Yokaana 11:1-57 LGCB2014 - Bible AI

¹Awo olwatuuka omuntu ayitibwa Laazaalo eyali e Besaniya nʼalwala. Besaniya kyʼekibuga Maliyamu ne Maliza bannyina ba Laazaalo mwe baali.

²Maliyamu oyo ye yasiiga Mukama waffe amafuta agʼakaloosa ku bigere nʼabisiimuuza enviiri ze.

³Awo Maliyamu ne Maliza ne batumira Yesu ne bamutegeeza nti, “Mukama waffe, mukwano gwo gwʼoyagala ennyo mulwadde nnyo.”

⁴Naye Yesu bwe yakitegeera nʼagamba nti, “Ekigendereddwa mu bulwadde buno si kufa, wabula kulaga kitiibwa kya Katonda, era nʼokuweesa Omwana wa Katonda ekitiibwa.”

⁵Yesu yali mukwano gwa Maliyamu ne Maliza ne Laazaalo, naye bwe yawulira nga Laazaalo alwadde nʼayongera nʼasigala we yali

⁶nʼamalawo ennaku endala bbiri nga tanagenda gye bali.

⁷Awo ennaku bbiri bwe zaayitawo nʼagamba abayigirizwa be nti, “Tuddeyo e Buyudaaya.”

⁸Kyokka abayigirizwa be, ne bamugamba nti, “Labbi, mu nnaku ntono ezaakayita Abayudaaya baagezaako okukutta. Ate gyʼodda?”

⁹Yesu nʼabaddamu nti, “Essaawa ezʼemisana ziwera kkumi na bbiri, era omuntu bwʼatambula emisana teyeesittala kubanga aba alaba.

¹⁰Wabula atambula ekiro ye yeesittala, kubanga omusana teguli mu ye.”

¹¹Bwe yamala okwogera ebyo nʼabagamba nti, “Mukwano gwaffe Laazaalo yeebase, naye ŋŋenda kumuzuukusa.”

¹²Abayigirizwa ne bamugamba nti, “Mukama waffe oba yeebase anaazuukuka.”

¹³Naye Yesu yayogera ku kufa kwa Laazaalo, kyokka bo abayigirizwa be ne balowooza nti Ayogera ku kwebaka tulo.

¹⁴Awo nʼalyoka abategeereza ddala nti, “Laazaalo afudde.

¹⁵Naye ku lwʼobulungi bwammwe, nsanyuse kubanga ssaaliyo, mulyoke mukkirize; kale mujje tugende gyʼali.”

¹⁶Awo Tomasi eyayitibwanga Didumo[3] nʼagamba banne nti, “Ka tugende tufiire wamu naye.”

¹⁷Bwe baatuuka e Besaniya Yesu nʼasanga nga Laazaalo yaakamala ennaku nnya mu ntaana.

¹⁸Besaniya kyali kumpi ne Yerusaalemi, kilomita nga ssatu.

¹⁹Abayudaaya bangi baali bazze okukubagiza Maliza ne Maliyamu olwʼokufiirwa mwannyinaabwe.

²⁰Maliza bwe yawulira nti Yesu ajja, nʼagenda okumusisinkana, kyokka Maliyamu nʼasigala mu nnyumba ngʼatudde.

²¹Awo Maliza nʼagamba Yesu nti, “Mukama wange, singa wali wano mwannyinaze teyandifudde.

²²Era kaakano mmanyi nti Buli kyʼonoosaba Katonda, ajja kukikuwa.”

²³Yesu nʼagamba Maliza nti, “Mwannyoko ajja kuzuukira.”

²⁴Maliza nʼamuddamu nti, “Mmanyi nti Alizuukira ku lunaku olwʼenkomerero.”

²⁵Yesu nʼamugamba nti, “Nze kuzuukira nʼobulamu; akkiriza nze newaakubadde ngʼafudde, aliba mulamu,

²⁶na buli muntu omulamu akkiriza nze talifa emirembe nʼemirembe. Ekyo okikkiriza?”

²⁷Maliza nʼamugamba nti, “Mukama wange nzikiriza nti Ggwe Kristo Omwana wa Katonda, ajja mu nsi.”

²⁸Awo Maliza bwe yamala okwogera ebyo, nʼava eri Yesu nʼagenda eri Maliyamu nʼamuzza ku bbali mu kyama ngʼagamba nti, “Omuyigiriza azze, akuyita.”

²⁹Maliyamu olwawulira ekyo nʼasitukiramu nʼagenda eri Yesu.

³⁰Yesu yali akyali mu kifo Maliza we yamusisinkana nga tannatuuka mu kibuga.

³¹Abayudaaya abaali bazze okukubagiza abaali mu nnyumba ne Maliyamu bwe baamulaba ngʼayimiridde mangu ngʼafuluma ne bamugoberera ne balowooza nti agenda ku ntaana akaabire eyo.

