Yokaana 12:1-50 LGCB2014 - Bible AI

¹Bwe waali wakyabulayo ennaku mukaaga emikolo gyʼEmbaga ejjuukirirwako Okuyitako gitandike, Yesu nʼajja e Besaniya ewa Laazaalo gwe yazuukiza.

²Ne bamufumbira ekyeggulo, Maliza nʼaweereza, Laazaalo nga ye omu ku baali batudde ne Yesu okulya.

³Awo Maliyamu nʼaddira eccupa erimu amafuta amalungi agʼakaloosa agʼomugavu, agʼomuwendo omungi, nʼagafuka ku bigere bya Yesu nʼabisiimuuza enviiri ze. Ennyumba yonna nʼejjula akaloosa kʼamafuta ago.

⁴Naye Yuda Isukalyoti, omu ku bayigirizwa ba Yesu, eyali owʼokumulyamu olukwe, nʼagamba nti,

⁵“Lwaki amafuta ago tegatundiddwamu eddinaali ebikumi bisatu ne zigabirwa abaavu?”

⁶Yayogera bwʼatyo si lwa kuba nti Yali alumirwa nnyo abaavu, wabula Lwa kubanga yali mubbi. Yatwalanga ensimbi ezaaterekebwanga mu nsawo yʼensimbi.

⁷Yesu nʼalyoka abagamba nti, “Omukazi mumuleke, akoze ekyo lwa kunteekerateekera kuziikibwa kwange.

⁸Abaavu muli nabo bulijjo, naye Nze sijja kuba nammwe bulijjo.”

⁹Awo ekibiina kinene ekyʼAbayudaaya bwe bategeera nti Yesu ali Besaniya, ne bajja, si Lwa Yesu yekka, naye nʼokulaba Laazaalo, Yesu gwe yazuukiza.

¹⁰Awo bakabona abakulu ne basala amagezi okutta Laazaalo,

¹¹kubanga yaleetera Abayudaaya bangi okuva ku bakulembeze baabwe ne bakkiriza Yesu.

¹²Ku lunaku olwaddirira, abantu bangi abaali bazze ku mbaga eyʼOkuyitako bwe baawulira nti Yesu ajja e Yerusaalemi,

¹³ⓕ ne bakwata amatabi gʼenkindu ne bagenda okumusisinkana nga baleekaana nti, “Aweereddwa omukisa ajja mu linnya lya Mukama.” “Ye Kabaka wa Isirayiri.”

¹³“Ozaana.”

¹⁴Awo Yesu bwe yalaba endogoyi ento nʼagyebagala. Ekyawandiikibwa ne kiryoka kituukirira ekigamba nti,

¹⁵ⓖ “Ggwe muwala wa Sayuuni totya; laba Kabaka wo ajja, nga yeebagadde omwana gwʼendogoyi.”

¹⁶Ebyo abayigirizwa tebaabitegeererawo, naye Yesu bwe yamala okugulumizibwa, ne balyoka bajjukira ebintu ebyo ebyali bimuwandiikiddwako, ne bye baamukola.

¹⁷Abo abaali mu kibiina, abaalaba Yesu ngʼazuukiza Laazaalo ne baategeeza ebyaliwo ne bwe yazuukiza Laazaalo.

¹⁸Abantu abangi bwe batyo kyebaava bagenda okusisinkana Yesu, kubanga baali bawulidde ekyamagero ekyo kye yakola.

¹⁹Awo Abafalisaayo ne bagambagana nti: “Mulabye bwe tutalina kye tufunyeemu! Laba ensi yonna emugoberedde.”

²⁰Naye waaliwo Abayonaani abamu abaali bazze okusinza ku mbaga eyʼOkuyitako

²¹ne bajja eri Firipo eyava e Besusayida ekyʼomu Ggaliraaya, ne bamugamba nti, “Ssebo, twagala kulaba Yesu.”

²²Firipo nʼategeeza Andereya, ne bagenda bombi okutegeeza Yesu.

²³Yesu nʼabaddamu nti, “Ekiseera kituuse Omwana wʼOmuntu agulumizibwe.

²⁴Ddala ddala mbagamba nti Empeke yʼeŋŋaano bwʼegwa mu ttaka efa, bwe tefa ebeera yokka, naye bwʼefa ebala ebibala bingi.

²⁵Buli eyeemalira ku bulamu bwe alibufiirwa, naye oyo akyawa obulamu bwe mu nsi eno, alibusigaza mu bulamu obutaggwaawo.

