Yobu 36:1-33 LGCB2014 - Bible AI

¹Eriku ne yeeyongera okwogera nti,

²“Yongera okuŋŋumiikirizaako katono nkulage, nkyalina bye nnina okwogera ebifa ku Katonda.

³Amagezi ge nnina gava wala, era mmanyi nga Omutonzi wange alamula mu bwenkanya.

⁴Ekyʼamazima ebigambo byange si bikyamu, oyo akakasa byʼamanyi yʼayogera naawe.”

⁴

⁵“Laba, Katonda wa buyinza, tanyooma bantu; wʼamaanyi, anywerera ku bigendererwa bye.

⁶Talamya bakozi ba bibi, era awa ababonyaabonyezebwa ebibasaanira.

⁷Taggya maaso ge ku batuukirivu, abatuuza ku ntebe eyʼobwakabaka nʼabagulumiza emirembe nʼemirembe.

⁸Naye abantu bwe baba basibiddwa enjegere nga banywezeddwa nʼemiguwa egyʼokulumwa

⁹nʼabategeeza ensobi zaabwe, nʼokwonoona kwabwe, nti, beewaggudde,

¹⁰aggula amatu gaabwe bawulirize okunenyezebwa nʼabalagira beenenye ekibi kyabwe.

¹¹Bwe bamugondera ne bamuweereza, ennaku zaabwe zonna balizimala mu kwesiima, era nʼemyaka gyabwe mu kusanyuka.

¹²Naye bwe batamugondera, baalizikirizibwa nʼekitala, bafe nga tebalina magezi.”

¹²

¹³“Abʼemitima egitatya Katonda baba nʼobukyayi. Ne bwʼabasiba, tebamukaabirira abasumulule.

¹⁴Bafiira mu buvubuka bwabwe era obulamu bwabwe buzikiririra mu basajja abenzi.

¹⁵Anunula anyigirizibwa mu kubonaabona kwe, nʼaggula okutu kwe mu kujoogebwa kwe.”

¹⁵

¹⁶“Akusendasenda okukuggya mu kamwa kʼokubonaabona, akuteeke mu kifo ekigazi ekitaliimu kuziyizibwa, omanye emirembe gyʼemeeza yo ejjudde emmere ennungi.

¹⁷Naye kaakano weetisse omugugu ogwʼokusalirwa omusango abakozi bʼebibi gwe basaanira; okusalirwa omusango nʼobwenkanya byakunyweza.

¹⁸Weegendereze oleme kukkiriza kusendebwasendebwa; obunene bwʼenguzi buleme okukukyamya.

¹⁹Obugagga bwo oba okufuba kwo kwonna binaakuyamba okukuggya mu buyinike?

²⁰Teweegomba budde bwa kiro olyoke owalule abantu okuva mu bifo byabwe.

²¹Weegendereze oleme kukola bitali bya butuukirivu, byʼosinga okwagala okukira okubonyaabonyezebwa.”

²¹

²²“Laba Katonda yagulumira mu maanyi ge; ani ayigiriza nga ye?

²³Ani eyali amukubidde amakubo, oba okumugamba nti, ‘Kyʼokoze si kituufu?’

²⁴Jjukira ngʼoteekwa okugulumizanga emirimu gye, abantu gye bayimba mu nnyimba.

²⁵Abantu bonna baagiraba, omuntu agirengerera wala.

²⁶Laba, Katonda agulumizibwe! Assukiridde okutegeera kwaffe; obungi bwʼemyaka gye tebunoonyezeka.”

²⁶

²⁷“Kubanga akuŋŋaanya amatondo gʼamazzi, agafuuka enkuba etonnya mu bugga;

²⁸ebire bivaamu amazzi gaabyo, enkuba nʼekuba abantu.

²⁹Ani ayinza okutegeera engeri gyʼasaasaanyamu ebire, okubwatuka okuva ku kituuti kye?

³⁰Laba, asaasaanya okumyansa kwʼeggulu, era nʼabikka obuziba bwʼennyanja.

³¹Eyo yʼengeri gyʼafugamu amawanga, nʼagawa emmere mu bungi.

³²Emikono gye agijjuza eraddu, nʼagiragira ekube ebifo bye yeerondeddemu.

³³Okubwatuka kwayo kulangirira kibuyaga ajja, nʼente ne zirangirira okujja kwayo.”