Yokaana 10:1-42 LGCB2014 - Bible AI

¹“Ddala ddala mbagamba nti Atayita mu mulyango ngʼayingira mu kisibo kyʼendiga, naye nʼalinnyira awalala, oyo aba mubbi era munyazi.

²Naye ayingirira mu mulyango, ye musumba wʼendiga.

³Era oyo omuggazi amuggulirawo, nʼendiga ziwulira eddoboozi lye, aziyita amannya gaazo nʼazifulumya ebweru.

⁴Azikulembera ne zimugoberera, kubanga zimanyi eddoboozi lye.

⁵Omulala gwe zitamanyi, tezimugoberera, zimudduka buddusi kubanga tezimanyi ddoboozi lye.”

⁶Yesu nʼabagerera olugero olwo, kyokka bo, ebyo tebaabitegeera.

⁷Awo Yesu kyeyava ayongera nʼabagamba nti, “Ddala ddala mbagamba nti Nze mulyango gwʼendiga.

⁸Abalala bonna abansooka baali babbi era banyazi, nʼendiga tezaabawuliriza.

⁹Nze mulyango; buli ayingirira mu Nze alirokoka. Aliyingira, nʼafuluma nʼaliisibwa mu ddundiro.

¹⁰Omubbi kyʼajjirira kwe kubba nʼokutta nʼokuzikiriza. Nze najja, zibe nʼobulamu, era zibe nabwo mu bujjuvu.

¹¹“Nze musumba omulungi. Omusumba omulungi awaayo obulamu bwe olwʼendiga.

¹²Omupakasi, atali musumba, endiga nga si zize, bwʼalaba omusege nga gujja adduka nʼaleka awo endiga, omusege ne guzirumba ne guzisaasaanya.

¹³Akola atyo kubanga mupakasi, so nʼendiga tazifaako.

¹⁴“Nze ndi musumba mulungi, nʼendiga zange nzimanyi era nazo zimmanyi.

¹⁵Nga Kitange bwʼammanyi, era nga nange bwe mmumanyi, bwe ntyo bwe mpaayo obulamu bwange olwʼendiga.

¹⁶Nnina nʼendiga endala ezitali za mu kisibo kino, nazo kiŋŋwanidde okuzireeta, era nazo ziriwulira eddoboozi lyange, endiga zonna ne ziba ekisibo kimu era ne ziba nʼomusumba omu.

¹⁷“Kitange kyava anjagala, kubanga mpaayo obulamu bwange ndyoke mbweddize.

¹⁸Tewali nʼomu abunzigyako, wabula mbuwaayo lwa kwagala kwange. Nnina obuyinza okubuwaayo, era nnina obuyinza okubweddizza. Ekyo Kitange ye yakindagira.”

¹⁹Yesu bwe yayogera bwʼatyo, empaka mu Bayudaaya, ne zisituka buto.

²⁰Bangi ku bo ne bagamba nti, “Aliko dayimooni oba si kyo alaluse. Lwaki mumuwuliriza?”

²¹Abalala ne bagamba nti, “Ebigambo bino si bya muntu aliko dayimooni. Dayimooni asobola okuzibula amaaso ga bamuzibe?”

²²Mu Yerusaalemi mwalimu embaga eyʼOkutukuza, era bwali budde bwa butiti.

²³Yesu yali mu Yeekaalu ngʼatambula mu kifo ekiyitibwa Ekisasi kya Sulemaani.

²⁴Awo Abayudaaya ne bamwetooloola ne bamugamba nti, “Olituusa ddi okutubuusisabuusisa? Obanga ggwe Kristo kale tubuulirire ddala.”

²⁵Yesu nʼaddamu nti, “Nababuulira dda naye temukkiriza. Ekikakasa ebyo gyʼemirimu gye nkola mu linnya lya Kitange.

²⁶Naye mmwe temunzikiriza kubanga temuli ba mu ndiga zange.

²⁷Endiga zange zitegeera eddoboozi lyange, era nzimanyi era zingoberera.

²⁸Nziwa obulamu obutaggwaawo, era tezigenda kuzikirira. Tewali nʼomu ayinza kuzisikula mu mikono gyange,

²⁹kubanga Kitange yazimpa, era ye tewali amusinga maanyi, noolwekyo tewali asobola kuzisikula kuva mu mukono gwa kitange.

³⁰Nze ne Kitange tuli omu.”

³¹Awo Abayudaaya ne bakwata amayinja okumukuba.

³²Yesu nʼabagamba nti, “Mwalaba ebyamagero bingi Kitange bye yankozesa, kiruwa ku ebyo kye musinziirako okunkuba amayinja?”

³³Ne bamuddamu nti, “Tetukuvunaana lwa birungi byʼokola wabula lwa kubanga ovvoola; ggwe oli muntu buntu naye weeyita Katonda.”

³⁴ⓔ Yesu nʼabaddamu nti, “Tekyawandiikibwa mu mateeka gammwe nti, Katonda yagamba nti, ‘Muli bakatonda’?

³⁵Obanga abo abaweebwa ekigambo kya Katonda, yabayita bakatonda, ate ngʼEbyawandiikibwa tebidiba,

³⁶ate Nze, Kitange gwe yatukuza nʼantuma mu nsi, lwaki mugamba nti Avvoola kubanga ŋŋambye nti, Ndi Mwana wa Katonda?

³⁷Obanga sikola ebyo Kitange byʼayagala nkole, kale temunzikiriza;

³⁸naye obanga nkola byʼayagala, newaakubadde Nze temunzikiriza waakiri mukkirize ebyo bye nkola mulyoke mutegeere nti Kitange ali mu Nze, era nange ndi mu Kitange.”

³⁹Awo ne bagezaako nate okumukwata, kyokka ne yeemulula.

⁴⁰Nʼaddayo emitala wa Yoludaani mu kifo Yokaana gye yasooka okubatiriza, nʼabeera eyo.

⁴¹Abantu bangi ne bajja gyʼali nga bagamba nti, “Yokaana teyakola byamagero, naye buli kimu kye yayogera ku muntu ono kyali kya mazima.”

⁴²Bangi ne bamukkiririza eyo.