³²Maliyamu bwe yatuuka awali Yesu nʼafukamira ku bigere bye, nga bwʼagamba nti, “Mukama wange, singa wali wano mwannyinaze teyandifudde.”

³³Yesu bwe yamulaba ngʼakaaba era nʼAbayudaaya abaali naye nga bakaaba nʼanyolwa mu mutima, nʼajjula obuyinike.

³⁴Nʼabuuza nti, “Mwamuteeka wa?” Ne bamugamba nti, “Mukama waffe jjangu olabeyo.”

³⁵Yesu nʼakaaba amaziga.

³⁶Awo Abayudaaya ne bagamba nti, “Ngʼabadde amwagala nnyo!”

³⁷Naye abamu ku bo ne bagamba nti, “Ono eyazibula amaaso ga muzibe, lwaki teyaziyiza musajja ono kufa?”

³⁸Awo Yesu ne yeeyongera okujjula obuyinike. Nʼatuuka ku ntaana. Yali mpuku ngʼeggaliddwawo nʼejjinja.

³⁹Yesu nʼagamba nti, “Muggyeewo ejjinja.” Naye Maliza, mwannyina wʼomufu, nʼamugamba nti, “Kaakano awunya nnyo, kubanga yaakamala ennaku nnya mu ntaana.”

⁴⁰Yesu nʼamuddamu nti, “Saakugambye nti Bwʼonokkiriza onoolaba ekitiibwa kya Katonda?”

⁴¹Ne baggyawo ejjinja. Awo Yesu nʼatunula waggulu nʼagamba nti, “Kitange nkwebaza olwʼokumpulira.

⁴²Mmanyi nti bulijjo ompulira, naye kino nkyogedde olwʼabantu bano abayimiridde wano, balyoke bakkirize nti Ggwe wantuma.”

⁴³Bwe yamala okwogera bwʼatyo, nʼakoowoola mu ddoboozi eryʼomwanguka nti, “Laazaalo fuluma.”

⁴⁴Awo Laazaalo nʼava mu ntaana, ngʼamagulu ge nʼemikono bizingiddwa mu ngoye eziziikibwamu abafu, nga nʼekiremba kisibiddwa ku maaso ge. Yesu nʼabagamba nti, “Mumusumulule atambule.”

⁴⁵Bangi ku Bayudaaya abajja ne Maliyamu bwe baalaba Yesu kyʼakoze ne bamukkiriza.

⁴⁶Naye abalala ne bagenda eri Abafalisaayo ne babategeeza Yesu kye yakola.

⁴⁷Awo bakabona abakulu nʼAbafalisaayo ne batuuza olukiiko ne bagamba nti, “Tukole ki? Kubanga omuntu ono akola ebyamagero bingi.

⁴⁸Bwe tumuleka bwʼatyo, abantu bonna bajja kumukkiriza bamugoberere, nʼekirivaamu Abaruumi bagenda kujja bazikirize ekifo ekitukuvu nʼeggwanga lyaffe.”

⁴⁹Awo omu ku bo, Kayaafa eyali Kabona Asinga Obukulu mu mwaka ogwo, nʼabagamba nti, “Mmwe temuliiko kye mumanyi.

⁵⁰Temulaba nti Kirungi omuntu omu afe, eggwanga lyonna lireme kuzikirira?”

⁵¹Ekyo Kayaafa teyakyogera ku bubwe, wabula ye nga Kabona Asinga Obukulu, yayogera ebyʼobunnabbi nti Yesu yali anaatera okufiirira eggwanga,

⁵²ate si ggwanga lyokka naye nʼokukuŋŋaanya abaana ba Katonda abaasaasaana.

⁵³Okuva ku lunaku olwo abakulembeze bʼAbayudaaya ne basala amagezi okutta Yesu.

⁵⁴Noolwekyo, Yesu nʼalekayo okutambula mu Buyudaaya mu lwatu, wabula nʼavaayo nʼalaga mu kifo ekiriraanye eddungu, mu kibuga ekiyitibwa Efulayimu, nʼabeera eyo nʼabayigirizwa be.

⁵⁵Embaga yʼAbayudaaya ejjuukirirwako Okuyitako yali eneetera okutuuka, abantu bangi ne bava mu byalo ne bambuka e Yerusaalemi okukola omukolo ogwʼokwetukuza ngʼembaga tennatuuka.

⁵⁶Bwe baali bakuŋŋaanidde mu Yeekaalu, ne banoonya Yesu, ne beebuuzaganya nti, “Mulowooza mutya? Yesu tajje ku mbaga?”

⁵⁷Bakabona abakulu nʼAbafalisaayo baali balagidde nti, Omuntu yenna bwʼamanya Yesu wali abategeeze, balyoke bamukwate.