiba nga si bwe kiri, ani anannumiriza obulimba, nʼafuula okwogera kwange okutaliimu?”