Yokaana 1:1-51 LGCB2014 - Bible AI

¹Kigambo yaliwo ngʼensi tennatondebwa. Kigambo[1] yali ne Katonda, era Kigambo yali Katonda.

²Oyo, okuva ku lubereberye yaliwo ne Katonda.

³Ebintu byonna byatondebwa ku lulwe, era tewaliiwo kintu na kimu ekyatondebwa nga taliiwo.

⁴Mu ye mwe mwali obulamu; era obulamu buno ne buba ekitangaala eri abantu.

⁵Omusana ne gwaka mu kizikiza, naye ekizikiza tekyaguyinza.

⁶Ne walabika omuntu ngʼayitibwa Yokaana, Katonda gwe yatuma,

⁷eyajja okutegeeza abantu ebifa ku musana, bonna bakkirize nga bayita mu ye.

⁸Yokaana si ye yali Omusana, wabula ye yatumibwa ategeeze ebyʼOmusana.

⁹Kristo ye yali Omusana, omusana ogwʼamazima, ogujja mu nsi, okwakira buli muntu.

¹⁰Kyokka newaakubadde Kigambo oyo ye yatonda ensi, bwe yajja mu nsi, ensi teyamutegeera.

¹¹Yajja eri abantu be, naye abantu be ne batamusembeza.

¹²Naye bonna abaamusembeza, yabawa obuyinza okufuuka abaana ba Katonda; be bo abakkiriza erinnya lye.

¹³Abataazaalibwa musaayi, oba okwagala kwʼomubiri, wadde okwagala kwʼomuntu, naye abaazaalibwa okwagala kwa Katonda.

¹⁴Kigambo nʼafuuka omubiri, nʼabeera mu ffe, ne tulaba ekitiibwa kye, ngʼekyʼoyo omu yekka eyava eri kitaffe ngʼajjudde ekisa nʼamazima.

¹⁵Yokaana Omubatiza yamwogerako, ngʼalangirira nti, “Ono ye oyo gwe nayogerako nti, ‘Waliwo ajja emabega wange, eyansoka okubaawo, kubanga yaliwo nga sinnabaawo.’ ”

¹⁶Ku kujjula kwe ffenna kwe twagabana ekisa ekisukiridde ekisa.

¹⁷Amateeka gaatuweebwa nga gayita mu Musa, naye Yesu Kristo ye yaaleeta ekisa nʼamazima.

¹⁸Tewali nʼomu eyali alabye ku Katonda, okuggyako Omwana we omu yekka, abeera mu kifuba kya kitaffe, oyo ye yatutegeeza byonna ebimufaako.

¹⁹Bino byʼebigambo Yokaana Omubatiza bye yategeeza abakulembeze bʼAbayudaaya bwe baamutumira bakabona nʼAbaleevi okuva mu Yerusaalemi ne bamubuuza nti, “Ggwe ani?”

²⁰Teyagaana kubaddamu, wabula yayatulira ddala nti, “Si nze Kristo.”

²¹Ne bamubuuza nti, “Kale ggwe ani? Ggwe Eriya?” Yokaana Omubatiza nʼaddamu nti, “Nedda, si nze ye.” Ne bongera okumubuuza nti, “Ggwe Nnabbi ayogerwako?” Nʼaddamu nti, “Nedda.”

²²Awo ne bamugamba nti, “Abatutumye tunaabagamba nti, Ggwe ani? Weeyita otya?”

²³Nʼabaddamu nti,

²³“Nze ndi ddoboozi lyʼoyo ayogerera mu ddoboozi eryʼomwanguka ngʼasinziira mu ddungu nti, ‘Mutereeze ekkubo lya Mukama mweteekereteekere okujja kwe, nga nnabbi Isaaya bwe yayogera.’ ”

²⁴Abaatumibwa baava eri Abafalisaayo.

²⁵Awo ne babuuza Yokaana nti, “Kale lwaki obatiza, obanga si ggwe Kristo oba Eriya oba nnabbi oli?”

²⁶Yokaana nʼaddamu nti, “Nze mbatiza na mazzi, naye waliwo ayimiridde wakati mu mmwe gwe mutamanyi,

²⁷anvaako emabega, nze sisaanira na kusumulula buguwa bwa ngatto ze.”

²⁸Ebyo byali Besaniya, emitala wʼomugga Yoludaani, Yokaana Omubatiza gye yabatirizanga.

