Yobu 42:1-17 LGCB2014 - Bible AI

¹Awo Yobu nʼaddamu Mukama nti,

²“Mmanyi ngʼoyinza okukola ebintu byonna, era tewali kyotegeka kyonna kiyinza kuziyizibwa.

³Wabuuza nti, ‘Ani ono aziyiza okuteesa kwange atalina magezi?’ Mazima ddala nayogera ebintu bye sitegeera, ebintu ebyassukirira okutegeera kwange.

³

⁴“Wulira nkwegayiridde, nange mbeeko kye nkubuuza, onziremu.

⁵Amatu gange gaali gaakuwulirako dda, naye kaakano amaaso gange gakulabye.

⁶Kyenvudde neenyooma era neenenyezza mu nfuufu ne mu vvu.”

⁷Nga Mukama amaze okwogera ebigambo bino eri Yobu, nʼagamba Erifaazi Omutemani nti, “Nkunyiigidde ggwe ne mikwano gyo ababiri; kubanga temwanjogerako bituufu, ngʼomuddu wange Yobu bwʼakoze.

⁸Noolwekyo kaakano mutwale ente ennume musanvu, nʼendiga ennume musanvu, mugende eri omuddu wange Yobu, mweweereyo eyo ekiweebwayo ekyokebwa, nʼomuddu wange Yobu ajja kubasabira, kubanga nzija kukkiriza okusaba kwe nneme okubakolako ngʼobusirusiru bwammwe bwe buli. Kubanga temwanjogerako bituufu ngʼomuddu wange bwʼakoze.”

⁹Awo Erifaazi Omutemani, ne Birudaadi Omusuki, ne Zofali Omunaamasi ne bagenda ne bakola nga Mukama bwe yabalagira. Awo Mukama nʼakkiriza okusaba kwa Yobu.

¹⁰Awo Mukama nʼaggyawo ennaku ya Yobu bwe yamala okusabira mikwano gye. Mukama nʼawa Yobu ebintu emirundi ebiri okusinga bye yalina okusooka.

¹¹Awo baganda be bonna ne bannyina bonna ne bajja nʼabo abaali bamumanyi okusooka, ne balya naye emmere mu nnyumba ye; ne bamusaasira ne bamukulisa okubonaabona kwonna Mukama kwe yakkiriza okumutuukako. Buli omu ku bo nʼamuwaayo ffeeza nga bwe yasobola, nʼempeta ya zaabu.

¹²Awo Mukama nʼawa Yobu omukisa mu nnaku ze ezaasembayo nʼokusinga entandikwa ye bwe yali: yafuna endiga omutwalo gumu mu enkumi nnya, nʼeŋŋamira kakaaga, ne ziseddume zʼente lukumi, nʼendogoyi enkazi lukumi.

¹³Era Mukama nʼamuwa nʼabaana aboobulenzi musanvu, nʼaboobuwala basatu.

¹⁴Omuwala owʼolubereberye nʼamutuuma Yemima, nʼowokubiri nʼamutuuma Keeziya, nʼowookusatu nʼamutuuma Keremukappuki, nʼaboobulezi musanvu.

¹⁵Awo mu nsi yonna ne wataba bakazi balungi kwenkana bawala ba Yobu. Kitaabwe nʼabawa omugabo ogwʼebintu ogwenkanankana ne gwe yawa bannyinaabwe abalenzi.

¹⁶Oluvannyuma lwʼebyo, Yobu nʼawangaala emyaka kikumi mu ana; nʼalaba ku baana be ne ku bazzukulu be okutuuka ku bannakasatwe.

¹⁷Nʼoluvannyuma nʼafa ngʼakaddiyidde ddala ngʼawezezza emyaka mingi.