²⁶Oyo ampeereza, angoberere. Nze wʼendi nʼomuweereza wange wʼanaabeeranga era Kitange alimuwa ekitiibwa oyo ampeereza.”

²⁷“Kaakano omutima gwange gweraliikiridde. Kale ŋŋambe ntya? Nsabe nti Kitange mponya ekiseera kino? Naye ate ekyandeeta kwe kuyita mu kiseera kino.

²⁸Kitange gulumiza erinnya lyo.”

²⁸Awo eddoboozi ne liva mu ggulu ne ligamba nti, “Ndigulumizizza era ndyongera okuligulumiza.”

²⁹Ekibiina kyʼabantu abaali bayimiridde awo bwe baawulira ne bagamba nti, “Laddu yʼebwatuse!” Abalala ne bagamba nti, “Malayika yʼayogedde naye.”

³⁰Yesu nʼabagamba nti, “Eddoboozi lino lizze ku lwammwe, so si ku lwange.

³¹Ekiseera kyʼensi okusalirwa omusango kituuse, era omufuzi wʼensi eno anaagoberwa ebweru.

³²Bwe ndiwanikibwa okuva mu nsi, ndiwalulira bonna gye ndi.”

³³Ekyo yakyogera ngʼategeeza enfa gye yali anaatera okufaamu.

³⁴Awo abantu mu kibiina ekyo ne bamugamba nti, “Ffe tumanyi okuva mu mateeka nti Kristo aba mulamu emirembe gyonna. Naye ggwe lwaki ogamba nti Omwana wʼOmuntu kimugwanira okufa? Mwana wa Muntu ki oyo gwʼoyogerako?”

³⁵Yesu nʼabaddamu nti, “Omusana gujja kwongera okubaakira okumala akaseera. Kale mugutambuliremu mugende gye mwagala ngʼekizikiza tekinnatuuka. Atambulira mu kizikiza tamanya gyʼalaga.

³⁶Kale Omusana nga bwe gukyayaka mugutambuliremu mulyoke mufuuke abaana bʼomusana.” Yesu bwe yamala okwogera ebyo nʼagenda nʼabeekweka.

³⁷Kyokka newaakubadde Yesu yakola ebyamagero bingi, tebaamukkiriza.

³⁸ⓗ Ekigambo kya nnabbi Isaaya kituukirire ekigamba nti,

³⁸“Mukama ani akkiriza bye tugamba? Ani abikkuliddwa omukono gwa Mukama?”

³⁹Kyebaava batakkiriza kubanga nnabbi Isaaya yayongera nʼagamba nti,

⁴⁰ⓘ “Katonda yabaziba amaaso, era nʼabakakanyaza emitima, amaaso gaabwe galeme okulaba, era nʼemitima gyabwe gireme okutegeera, era gireme okukyuka, mbawonye.”

⁴¹Ebyo nnabbi Isaaya yabyogera kubanga yalaba ekitiibwa kye, era nʼamwogerako.

⁴²Era waaliwo bangi ne mu bakulembeze bʼAbayudaaya abaamukkiriza. Naye olwʼokutya Abafalisaayo, tebaamwatula, baleme kugobebwa mu kkuŋŋaaniro.

⁴³Kubanga baayagala ekitiibwa ekibaweebwa abantu okusinga ekitiibwa kya Katonda.

⁴⁴Awo Yesu nʼasitula ku ddoboozi nʼagamba nti, “Buli anzikiriza aba takkiriza Nze nzekka, wabula aba akkirizza nʼoyo eyantuma.

⁴⁵Nʼoyo alaba Nze aba alabye oli eyantuma.

⁴⁶Nze omusana nzize mu nsi buli anzikiriza aleme okusigala mu kizikiza.

⁴⁷Awulira ebigambo byange nʼatabifaako, Nze simusalira musango, kubanga Nze najja kulokola nsi so si kugisalira musango.

⁴⁸Kyokka buli agaana Nze era nʼagaana nʼebigambo byange, alina amusalira omusango. Alisalirwa omusango ku lunaku olwʼenkomerero okusinziira ku bigambo bye namutegeeza.

⁴⁹Kubanga Nze bye njogera si byange, ku bwange, naye mbategeezezza ebya Kitange bye yandagira okubategeeza.

⁵⁰Era mmanyi nti byʼalagira bwe bulamu obutaggwaawo. Noolwekyo kyʼaŋŋamba kye mbategeeza.”