²⁹Ku lunaku olwaddirira, Yokaana Omubatiza nʼalaba Yesu ngʼajja, nʼagamba nti, “Mulabe Omwana gwʼEndiga owa Katonda aggyawo ebibi byʼensi.

³⁰Ye wuuyo gwe nayogerako, bwe nagamba nti, ‘Waliwo omuntu anvaako emabega ye ansinga obuyinza, kubanga ye yaliwo nga nze sinnabaawo.’

³¹Nange nnali simumanyi, wabula nze najja okubatiza nʼamazzi, ndyoke mulage eri abantu ba Isirayiri.”

³²Awo Yokaana Omubatiza nʼabategeeza nga bwe yalaba Mwoyo Mutukuvu ngʼakka okuva mu ggulu ngʼali ngʼejjiba nʼabeera ku Yesu,

³³nʼabagamba nti, “Nze saamutegeera, kyokka Katonda bwe yantuma okubatiza yaŋŋamba nti, ‘Bwʼolabanga Mwoyo Mutukuvu ngʼakka nʼabeera ku muntu, nga oyo, ye Kristo abatiza ne Mwoyo Mutukuvu.’

³⁴Ekyo nkirabye era nkiweerako obujulirwa nti Ye Mwana wa Katonda.”

³⁵Awo ku lunaku olwaddirira nate Yokaana bwe yali ayimiridde nʼabayigirizwa be babiri,

³⁶Yesu nʼayitawo ngʼatambula. Yokaana nʼamutunuulira enkaliriza nʼagamba nti, “Mulabe Omwana gwʼEndiga wa Katonda.”

³⁷Awo abayigirizwa abo ababiri bwe baawulira ekyo ne bagoberera Yesu.

³⁸Yesu bwe yakyuka nʼabalaba nga bamugoberera nʼababuuza nti, “Mwagala ki?” Ne bamuddamu nti, “Labbi, (ekitegeeza nti Omuyigiriza) obeera wa?”

³⁹Nʼabaddamu nti, “Mujje mulabeyo.” Awo ne bagenda naye gye yali abeera, olunaku olwo ne baluzibiza eyo nga bali naye, obudde bwali ngʼessaawa kkumi ezʼolweggulo okutuusa akawungeezi.

⁴⁰Omu ku abo ababiri abaawulira Yokaana ngʼayogera ne bagoberera Yesu, yali Andereya, muganda wa Simooni Peetero.

⁴¹Awo Andereya nʼagenda anoonya muganda we Simooni nʼamugamba nti, “Tulabye Masiya” (amakulu nti Kristo).

⁴²Andereya nʼatwala Simooni eri Yesu. Yesu bwe yeetegereza Simooni, nʼamugamba nti, “Ggwe Simooni omwana wa Yokaana, kale onooyitibwanga Keefa,” amakulu nti Peetero.

⁴³Ku lunaku olwaddirira, Yesu nʼagenda e Ggaliraaya, bwe yasanga Firipo nʼamugamba nti, “Ngoberera.”

⁴⁴Firipo yali wa mu kibuga Besusayida ewaabwe wa Andereya ne Peetero.

⁴⁵Firipo bwe yalaba Nassanayiri, nʼamugamba nti, “Tulabye Yesu mutabani wa Yusufu owʼe Nazaaleesi, Musa ne bannabbi gwe baawandiikako.”

⁴⁶Nassanayiri nʼamuddamu nti, “Mu Nazaaleesi musobola okuvaamu ekintu ekirungi?” Firipo kwe kumuddamu nti, “Jjangu weerabireko.”

⁴⁷Nassanayiri bwe yali asemberera Yesu, Yesu nʼagamba nti, “Laba, Omuyisirayiri wawu ataliimu bukuusa.”

⁴⁸Nassanayiri kwe kumuddamu nti, “Ontegedde otya?” Yesu nʼamugamba nti, “Firipo bwʼabadde tannakutuukako, nkulabye ngʼoli wansi wʼomutiini.”

⁴⁹Nassanayiri nʼamuddamu nti, “Labbi, oli Mwana wa Katonda, gwe Kabaka wa Isirayiri!”

⁵⁰Awo Yesu nʼamugamba nti, “Okkiriza kubanga nkugambye nti Nkulabye ngʼoli wansi wʼomutiini? Oliraba nʼebisinga awo obukulu.

⁵¹Ddala ddala nkugamba nti Oliraba eggulu nga libikkuse ne bamalayika ba Katonda nga balinnya era nga bakkira ku Mwana wʼOmuntu.”